SAMUEL ATUGHIU 7 - Sumi Naga CL (Re-edited) Bible (BSI)

¹ Ikehu Kiriath-jearim lo timiqo no ighi no Ampeuw Puloshoqhi bohu luve no pesü atoghi lo Abinadab kilo wove. Eno panongu no pa nu Eleazar kishekimthepe Ampeuw Puloshoqhi bohu jukükütsüu shivepe.

² Puloshoqhi bohu Kiriath-jearim lo qhikeu ado kushuo ampe muku qhalo shive, eno Israel laghami kümtsü no Ampeu lau mloqae.

Samuel no Israel Xaküthau shi

³ Samuel no Israel laghami kümtsü vilo pi, “Tsala nongu no nongu mlo kümtsü pesü Ampeu lau xaide aye, nongu ye inami lhouqo eno Ashtaroth phevelo, nongu mlo pesü Ampeu tsülo eno Pa likhi qelo, tishiaye Pa no Philistiami u lono nongu xaphetsü nani.”

⁴ Ikehu Israelmi no Baal ngo Ashtaroth pheve no Ampeu likhi qeuve.

⁵ Tithiu Samuel no pi, “Israelmi kümtsü Mizpah lo hekütsülo, eno I no nongu ghenguno Ampeu lau inikhuni.”

⁶ Ikehu panongu no Mizpah lo hekütsü no azü shophe eno tipau pesü Ampeu zülo leqhi no tipani kümvü eno tileno pi, “Ningu no Ampeu zülo axine shivae.” Eno Samuel no Mizpah lono Israelmi shou xaküthau shie.

⁷ Tipa ghuloki lo kughou Philistiami no Israelmi ye Mizpah lo hekütsü luvae pi chulu keno, ampemi ghi Israel mjoni ye ighi.

⁸ Eno Israelmi no Samuel vilo pi, “Ampeu ni Lhou lau ni ghenguno inikhuni keu tave kevilo, tishianguno Pa no Philistiami u lono ningu xalu nani.”

⁹ Tighenguno Samuel no ambeti lakhi pesü kuchopu kipti kümllagho shi Ampeu tsü. Eno pa no Israelmi ghenguno Ampeu lau inikhu kelo Ampeu no pa khochiletsü.

¹⁰ Samuel no akipti kümllagho Ampeu tsü akelo, Philistiami no Israelmi leniye kupunu ighive. Ikemu tipa tsalani Ampeu no Philistiami shou tsütsüküsü ghügha kije puwu no kübangüvepe, eno panongu ye Israelmi zülo tomlavepe.

¹¹ Israelmi no Mizpah lono Beth-car kutolo Philistiami hawu eno panoqo ghiqhi pithive.

¹² Tithiu Samuel no atu lakhi ikhipe Mizpah ngo Shen küma dolo shosüve eno tipau je pesü Ebenezer kutsü; kughengu pa no pi, “Ampeu no itehi kutolo ningu kuphue.”

¹³ Philistiami ye ghüsüve eno itaghi Israelmi ghuthu lo iloghi move. Samuel no xüake tivilo Ampeu no Philistiami mjochile che.

¹⁴ Ekron lono Gath kutolo Philistiami no Israelmi launo mishighüna leluve keqo ye Israelmi no hakho chile luve, eno Israelmi no pano yeghi Philistiami u lono xaphe luve. Israelmi ngo Amorimi dolo külakishi ghi auve.

¹⁵ Samuel ye pa küxü tivilo Israelmi shou xaküthau shiche.

¹⁶ Eno pa no ampe ampe lo Bethel, Gilgal, eno Mizpah vehomxa wuche. Pa no a-a hipaqo kümtsü lo Israelmi shou xathatsü che.

¹⁷ Tishino pa no Ramah lo pa kilo idewove che, eno tilau ghi pa no Israelmi shou xathatsü che. Pa no tile Ampeu ghenguno akümlla-khache shiqhe pukue.