SAMUEL ATUGHIU 31 - Sumi Naga CL (Re-edited) Bible (BSI)

Saul Kithi

¹ Philistiami no Israel sasü aghü shiae, eno Israelmi ye Philistiami zülono pove no Gilboa Toghi lono kutomo ikiqive.

² Philistiami no Saul ngo pa nuliqo haluve no Jonathan, Abinadab eno Malkhi-shua pano küthü ghiqhive.

³ Aghüshi ye Saul ghenguno ihulo keu shive, eno shexilika kipemi no pa ithuluve no zaghishi ghüzave.

⁴ Ikehu Saul no pa ghünanu kupuu vilo pi, “O zütakikihi pesü I jiqhive lo, tikumo aye aphighüyiko ghamo kemi no ighi no I kijipüsa no pithive nosae.” Ikemu pa ghünanu kupuu no tishi moe, kughengu pa ye shishe msave. Tighenguno Saul no pa zütakikihi ikhilu no tipau shou ikiqi iku thive.

⁵ Kughou pa ghünanu kupuu no Saul thive keu ithulu keno, pa ghi pa zütakikihi shou ikiqi iku pa gholono thive.

⁶ Hitoi Saul ngo pa nuli küthü ye thive, eno pa ghünanu kupuu ngo paw timi kümtsü atsala lakhi lono thikhave.

⁷ Kughou Israelmi akhila kukuu eno Jordan kukuu akeqo no Israelmi pokhave keu ithulu eno Saul ngo pa nuliqo thivae pi keu chilu keno, panongu no pano phughi qhive no pokhave. Eno Philistiami no ighi no tipaqo lo xüsüve.

⁸ Thoghiu Philistiami no thive keqo lheniye ighi kelo, panongu no Saul ngo pa nuli küthü Gilboa Toghi lo thi aghi keu ithulu.

⁹ Ikehu panongu no pa kütsü micheve tsüno pa ghünanu xaluve tsü, eno Philistiami yeghi kümtsü lo pano julhoqo ki eno timi kümtsü lau asütsa kivi pikülha penike aghinimi puwuve.

¹⁰ Panongu no pa ghünanu pesü Ashtaroth chineki lo qhive, eno pa phimpi no Beth-shan liwo lo phedape qhive.

¹¹ Ikemu kughou Jabesh-gilead lo küami no Philistiami no Saul shou shikeu chilu keno,

¹² aghütomi kümtsü no kutope putho lono wuno Beth-shan liwo lono Saul ngo pa nuli küthü sükumo ikhiqhi luve, eno Jabesh lo süghi no tilau no pitive.

¹³ Panongu no panoqo saghi pesü Jabesh lo tamarisk bo qholo shiqhove eno atsala tsüni kümvüe.