SAMUEL ATUGHIU 27 - Sumi Naga CL (Re-edited) Bible (BSI)

David no Philistiami lau Pove

¹ David no pa mlo lono kümsü, “Ni ye ghulo lakhi lo Saul u lono thive nani. I ghengu ye Philistiami yeghi lo pove keu nguno akiviu kühae. Tileno Saul ye Israel ghuthu lo I phuju pühave no aghüthi süve nani, eno ni ye pa u lono pokaluve nani.”

² Ikehu David no pa gholo timi 600 sasü Maoch nu, Gath kükau Achish lau wuve.

³ David no paw timi, pa kibolomi, pa nipu Jezreelmi Ahinoam eno azüu Nabal nipu Carmelmi Abigail pama, hi kümtsü sasü Gath lo Achish gholo ngove.

⁴ Kughou Saul vilo David ye Gath lo povae pi keno, pa ye phuwu move.

⁵ David no Achish vilo pi, “O pulou shiaghi aye, I pelo xüsü lupe kepushi aghakhu lo mishiphu lakhi lo a-a aghulo I tsülo. Kughengu kushiye o qeu ye kükami mishighüna lo o gholo xüni kea?”

⁶ Ikehu tipani no Achish no Ziklag pa tsüve. Tighenguno ishi kutolo Ziklag ye Judah kükami sala shive.

⁷ David ye ampe lakhi eno aqhi bidi Philistiami ghakhu lo xüve.

⁸ David ngo paw timiqo no wuno Geshurmi, Girzimi, eno Amalekmi lewu, kughengu hipaqo ye inahuu no, Shur ngo Egypt yeghi kutolo xüsüve kemi ke.

⁹ David no lewu no kiptimi na totimi namu püxü moe, eno ambe, amshitsü, khurha, sayeshi, eno aphimini luvetsü no Achish lau idechile ighiche.

¹⁰ Kughou Achish no, “Ishi ye khilau lewu kea?” ipi ighiju aye, David no, “Judah apeu lewue,” momu “Jerahmeel apeu,” momu, “Kenimi apeu,” ipi khochile che.

¹¹ David no Gath lo asütsa süghi pemo niye kiptimi totimi khumu püxü moe, pa no kümsü, “Tikumo aye panoqo no ningu ghili pive tsüno, ‘David no ishi mlae,’ ipive nosake.” Pa no Philistiami yeghi lo xüake tivilo pa khuaye ye hitoi ache.

¹² Achish no David pükhübe che eno ishi kümsü, “Pa ye paw timi Israelmi lau aphikümqhüpu shivae; tighenguno pa ye pülhapuju I qeu shi cheniae.”