SAMUEL ATUGHIU 5 - Sumi Naga CL (Re-edited) Bible (BSI)

Philistiami eno Puloshoqhi Bohu

¹ Kughou Philistiami no Alhouw Puloshoqhi Bohu süxaluve keno panongu no tipau pesü Ebenezer lono Ashdod lo ighi.

² Tithiu Philistiami no Alhouw Puloshoqhi Bohu pesü Dagon kilo ighi no Dagon ijeghi qhive.

³ Tishiwo thoghiu inaqhe kughou Ashdodmi no ithughi keno, julo, Dagon ye agi no ayeghi lo pishiqhope Ampeuw Puloshoqhi Bohu zülo ikiqipe aghi. Tighenguno panongu no Dagon ikhiqhe luve eno pa-a lo ghope qhive.

⁴ Ikemu tishiwo thoghiu inaqhe kughou panongu no ithughi keno, julo, Dagon ye agi no ayeghi lo pishiqhope Ampeuw Puloshoqhi Bohu zülo ikiqipe aghi, eno Dagon kütsü ngo au kinikujo akulaghi lo ita kütüta shive no aghi. Aphimpi likhi pa alo aghive.

⁵ Hi ghenguno Dagon chinemi eno timi khunoqo no Dagon kilo iloghini keno panongu ye ishi kutolo Dagon kulaghi lo nepuku chemoe.

⁶ Ampeu u no Ashdodmi lau ighono mishishei ikughi, Pa no Ashdod eno tipau hokümxa lo akemi lau amishe jeli pesü panoqo kichiqhi eno ghimeve.

⁷ Kughou Ashdodmi no kiu shi akeno ithuluve kelo ye panongu no pi, “Israel Lhouw Puloshoqhi Bohu ye ningu gholo püa kepu kumoe, kughengu pa u no mkamghai ningu eno ni lhou shou ikughi anie.”

⁸ Tighenguno panongu no Philistiami ampemi kümtsü ghakütsü kumqope no pi, “Ningu ye Israel Lhouw Puloshoqhi Bohu pe kiu shiveni kea?” Panongu no khochile, “Israel Lhouw Puloshoqhi Bohu ye Gath lo peighi pelo.” Tighenguno panongu no Israel Lhouw Puloshoqhi Bohu tilau pewuve.

⁹ Ikemu tilau peighive kethiu, Ampeu u no mishighüna shou ikughive no kichimamai keu kije ighive, eno Pa no mishighüna lo kichimi ngo itimi ghi ghimeve, ikehu amishe jeli no panongu shou ikughive.

¹⁰ Panongu no Alhouw Puloshoqhi Bohu Ekron lo tsü puwuve. Ikemu Ekron lo ighi khavi, timiqo no ighamku pi, “Panongu no ningu eno niw timiqo pithive niye Israel Lhouw Puloshoqhi Bohu ningu lau peighi anie.”

¹¹ Tighenguno panongu no wuno Philistiami ampemi kümtsü ghakütsü no pi, “Israel Lhouw Puloshoqhi Bohu tsüpuwuve lo, ti ye pa-a lo idewove pelo, tishikeu lono tino ningu eno niw timiqo heqhimo nani.” Kughengu kichimamai keu kije no mishighüna kümtsü shou ighive ake. Ampeu u no ighono mishishei tile ighiveke.

¹² Timi khunoqo no thimo keno panongu ye amishe jeli no ghimeqhi eno mishighüna lo aküqa no iku atsütsü tove.