SAMUEL ATUGHIU 29 - Sumi Naga CL (Re-edited) Bible (BSI)

Philistiami no David Milive

¹ Philistiami no Aphek lo panow ghüshimi hekütsü. Eno Israelmi no Jezreel lo aghokiti phivilo aghazü shiae.

² Philistiami ampemi no aqhe eno qhethonhe mqo shi wuche kelo David ngo paw timiqo ghi Achish thiu shino wuche,

³ Philistiami zatsümi no pi, “Hebrewmi hipaqo ye hile kiu shi ani kea?” Achish no zatsümi vilo pi, “Hi ye Israel lo akükau Saul qeu David ke kumo keshea, pa ye aqhi ampe I gholo ngo ighivae eno pa no I lau ighive ke ghuloki lono ishi kutolo ni ye pa lolo akipimi ithumla aphi.”

⁴ Ikemu zatsümi no Achish ju amlo ideve no pa vilo pi, “Timi hipau puwove no pa kungo-a kutopüa tsükeu lo idewove pelo. Pa ye ni gholo aghüshiqa lo iqimo nani, tikumo aye pa ye aghüshiqa lono ni ghümi shive nosae. Kughengu pa ye niw timiqo kütsü pesü pa mpeu mlo chuluni keu nguno akiviu kütau kiu ani kea?

⁵ Hi ye David khuu ghenguno timiqo no ishi ilhe ale phe keno, pake kumo? ‘Saul no qhethonhe heqhilue, ikemu David ye qhethonhe chighi piqi heqhilue.’”

⁶ Tileno Achish no David kuno pi, “Ampeu xü anike no ye amikucho shi acheni, eno I gholo aghüla wuni keu ye achipie pi ni ye kümsü ani. Kughengu nono I lau ighike tsala lono ishi kutolo ni ye akumou kiumu ithulu mphi. Ikeghi ampemi no o pulo movae.

⁷ Ikehu itehi aloino idewove lo; tishianguno no ye Philistiami ampemi loshipüsü monani.”

⁸ David no Achish vilo pi, “Ikemu ni ye kiu shive kea? I no o kümla lo iloghi kelono ishi kutolo no ye o qeu lau kiu ithulu keno ni ye I mpeu, akükau gholo aghümi küpüghü mla kepu shive kea?”

⁹ Achish no khochile, “I no ithi anike no ye I nhethe lo kungumi lakhi toi tukutiye kühae. Ikeghi Philistiami zatsümi no, ‘Pa ye ningu gholo no aghüshiqa lo wumo nani,’ ipivae.

¹⁰ Ikehu thanau inaqhe itheno o mpeu qemi khunoqo o gholo ighi keno tipaqo sasü tsütho ipeghi kemtsa alachelo.”

¹¹ David ye paw timiqo sasü inaqhe itheno Philistiami yeghi lo idewove, eno Philistiami no Jezreel lo wuve.