Titus 1 - Sumi Naga CL (Re-edited) Bible (BSI)

Pethakütsü

¹ Paul, Alhou qüaxeu eno Jisü Khristow apostol no Alhouw kishekiphemi küpülü eno panow kuchou kighithi akimthe küxü lo sawu chekeu shiqhe tsünike yelu ani.

² Kuchou kighithi hi no khilemu miki chemo keu Lhou no aghuloki huthu mphi züuno piqhi keu lhokta küxü lajupu panongu tsü nani,

³ eno Pa tsa vecheo ado achipi lono Alhou ni Xakuluu no atsape hipau sheshu penike azah I tsüke.

⁴ Aqü küpülü kiqi lono I nu kuchou shi chekeu Titus lau: Apu Alhou eno ni Xakuluu Jisü Khristow küpükini eno aloino keu tsü ani.

Akukuho lo Kichimi Kümlapu

⁵ I no Crete lo o qhive keu ye hipau kimji lono ke, o pelo kiu shikha move keno kithikiyi shive tsüno mishiphu kümtsü lo I no azah o tsüke toi kichimi süsü peniye ke.

⁶ Kichimi lakhi ye tukutiye küha kemi, anipu lakhi akemi, pa tianuli ye küpülümi shimasae, eno ghasü kümla momu aghokulu kumo shimoni.

⁷ Akhemi lakhi ye Alhou kibo jukükütsüu keke pa ye tukutiye küha aghi masae. Pa ye agho aghoshi moni, amloide kalo moni, momu shokümzümi, ngukangughami, ala shiniye alamine moni,

⁸ ikemu timi sasükinimi, akivi kimiye chekemi, küsüqhi kulumi, müzüchoi kemi, akimthe eno alikhi aghasü kulumi shimasae.

⁹ Pa shikave ketoi pa ye pükhübekulupu tsa mtotoi tsüqülu masae, tishikeu lono pa ye mtsümishei keu külütsa pesü kütsüshika eno hekibidemi sakiyi lunani.

¹⁰ Kughengu hekibidemi kutomo ani, ameküküha tsa kipimi eno pishikiqhimi, akhoto no aphighüyiko kügha mqo ani.

¹¹ Panongu hasüve masae, kughengu panongu no kuchokumo lono ala shiniye shikamo kepu pesü akibo kümtsü xukutho ani.

¹² Cretemi tungkupu lakhi no pike, “Cretemi ye alhokuthu kimkimi, tüghashi lhoksaqo, akipichi shi mihemzai kemike.”

¹³ Ashepe hipau ye kuchoue. Tighenguno gheghei panongu sakiyi lo, tishianguno panongu pelo aküpülü lo mtsümishei luno

¹⁴ Jewmi küghakiche tsa ngo kuchou lono tsüghüve kemi zakütsüqo lo amlotsü pemoni.

¹⁵ Tsüghükhüi kemi ghengu ye thokha mqhamqhi ke, ikemu kitiqeve kemi eno pülümokemi ye kiumu mqhamqhi moe, pano kükümsü ngo kiviküsa lotsü ye kitiqevae.

¹⁶ Panongu no Alhou ithi anie picheni, ikemu pano kümla lono Pa milive cheni. Panongu ye aphikümqhüpu, hekibidemi, akümla kivi shikulupu qhemi kühae.