SAMUEL ATUGHIU 26 - Sumi Naga CL (Re-edited) Bible (BSI)

David no Itaghi Saul Püxütsü

¹ Tithiu Ziphmi no Gibeah lo Saul lau ighi no pi, “David ye Jeshimon kipelau Hakhilah toghi lo itshü anike kumo keshea?”

² Ikehu Saul no mtazü Israel lo kishekiphemi 3,000 sasü David phuniye Ziph sayeqha lo iqi.

³ Saul no Jeshimon kipelau alaghi phivilo Hakhilah toghi lo aghazü shive. Ikemu David ye asayeqha lo ae. Kughou Saul no asayeqha lo pa phuche keu pa no ithulu keno,

⁴ David no pukujumi puwu no Saul ye kuchou no ighivae pi ithive.

⁵ Pa no mtazü Saul no khile aghazü shi akeno, tile ighi kelo Saul ngo Ner nu Abner, ghüshimi zatsüu, pama no akulhoqhi ke-a ithuluve. Saul ye aghazü mta lo ihozü ae eno ghüshimi no pa sühope kheae.

⁶ David no Hittimi Ahimelek ngo Zeruiah nu Joab thiküzüu Abishai pama vilo pi, “Khuu no I gholo Saul ghazü lo iqini kea?” Abishai no pi, “I no o gholo iqini.”

⁷ Ikehu David ngo Abishai pama no putho lono ghüshimi lau iqi. Saul ye aghazü mta lo züaghi, pa ngupa no akütsü phivilo süsüve no Abner ngo ghüshimi no pa vehope züaghi.

⁸ Abishai no David vilo pi, “Ishi tsala lono Alhou no o ghümi pesü o u lo süve tsüae. Itehi I pelo ghuthu khavino ayeghi lo pa chhedave pelo, ni ye ghuthu kini chhemoe.”

⁹ Ikemu David no pi, “Pa kütsa kevilo, kughengu khuu no Ampeuw nukikishe shou au süqhe no akipimi shimoni kea?

¹⁰ Ampeu xü anike Ampeu no Saul pithive nani, momu pa kithi tsala ighi nani, momu pa ye aghüshiqa lo ilo no thive nani.

¹¹ Mthamini ni ye khilemu Ampeuw nukikishe shou I u bemo nani. Ikemu pa kütsü phivilo angupa ngo azübohu akeu luve lo, eno nikujo ye wuveni.”

¹² Ikehu David no Saul kütsü phivilo angupa eno azübohu akeu luve no pama ye wuve. Kümtsü no zü akehu khunomu ithumla momu ithimo, tike kumono khumu ithughi moe, kughengu Ampeu launo aküzü kutho panoqo shou ighive.

¹³ Tishino David no hukukuu wuve no putou atoghi kütsüqa lo ngove, tiküma dolo a-a kije auve.

¹⁴ David no ghüshimi eno Ner nu Abner kuno pi, “Abner, no ye chilu anima?” Abner no khochile, “No akükau ku akeu ye khuu kea?”

¹⁵ David no pi, “No ye kiptimi ke kumo? Israel lo o toike khuu ani kea? Imaye kushiye o mpeu akükau khekuto move kea? Kughengu timi lakhi no akükau o mpeu kütsave niye ighie.

¹⁶ Nono hi shikeu ye akivi kumoe. Ampeu xü anike no ye thive küzüe, kughengu no ye Ampeuw nukikishe, o mpeu khekuto move. Itehi akükau ngupa ngo azübohu pa kütsü phivilo akeu khile ani keno julo.”

¹⁷ Saul no David sütsa michiluve no pi, “I nu David, hi ye o sütsa keshea?” David no pi, “Hi ye I sütsae, I mpeu, O akükau.”

¹⁸ Pa no pi, “Kushiye I mpeu ye pa qeu hacheni kea? Ni ye kiu shive kea? I u lo alhoksa kiu ani kea?

¹⁹ Tighenguno itehi I mpeu akükau no o qeu tsa inilo. Tsala Ampeu no o xukuthope I küla aghi aye, akümllagho Pa tsüve lo, ikemu timi no shi aghi aye, pa ye Ampeu zülo angusü shipeni. Kughengu panongu no Ampeu mheghi yeghi lo I saje kühave peniye ishi tsala lono I haphe no ishi piani, ‘Wuno kütami lhou qelo.’

²⁰ Ikehu Ampeu launo putosüu akelono I ji ayeghi lo kighiji tsü kevilo, kughengu Israel kükau ye timi no naghutoqo lo akhi ghau hache keshi axü-ahi lakhi phuniye ighi ani.”

²¹ Tile Saul no pi, “I no axine shivae. Ideighi lo, I nu David, ni ye o ghime moae, kughengu nono ishi I küxü akughupu shi kihitsüe. Julo, I no mbomzü shivae, eno akumou kümla kije shivae.”

²² David no pa khochile, “Angupa hi ani, O akükau! Apumiqo dolo lakhi no ighi no luvelo.

²³ Milakhi mikucho eno pükhükulu ghenguno Ampeu no asaxü tsü cheni, kughengu Ampeu no ishi o pesü I u lo sütsüe, ikemu I no Ampeuw nukikishe shou I u süqhe move.

²⁴ Julo, I no ishi o küxü akughupu shi kihitsü ketoi Ampeu no Pa zülo I küxü akughupu shi kihitsü peni, eno pishipuju keu kümtsü lono I xaphetsü peni.”

²⁵ Tileno Saul no David vilo pi, “Mügha peniu I nu David! No ye akümla jeli kutomo shino tolu nani.” Tishino David ye pa lalo wuve, eno Saul ghi aki lo idewove.