Titus 2 - Sumi Naga CL (Re-edited) Bible (BSI)

Mtsümishei keu Külütsa

¹ Ikemu nou ye mtsümishei keu külütsa pesü shikalo.

² Mucho layemi ye tsaqütsalei, gihuküzüpu, alikhi aghasükulu shimasae, aküpülü, kikimiye, eno kutuukulu lo mtsümishei masae.

³ Topu layemi ghi titoi ghushoghili lo gihuküzüpu shimasae, xikishimi momu aji qüaxemi shikepu kumoe. Panongu ye akivi pesü timi shika masa,

⁴ eno topu lhotheqo pelo pano kimi eno atianuli kimiye penike qophe masae,

⁵ alikhi aghasülu pe, mqhamqhiyi, aki lo mlaitha, kimiyekini piye, eno pütüta kimi qhoqhülu pemasa, tishianguno khunomu Alhou tsa thoghamo nani.

⁶ Tipaphi lono apumiqo vilo alikhi aghasü lopi hakitelo.

⁷ No ampi pesü thokha lo kichekipiye kivi shipe piyelo, o kükütsü lo akikhi eno agigihupu piyelo,

⁸ o tsapi lo timi no pipütha pemo kepushi mtsümishei shilo, tishikeu lono küla akemi shikujove no ningu shou alhoksa pilu kepu kühave nani.

⁹ Aqemiqo ye thokha lo pütüta mpemi qhoqhü masae, ghechile mono pano mpemi lopushi,

¹⁰ küzükugho shimono aküpülü kivi piyelu masae, tishianguno panongu no thokha lo Alhou ni Xakuluu külütsa jukighilepu shitsü nani.

¹¹ Kughengu Alhouw küpükini ye timi kümtsü xakulupu ghenguno ipeghivae,

¹² tino hipa tiqheli lo Alhou sümokeu küxü eno ayeghi lo pitipüza keu pheve no alikhi aghasükulu, amikucho, eno Alhou sükümsa küxü xülopi qophe ani,

¹³ tino ni Lhou akijeu eno Xakuluu Jisü Khristo ajuküvü lono ipeghini keu khekuto akelo niw kükümgha lajupu ke.

¹⁴ Khristo no kixikila kümla kümtsü lono ningu qhüchile lunike Pa küxü tsüve, eno akivi kümla shinike khelho chekemi pesü Pa mheghi shi shikimthe luve.

¹⁵ Thime hipaqo pe sheshulo; eno kükagha kümtsü pesü shikumto no sakiyi lo. Timi khuu pelomu o jukünatha pekevilo.