SAMUEL ATUGHIU 3 - Sumi Naga CL (Re-edited) Bible (BSI)

Ampeu no Samuel Ku

¹ Anu Samuel ye Eli zülono Ampeu qe ache. Tipa ghuloki lo Ampeu tsa mpiche; papashi kungunhetsü ithulu keu kühae.

² Tipa ghuloki lo Eli nhethi ye zamemeive eno tsaqüi ithumlauve no pa-a lo ihozü ache.

³ Alhou kulu ye pinhemo no ae eno Samuel no Ampeu chineki, khile Puloshoqhi bohu qhipüa keno tile ihozü ae.

⁴ Tileno Ampeu no Samuel ku, eno pa no, “Ni hile ani!” ipi

⁵ no Eli lau poighi no pi, “Nono I kuke ghenguno ni ye hi ighi ani.” Ikemu pa no pi, “Ni ye o ku moe, züuve lo.” Ikehu pa ye idewo züuve.

⁶ Ampeu no itaghi “Samuel” ipi pa ku, Samuel no idathu Eli lau ighi, “Nono I kuke ghenguno ni ye hi ighi ani,” ipi. Ikemu pa no pi, “I nu, ni ye o ku moe, züauve lo.”

⁷ Tipa ghuloki lo Samuel ye Ampeu ithi mphi eno Ampeu tsa ye pa lau pephe piye mphike.

⁸ Itaghi Ampeu no ghuthu aküthüu Samuel ku. Pa no ithu Eli lau ighi no pi, “Nono I kuke, ni ye hi ighi ani.” Tileno Eli no Ampeu ye Samuel ku anipi pimhe luve.

⁹ Ikehu Eli no Samuel vilo pi, “Wuno züauve lo, eno tsala Pa no o ku aye, ishi pilo, ‘Pilo, Ampeu, O qeu ye chilu anie.’” Ikehu Samuel no wuve no züuve.

¹⁰ Ampeu no ighi no puthughope azüu toi, “Samuel! Samuel!” ipi ku. Samuel no pi, “Pilo, Ampeu, O qeu ye chilu anie.”

¹¹ Tile Ampeu no Samuel vilo pi, “Julo, Israel lo thime lakhi I no shiniye ani, tipau shikelo khuno kini no chiluni keno panoqo kümtsü akini mutho ghüghüi nani.

¹² Tipa tsalani I no Eli kibolomi ghenguno piqhi püakeu kümtsü abothu lono ashekha kutolo shikupu nani.

¹³ I no pa vilo asheshu püanike I no pülhapuju ghenguno pa kibolomi ghimeni ye ani, ti ye axine pa no ithi akeu ghenguno ke, kughengu pa nuliqo no Alhou thaigha ighivae, eno pa ye panoqo ghasü move.

¹⁴ Tighenguno I no Eli kibolomi lau tushoqhi, ti ye pülhapuju lo Eli kibolomi xine ye lochile mla momu akümllagho nomu shikimthe lumo nani.”

¹⁵ Samuel ye inaqhe kutolo züae; tithiu pa no Ampeu ki hukikhaqo khaqhive. Eno Samuel no kungunhetsü vehu Eli vilo pini keu msave.

¹⁶ Ikemu Eli no Samuel ku no pi, “I nu Samuel.” Eno pa no pi, “Ni hile ani.”

¹⁷ Eli no pi, “Pa ye o vilo kiu pikea? I launo ti küsüve kevilo. Tsala Pa no o vilo pikeqo tsa kiukiumu nono I launo küsüve aye Alhou no I lau shiniye akeu nguno alau o lau shipeni.”

¹⁸ Tighenguno Samuel no kiumu küsü mono thokha kümtsü pa vilo pive. Eno pa no pi, “Ti huye Ampeu ke. Kiu no Pa ghenguno akivi ipi ithulu ani keno tishi pelo.”

¹⁹ Samuel ye thuwuve eno Ampeu no pa gholo ae eno pa tsa lakhimu adou shive tsümoe.

²⁰ Dan lono Beersheba kutolo Israelmi kümtsü no Samuel ye Ampeuw tungkupu kuchou kepi ithive.

²¹ Eno Ampeu no itaghi Shiloh lo ipeghi piye, kughengu Ampeu no Pa tsa vecheo Samuel lau ipeghi piye cheke.