SAMUEL ATUGHIU 8 - Sumi Naga CL (Re-edited) Bible (BSI)

Israelmi no Akükau Khu

¹ Kughou Samuel no alaye shive keno, pa no pa nuliqo pelo Israelmi shou xaküthami shipe.

² Pa nu anoghiu je no Joel, eno anu akiniu je no Abijah; pama ye Beersheba lo xaküthami shiche.

³ Ikemu pa nuli ye pa laghi lo chemove no ala shinikeu laghi lo wuve. Panongu no külügho lu eno kuchou xakütha tuchighive tsü.

⁴ Ikehu Israel lo layemi kümtsü hekütsü no Ramah lo Samuel lau ighi

⁵ eno pa vilo pi, “Julo, no ye alaye shivae eno o nuliqo ye o laghi lo cheche movae. Tighenguno shiye kütami toi ningu shou xaküthau shi penike akükau lakhi ni ghenguno süsü tsülo.”

⁶ Ikemu kughou panongu no, “Ningu shou xaküthau shi penike akükau ni tsülo” ipi keno, Samuel ye amlo qimlave. Pa no Ampeu vilo inikhu.

⁷ Ampeu no Samuel vilo pi, “Panongu no o vilo pi akeqo tsa kümtsü inilo, kughengu panongu ye o milive amoe, ikemu I no pano shou akükau shi akeu milive ani.

⁸ Egypt lono I no panoqo saipeghi ke tsala lono ishi kutolo panongu no I qhive no inami lhouqo qe ighive ketoi panoqo ye o lau ghi tishi ani.

⁹ Tighenguno itehi, panongu tsa inilo; no ye akumto shi panongu ghutuke likhi shilo eno kükami khuu panoqo shou ayepe nani keno tipaqo laghi panongu kichepiye lo.”

Akükau Vehulo Samuel no Ghutu

¹⁰ Ikehu khunoqo no pa vilo akükau khu akeno tipaqo vilo Samuel no Ampeu tsa kümtsü pive.

¹¹ Pa no pi, “Akükau khuu no nongu shou ayepeni keno, pa no hipaqo shi nani: pa no nongu nuliqo sawuve nani, paw khurkuluqo ghenguno süsü nani, khurshimi shipe nani eno paw khurkuluqo zülo chewupe nani.

¹² Pa no qhethonhe zatsüu, lhopungu zatsüu, eno pa yeghi hokideni kemi, paw ghile kuhumi, pa ghüshi nanuqo mlani kemi, eno paw khurkuluqo ghenguno tinhemgha mlani kemi süsü nani.

¹³ Pa no nongu ngaqo sawo axokütsüngü mlani kemi, likhu-lighu shini kemi eno asho mlani kemi shipe nani.

¹⁴ Pa no nongu luzaqo, atsailu, olive ghutu akiviu luve tsüno tipaqo pesü pa qemi tsüve nani.

¹⁵ Pa no nonguw athi eno atsailu lono chighi saje luve nani eno tipau pesü paw hiyampemi eno pa qemi tsüve nani.

¹⁶ Pa no nongu qepumi, aqelimi, eno lhothemi akivimi eno nonguw khurhaqo luve nani eno tipaqo pesü pa kümla lo süve nani.

¹⁷ Pa no nongu mbeloji lono chighi saje luve nani eno tipaqo pesü pa qemi tsüve nani.

¹⁸ Eno tipa tsalani nongu kükau, khuu nongu no nongu ghenguno kishephe keno, pa ghenguno nongu no ighamku nani, ikemu tipa tsalani Ampeu no nongu khochile tsümo nani.”

Ampeu no Israel Pulou Shitsü

¹⁹ Ikemu timiqo no Samuel tsa milive no agholu move. Panongu no pi, “Moe! Akükau lakhi ningu shou anani,

²⁰ tishino ningu ghi shiyeqo toilu nani, eno ni kükau no niw xaküthau shino ni züu wuno ni ghenguno aghüshi nani.”

²¹ Kughou Samuel no timiqo tsa qhoi chiluve keno, pa no Ampeu lau panoqo tsa atho pivetsü.

²² Ampeu no Samuel vilo pi, “Panoqo tsa gholuve lo eno akükau lakhi panoqo tsülo.” Tithiu Samuel no Israelmi vilo pi, “Now mishighüna lo wokhave lo.”