SAMUEL ATUGHIU 6 - Sumi Naga CL (Re-edited) Bible (BSI)

Puloshoqhi Bohu Israel Tsüchile

¹ Ampeuw Puloshoqhi Bohu ye Philistiami ghakhu lo aqhi tsüni qhive.

² Philistiami no achinemi ngo tumumi ku no pi, “Ningu ye Ampeuw Puloshoqhi Bohu pesü kiu shiveni kea? Kiu pesü tipau gholo küqhano pa-a lo tsüchile puwoveni kela ni vilo pilo.”

³ Panongu no pi, “Tsala nongu no Israel Lhouw Puloshoqhi Bohu tsüchile puwuveni aye, ti ye kümsa puwu kevilo, ikemu kiukiu gholau nomu akipimi kümllagho pa tsüpuwu lo, eno kushiye pa u ye nongu launo süchilemo keno nongu no ithive nani.”

⁴ Panongu no pi, “Ningu no Akipimi kümllagho pa tsü puwuni keu ye kiu kea?” Panongu no khochile, “Ameshoyi no mlakeu amishe eno aji julho pungungu tsüpuwu lo, ti ye Philistiami ampemi kikihi kiqi lono, kughengu püsa ye nongu eno nongu mpemi kümtsü shou ikughike.

⁵ Tighenguno nongu ye no yeghi kütsave tsükeu, amishe eno aji julhoqo mla masae, eno Israel Lhou jepipi tsülo. Tishiaye Pa no nongu eno no lhouqo ngo no yeghi lono Pa u süchileve nani.

⁶ Kushiye nongu ye Egyptmi eno Pharaoh no kuthovi ketoi amlo kuthovini kea? Pa no panoqo shishe ghimeve kethiu no panongu no timiqo puwuke kumo keshea?

⁷ Ikehu itehi mishikulu akithe lakhi eno akichhizü kütsü mishi kini khiküma shou kuokhasü khilemu puku mphi keno kutolo, eno amishi shou mishikulu xapipe lo, amishi küma tiqo ye aki lo sawove lo.

⁸ Ampeuw Puloshoqhi Bohu ikhipe mishikulu lo puku no tipa phivilo kuqhobo lo ameshoyi julho, khikhi nongu no akipimi kümllagho shi tsüpuwu ani keno, tipau süvelo. Tishi püzü pakutoshi no wuve pelo

⁹ eno jukutolo. Tsala tino Beth-shemesh lo wuve aye, pa no aghime kije hipau ningu lau süghi, ikemu ti küdau wumo aye pa u no ningu ghime mono azümülhü vecheo küsakusho sholu kepi ithive nani.”

¹⁰ Timiqo no titoi shi, akichhizü kütsü mishi kini saighi no mishikulu lo phedave eno atiqo ye aki lo puwove.

¹¹ Panongu no Ampeuw Puloshoqhi Bohu eno ameshoyi no aji ngo amishe julho mlakeu kuqhobo lo süno mishikulu lo pukuve.

¹² Eno amishiqo no vejoi Beth-shemesh küdau alaghi lakhi züsü wuve. Piyiu momu ajeu mu idewo mono vejoi wuve, eno Philistiami ampemi no apapesü Beth-shemesh lughi kutolo wue.

¹³ Tipa ghuloki lo Beth-shemeshmi ye akhila lo panow ashothi ghilehu ae. Kughou panongu no pishipuwo Puloshoqhi Bohu ithulu keno, panongu ye alovive.

¹⁴ Mishikulu no Beth-shemeshmi Joshua luza lo ighi no tile ngove. Tile atuqu kije lakhi ae. Panongu no mishikulu sü hechhe eno amishiqo pesü akipti kümllagho shipe Ampeu tsüe.

¹⁵ Levimi no Puloshoqhi Bohu ngo kuqhobo tile akeu, khipa lo ameshoyi julho süpüa keno tipaqo ikhiluve, eno tipaqo pesü atuqu kije akeu lo qhive. Tipa tsalani Beth-shemeshmi no akipti kümllagho ngo aghakishi kümllagho pesü Ampeu tsüe.

¹⁶ Kughou Philistiami ampemi pano pungu no ti ithulu keno, tipani no panongu ye Ekron lo idewove.

¹⁷ Philistiami no ameshoyi julho pesü axine kümllagho shi Ampeu tsükeu ye hipaqo ghenguno ke: Ashdod, Gaza, Ashkelon, Gath, eno Ekron ghenguno lakhikhi,

¹⁸ eno Philistiami ampemi punguw mishighüna bothasü keu, bothamo keu aphuqo kümtsü kikihi kiqi lono aji julho ameshoyi no mlakeu pungu ishi tsüke. Beth-shemeshmi Joshua luza lo atuqu kije akeu khile Ampeuw Puloshoqhi Bohu qhikeno tipau no ishi kutolo thopi ke.

¹⁹ Pa no Beth-shemesh lo timi khami pithive, kughengu panongu no Ampeuw Puloshoqhi Bohu shou jupukuve ke. Pa no timi pano lhotsüni pithive, eno timiqo no mloqa kughengu Ampeu no aküka pepheno timiqo pithive ke.

²⁰ Tishino Beth-shemeshmi no pi, “Khuu no Ampeu, akimthe Lhou hipau zülo puthugho luni kea?”

²¹ Tighenguno panongu no Kiriath-jearim lo küami lau atsapemi puwu no pi, “Philistiami no Ampeuw Puloshoqhi Bohu tsüchile puwovae. Ighi no pewove lo.”