SAMUEL ATUGHIU 28 - Sumi Naga CL (Re-edited) Bible (BSI)

Saul ngo En-dor Tuumi

¹ Tipa ghuloki lo Philistiami no Israel sasü aghü shiniye panow ghüshimi hekütsü. Achish no David vilo pi, “No eno ow timiqo ye I gholo wunanie pi ithilo.”

² David no Achish vilo pi, “O qeu no kiu shilu nani keno nono ithi nani.” Achish no pi, “Ighono aghile, aküxü tivilo no ye I no I ghukheu shipeni.”

³ Samuel thive kethiu Israel kümtsü no pa ghenguno mloqa eno paw mishighüna Ramah lo shiqhove. Saul no tumumi ngo kithixashemi aghakhu lono hapheve.

⁴ Philistiami no hekütsü luve no wo Shunem lo aghazü shive. Saul no Israelmi kümtsü hekütsü sasü Gilboa lo aghazü shive.

⁵ Kughou Saul no Philistiami ghüshimi ithulu keno, pa ye msave no pa mlo kukushive.

⁶ Kughou Saul no Ampeu lau ighiju keno, Ampeu ye asamou nomu, Urim momu tungkupu vecheo nomu pa khochile move.

⁷ Saul no pa qeu vilo pi, “I ghenguno totimi tumumi lakhi phuju lo, I no li lau wuno ighijuni.” Pa qemi no pa vilo pi, “Julo, En-dor lo tumumi lakhi ani.”

⁸ Ikehu Saul no pa ju kilive no aphimini kütau pepusü pa gholo timi kini sasü wue. Panongu no putho lono topumi lau ighi. Eno pa no pi, “I ghenguno tumu julo eno I no khuu khuu je mu o vilo pikeu saghi lo.”

⁹ Topumi huno pi, “Saul no kiu shive keno, pa no kishi aghakhu lono tumumi ngo kithixashemi hapheve keno nono thebei ithi ani. Imaye kushiye I pithive niye no ye I küxü ghenguno alichhe shi ani kea?”

¹⁰ Ikemu Saul no Ampeu je lono li lau ashoqhi shi, “Ampeu xü anike hi ghenguno kiu ghimemu o shou ikughimo nani.”

¹¹ Tileno topumi huno pi, “O ghenguno khuu saghi tsüni kea?” Pa no pi, “Samuel saghi tsülo.”

¹² Kughou topumi huno Samuel ithulu keno, li no ighamku, eno Saul vilo pi, “No ye kushiye I pishiqhive akea? No ye Saul ke.”

¹³ Akükau no li vilo pi, “Msa kevilo. No ye kiu ithulu ani kea?” Atopuu huno pi, “Ayeghi qhou no alhou lakhi ipeche keu I no ithulu ani.”

¹⁴ Pa no li vilo pi, “Pa ju ye kiu toi kea?” Li no pi, “Muchomi lakhi ipe cheni, eno pa ye chijeboike phimini pepu ani.” Saul no ti ye Samuel kepi ithive no pa gi ayeghi lo pishiqhope agigihu tsü.

¹⁵ Tile Samuel no Saul vilo pi, “No ye kushiye I saghi no I pünaqhi ani kea?” Saul no khochile, “Ni ye ighono avesa ani, kughengu Philistiami no I sasü küpüghü ani, eno Alhou no I launo tsüghüve no asamo momu tungkupu vecheo nomu I khochile movae. Tighenguno ni ye kiu shikepu keno pitsü peniye I no o kusaghi anie.”

¹⁶ Samuel no pi, “Imaye Ampeu no o launo tsüghüve no o ghümi shive aye kushiye I vilo ighiju ani kea?

¹⁷ Ampeu no I vilo pike toi o lau shivae, kughengu Ampeu no o u lono kükaqha kijethave tsüae eno tipau pesü o kisüghüu David tsüvae.

¹⁸ Nono Ampeu tsa lumove eno Amalekmi lau Pa loghu pephe move kehu Ampeu no ishi tsala lo thime o lau hi shi ani.

¹⁹ Tinguno alau, Ampeu no o gholono Israel ghi pesü Philistiami u lo süvetsü nani, eno thoghiu ye no eno o nuli ye I gholo ighive nani. Ampeu no Israel ghüshimi ghi Philistiami u lo süvetsü nani.”

²⁰ Saul no Samuel tsa chilupe paikhavi akümsa launo ayeghi lo xachhope ikiqive. Pa lolo aküka kühave, kughengu pa ye putho pucho kiumu chumono ake.

²¹ Atopuu no Saul lau ighi, kughou li no pa ye kichimamai akeu ithulu keno pa vilo pi, “Julo, o qeliu ye o gholuvae. I no I küxü kütsüshi nono I vilo pikeu gholuvae.

²² Tighenguno itehi no ghi o qeliu gholu lo. I no asho kitila o tsünike chulo, tishiaye kughou nono idewoni keno no ye akumto shilu nani.”

²³ Pa no milive no pi, “Ni ye chumoe.” Ikemu pa qemi no atopuu gholono pa qhüiniju, ikehu pa no panoqo tsa luve. Ikehu pa no ayeghi lono ithu alüpa lo iqave.

²⁴ Atopuu ye athakupu mishiti lakhi ae, li no mtazü tipau heqhive, eno ashomkhu kunupe kholaqhi sümo keu sho mla.

²⁵ Li no Saul ngo pa qemiqo zülo kutope qhitsü, eno panongu no chuve. Tithiu panongu no tipa ji no wove.