SAMUEL ATUGHIU 4 - Sumi Naga CL (Re-edited) Bible (BSI)

Puloshoqhi Bohu Süxaluve

¹ Samuel tsa Israelmi kümtsü lau ighi. Israelmi no Philistiami sasü aghü shiniye wu. Panongu no Ebenezer lo aghazü shi eno Philistiami no Aphek lo aghazü shia.

² Philistiami no kujojo Israelmi lau ighive, eno kughou aghüshi huthu keno Israelmi ye Philistiami zülo tomlave, eno timi 4,000 aghüshiqa lono thive.

³ Kughou timiqo no aghazü lo ighi keno, Israel lo layemiqo no pi, “Kushiye Ampeu ye ningu pelo Philistiami zülo tomlave pe ani kea? Ningu no Ampeuw Puloshoqhi Bohu Shiloh lono hile peighini nolo, tishiaye tipau no ningu gholo ighi no aghümi küka lono ni xalu nani.”

⁴ Ikehu Shiloh lono aqokitikhi Mpeu, Khuu Cherubim küka lakhü shou akeno Paw Puloshoqhi Bohu peighive. Eno Eli nuli, Hophni ngo Phinehas pama ye Alhouw Puloshoqhi Bohu gholo ae.

⁵ Ampeuw Puloshoqhi Bohu aghazü lo ighive kemtsa Israelmi kümtsü no aghügha kije lono igha, tishi kehu aghügha no ayeghi kuchopu veküphave.

⁶ Kughou Philistiami no ighamku keu sütsa chilu keno, panongu no pi, “Hebrewmi ghazü lo aghügha kije igha akeu ye kiu kiqi kea?” Panongu no Ampeuw Puloshoqhi Bohu aghazü lo ighivae pikeu ithive kelo,

⁷ Philistiami ye msave kughengu panongu no pi, “Aghazü lo alhou ighivae.” Eno panongu no pi, “Ningu ye ahasapuae! Kughengu azüu hitoi keu ye shimphie.

⁸ Ni ghenguno ahasapuae! Khuu no hi akughushu lhouqo launo ningu xaphe luni kea? Asayeqha lo chekelo alhou hipaqo no Egyptmi shou püsa jeli puwuke.

⁹ Akumto shilo, eno kiptimi toi shilo, O Philistiamiqo, tikumo aye panongu no püzüu nongu qüaxe shiche ketoi nongu ye Hebrewmi qüaxemi shive nosae; kiptimi toi mjochile lo.”

¹⁰ Ikehu Philistiami no mjochile, eno Israelmi ye tomlave, panongu ye pokhave, kümtsü pütüta kilo powove. Eno tile timi kutomo ghiqhi pithive, kughengu Israel ghüshimi 30,000 ikiqive.

¹¹ Alhouw Puloshoqhi Bohu ye süxaluve, eno Eli nuli Hophni ngo Phinehas pama ghi thive.

Eli Kithi

¹² Benjamin lagha lo timi lakhi no itapinyi keu phimini pusü ayeghimkhu no akütsü lo epuku no aghüshiqa lono posü Shiloh lo ighi.

¹³ Kughou pa no ighi keno, Eli ye alaghi lo pa lakhü lo iqa ghi jukuto ae, kughengu pa ye Alhouw Puloshoqhi Bohu ghenguno pa mlo khokhoshi ae. Eno kughou timi huno mishighüna lo iloghi no asütsa kithe pi keno, mishighüna kümtsü no qauve.

¹⁴ Kughou Eli no aküqa sütsa chilu keno, pa no pi, “Hipau küqa ye kiu kea?” Tileno timi huno mtazü poighi no Eli vilo pi.

¹⁵ Tipa ghuloki lo Eli ye ampe lhotoku tache shiae eno pa nhethi ye züve kehu ithumla no ae.

¹⁶ Timi huno Eli vilo pi, “Aghüshiqa lono khuu poighi keno ti huye ni ke; ishi aghüshiqa lono I no pojolue.” Eli no pi, “I nu, kishive kea?”

¹⁷ Khuu asütsa kithe peighi keno pa no khochile, “Israelmi kümtsü Philistiami zülono pokhavae, eno timiqo lau thekiqhi kije ighivae. O nu Hophni ngo Phinehas pama ghi thivae, eno Alhouw Puloshoqhi Bohu ye süxa luvae.”

¹⁸ Pa no Alhouw Puloshoqhi Bohu jeku kemtsa, Eli ye khagho phivilo pa lakhü lono azübou no ikiqi veqhive eno akuo shochheve no thive, kughengu pa ye kitemi shive eno mishisheive ke. Pa ye Israelmi shou ampe lhobidi xaküthami shi ighie.

¹⁹ Tipa ghuloki lo, Phinehas nipu, pa mukishiu ye mishipu chekehu punu niye shive. Kughou li no Alhouw Puloshoqhi Bohu ye süxa luvae eno li pangu eno li kimi ye thivae pikeu sütsa chilu keno, li no itsaqive no punuve, kughengu li küsü no li shou ikughive ke.

²⁰ Eno li no thiveni ye shiuve kelono totimi li jupunu akeu no li vilo pi, “Msa kevilo, kughengu no ye anu kiptimi punuvae.” Ikemu li ye kiumu khochile move.

²¹ Eno li no anu je Ichabod ipi kuvetsü no pi, “Ajuküvü ye Israel lono wuvae!” Kughengu Alhouw Puloshoqhi Bohu ye süxaluve eno li pangu ngo li kimi ghi thiveke.

²² Eno li no pi, “Ajuküvü ye Israel lono wuvae, kughengu Alhouw Puloshoqhi Bohu ye süxaluve ake.”