SAMUEL ATUGHIU 9 - Sumi Naga CL (Re-edited) Bible (BSI)

Akükau shipenike Saul Kishe

¹ Kinimi lakhi Benjamin lagha lono ighi kemi Kish ache. Pa ye Abiel nu, Zeror nu, Becorath nu, Aphiah nu, Benjamin laghami.

² Pa ye anu lakhi apumi ajukivi Saul ipikeu ache. Israel lo pa nguno ajukivi kütami ye khumu kühae. Kümtsü pa bighi qhou likhike.

³ Tipa ghuloki lo Saul papu Kishw khurhaqo pühave. Tighenguno Kish no pa nu Saul vilo pi, “Ithu no o gholo apumi lakhi sasü khurhaqo juwulo.”

⁴ Pa no Ephraim ato yeghi lo wuno ti vechesü Shalishah yeghi lo ighi, ikemu pama ye khurhaqo ithumlave. Ikehu Shaalim yeghi wuju, ikemu tilau aghi move. Tithiu pama no Benjamin yeghi lo wu kemu ithumlave.

⁵ Kughou pama no Zuph yeghi lo ighi keno, Saul no pa qeu, pa gholo chekeu vilo pi, “Ighive lo, nikujo idewoveni, tikumo aye I pu ye khurhaqo kümsü mono nikujo ghenguu no amlosa aghi niae.”

⁶ Ikemu pa no pi, “Julo, mishighüna hipau lo Alhou timi lakhi ani, eno pa ye agigihu akemi; pa no pikeu kümtsü kuchou shive cheni. Tighenguno itehi nikujo tilau wuni. Nikujo no wukepu laghi pa no kichepiye luvike.”

⁷ Ikehu Saul no pa qeu vilo pi, “Ikemu nikujo no wu aye, pa lau kiu pewuni kea? Kughengu nikujow süqhu lo asho kühavae, eno Alhou timi lau agho pewu kepu kühae. Nikujo ye kiu ani kea?”

⁸ Aqeu huno itaghi Saul khochile, “I u lo ghükayi tushoqü ani, I no Alhou timi tsüno nikujo laghi pitsü peni.”

⁹ (Püzüu Israel lo kughou milakhi no Alhou lau wuno kighinikile juni keno, pa no piche, “Ighilo, ningu ithukuluu lau wuni,” kughengu ishiw “tungkupu” huye azüu ye ithukuluu ipi cheke).

¹⁰ Saul no pa qeu vilo pi, “Alovae; shilo, nikujo wuni.” Ikehu mishighüna khipau lo Alhou timi akeno pama no tilau wuve.

¹¹ Pama no mishighüna toghi lo ikughi kelo, ilimiqo azü pewuni ye cheghi keu sholu no panoqo vilo pi, “Ithukuluu huye hile anima?”

¹² Panongu no khochile, “Pa ye ani, julo, pa ye nokujo züu cheni. Mtazü wulo. Pa ye lo-i itehi no mishighüna lo ighi ani, kughengu ishi timiqo no qhemghaike-a lo aghakishi tsü anie.

¹³ Nokujo no mishighüna lo iloghi kelo pa no qhemghaike-a lo chusho niye wumphi lono pa sholu nani. Kughengu pa no aghakishi kümghatsü masa keke pa ighi kumo züu ye timiqo ye chushomo nani; tithiu no khunoqo kusü püani keno panoqo no chusho nani. Itehi wulo, nokujo no lo-i pa sholu nani.”

¹⁴ Ikehu pama no mishighüna lo wu. Pama no iloghi kelo Samuel no qhemghaike-a lo wuniye pama küdau cheghi keu ithulu.

¹⁵ Saul ighi mphi lono, Ampeu no Samuel lau piyesüve:

¹⁶ “Thoghiu hipa ghuloki lo I no Benjamin yeghi lono timi lakhi o lau puwu nani, eno pa pelo Israel lo Iw timiqo shou sakipheu shi penike nono pa nukishe lo. Pa no Philistiami u lono Iw timiqo xalu nani. I no Iw timiqo ithuluvae, kughengu panoqo ghügha ye I lau ighivae.”

¹⁷ Kughou Samuel no Saul ithulu keno, Ampeu no pa vilo pi, “I no o vilo pi akeu timi huye hi ighi ani! Iw timiqo ghasüni keu ye pa ke.”

¹⁸ Tileno Saul no khagho phivilo Samuel lau ighi no pi, “I vilo pitsülo ithukuluu ki ye khile ani kea?”

¹⁹ Samuel no Saul khochile, “Ithukuluu huye ni ke. Izüu shino qhemghaike-a lo wulo, kughengu ishi no ye I gholo chusho nani, thanau no o pelo wuve peni eno nono kümsü akeu kümtsü o vilo pitsüni.

²⁰ Khurha khikhi pühave keno atsala küthü shivae, tipaqo kümsü akevilo, kughengu tipaqo ye ithuluvae. Ikemu Israelmi no pulopinyi chekeu kümtsü khuu shou ani kea? Ti ye o ghenguno eno o pu kibolomi kümtsü ghenguno kekumo?”

²¹ Saul no khochile, “Ni ye Israel shiaye dolo aghulou, Benjaminmi lakhi ke kumo keshea? Eno Benjamin laghami kümtsü dologhi ni limi no akitilau ke kumo keshea? Imaye kushiye no ye ishi I pütsa ani kea?”

²² Tileno Samuel no Saul ngo pa qeu sasü achebo kijelo sailo no sakiphemi pano shighi qhalo kusü püakeqo gholo küghüqave.

²³ Eno Samuel no alikhuli kishiu vilo pi, “I no ashileqhi, khikhi o tsüno o vilo, ‘hipau kütashi püaghilo, ipi keno tipau süghilo.’”

²⁴ Ikehu alikhuli kishiu huno alukobo eno tipau gholo akeu süghi no Samuel zülo qhitsü. Samuel no pi, “Julo, kiu qhipüa keno ti ye o zülo süghivae. Chulo, kughengu kihikütha do ighi moke kutolo hi ye o sala qhipüa tsüke, tishikeu lono o pelo kuküsümi gholono chu peniye ke.” Ikehu tipa tsalani Saul no Samuel gholono chue.

²⁵ Kughou panongu no qhemghaike-a lono iqighive keno, aki kütsüqa shou Saul ghenguno alüpa lakhi kutotsü, eno pa no züuve.

²⁶ Tishino tsükutholau Samuel no aki kütsüqa lono Saul ku, “Ithulo, eno I no jupuwo veni.” Ikehu Saul no ithughive, eno pa ngo Samuel pama alaghila küdau chesü wuve.

²⁷ Pama no mishighüna khalau ipeche kelo, Samuel no Saul vilo pi, “Aqeu vilo nikujo züu shi cheghilo pilo, eno kughou pa no hechesü wuveni keno, ado kitila hile ngovelo, tishianguno I no Alhou tsa o lau kilethi tsüni.”