SAMUEL ATUGHIU 30 - Sumi Naga CL (Re-edited) Bible (BSI)

David Nipu Pama Küghaluve

¹ Kughou David ngo paw timiqo no aküthüni Ziklag lo ighi keno, Amalekmi no Ziklag eno apeu yeghi leighi aghi. Panongu no Ziklag leluve no pitileve tsü aghi,

² eno totimi ngo itimi eno kichimi, tile akeqo kümtsü küghaluve. Panongu ye khumu pithimo kemu küghape wukhave.

³ Kughou David ngo paw timiqo no mishighüna lo ighi keno, ti ye ami no pitive aghi, eno pano nipu ngo atianuli küghape wuve aghi.

⁴ David ngo paw timiqo no aküka kühave no akulho shimoke kutolo ighamku qae.

⁵ David nipu Jezreelmi Ahinoam eno Carmelmi azüu Nabal nipu Abigail pama ghi küghape wuve.

⁶ David ye ighono avesave, kughengu timi kümtsü no pano tianuli ghenguno alolo kukhukimji shi akehu atu pesü pa veqhiveni piuve. Ikemu David no Ampeu pa Lhou launo pa ampi shikumto luve.

⁷ David no Ahimelek nu achineu Abiathar vilo pi, “Achinepu phiküzü I lau süghi lo.” Abiathar no David lau peighi.

⁸ Eno David no Ampeu vilo ighiju, “Ni ye hipa mqo hawu nima? Ni ye panongu halu nanima?” Pa no khochile, “Hawulo, kughengu mtsüqheino nono haluve no xaphelu nani.”

⁹ Ikehu David ngo timi 600 pa gholo akeqo no hasü Besor ghokiti lo timi khami qhive aghi keqo-a lo ighi.

¹⁰ Ikemu David no pa gholo timi 400 sasü hawu. Timi 200 akulho shive keqo ye Besor ghokiti katha mlave no ngove.

¹¹ Panongu no Egyptmi lakhi aluza lo ithulu no küghape David lau ighi. Panongu no asho ngo azü pesü pa tsü eno pa no chushove,

¹² itaghi mubuthi shopa eno atsaikipki apho kini pa tsü. Kughou pa no chuve keno pa ghüthi püxü luve, kughengu pa ye chushomo keu putho pucho atsala küthü shive.

¹³ David no pa vilo pi, “No ye khuu laumi kea? Eno khilau no ighi kea?” Pa no pi, “Ni ye Egyptmi Amalekmi qeu, atsala küthü züu I no süuve kelono I mpeu no I qhive.

¹⁴ Ningu no apeu Kherethmi ngo Judahmi eno Caleb yeghi apeu lewu no Ziklag pitive tsüe.”

¹⁵ David no pa vilo pi, “I sasü leighi keqo lau wuni kema?” Pa no pi, “No ye I pithimo momu I mpeu u lo I süve tsümoe pi Alhou zülono I vilo ashoqhi shilo, eno I no o sasü leighi keqo lau wuni.”

David no Amalekmi Leluve

¹⁶ Kughou pa no David saiqi keno, julo, panongu ye aqha kümtsü nhakhape chusho eno ilhe aghi, kughengu panongu no thime kutomo Philistiami ngo Judah yeghi lono lepu ighilue.

¹⁷ David no kijiliu no huthusü thoghiu avela kutolo panongu sasü aghüshi, apumi 400 khunoqo sayeshi lo ikuno pove keno tinguno alau ye lakhimu poka mlae.

¹⁸ Amalekmi no pewuve keu kümtsü David no xaluve, eno pa nipu pama ghi hakholuve.

¹⁹ Kiu süwuve tsü keno, tinhemgha kije kitila eno atianuli kiumu pühamo no David no ithulu chileve.

²⁰ Pa no ambe eno amishi kümtsü hakholuve; timiqo no pa züuno pichepighi hasasü ighi no pi, “Hi ye Davidw hakhokulu ke.”

²¹ Tishino David no timi 200 khunoqo ighono akulho shive no pa pape mlave no Besor ghokiti lo ngove keno, panongu lau ighi. Panongu no David ngo pa gholo kichemi sholu niye ighi. Kughou David no timiqo kupunu ighi keno, pa no panongu sasü petha shi.

²² Kixikilami eno amekükühami khunoqo no David gholo akeno tipaqo no pi, “Panongu no ni gholo wumoke ghenguno hakhokulu thimeqo kiumu tsümoe. Panongu ye anipu eno atianuli likhi sasü wolu nani.”

²³ Ikemu Dadiv no pi, “I thiküzümiqo, Ampeu no kiu ningu tsü keno tipau pesü tishi mlae. Pa no ningu püxü tsüno ni leighi keqo mqo pesü ni u lo sütsüe.

²⁴ Hipau vehu lo khuu no nongu tsa ini tsüni kea? Kughengu aghüshiqa lo wu kemi no kiu saje luni keno, anhemgha ngokhe kemi saje ghi tishi nani. Panongu ye aphiphi shi kije nani.”

²⁵ David no Israel ghenguno tipani no ishi kutolo hipau pesü pimheye eno ayezah shive tsü.

²⁶ Kughou David no Ziklag lo ighi keno, pa no hakhokulu hami pesü pa küsami, Judah lo layemi tsüpuwo no pi, “Hi ye Ampeu ghümi launo hakholu keu gho nongu tsüpuwo ani.”

²⁷ Ti ye hipaqo lo akemi tsüe: Bethel, Apeu Ramoth, Jattir;

²⁸ Aroer, Siphmoth, Eshtemoa;

²⁹ Racal, Jerahmeel mishighünaqo, Kenimi mishighünaqo;

³⁰ Hormah, Bor-ashan, Athach;

³¹ eno Hebron, David ngo paw timiqo no itsüche keqo-a kümtsü lo tsüpuwu.