SAMUEL ATUGHIU 25 - Sumi Naga CL (Re-edited) Bible (BSI)

Samuel Kithi

¹ Samuel ye thive, eno Israelmi kümtsü no hekütsüpe pa ghenguno mloqa, eno panongu no Ramah lo pa kilo shiqhove. Tithiu David ye Paran sayeqha lo iqive.

David ngo Abigail

² Maon lo timi lakhi Carmel lo lhidi shiche keu ache. Pa ye ighono kinimi; ambe 3,000 eno ane 1,000 ache. Pa ye Carmel lo ambe mhi tsa ae.

³ Pa je ye Nabal, eno pa nipu je no Abigail. Totimi huye kimchikulumi eno ajukivimi, ikemu akimi ye atsa kümkami eno aye kümthami; pa ye Caleb laghami.

⁴ David no asayeqha lono Nabal ye ambe mhi tsa anipi chilu.

⁵ Ikehu pa no apumi chighi puwu no panoqo vilo pi, “Carmel lo Nabal lau wulo eno I je lono petha pa tsülo.

⁶ Nongu no ishi petha pa tsülo, ‘No, o kibo, eno nono pighi akeu kümtsü lau aloino alo.

⁷ Nono ambe mhi tsa anie pikeu I no chilue. O mbekhemi no ningu gholo akelo ningu ye pano ghüza püamoe, eno panongu no Carmel lo ake tivilo panongu ye kiumu pühamoe.

⁸ Ow timiqo vilo iniju lo, eno panongu no pi nani. Tighenguno Iw apumiqo lau kikimiye piye tsülo, kughengu ningu ye aghulhu ghuloki lono ighi ani. Kimiyeno o u lo kiu kiumu aghi keu pesü o qemi eno o nu David tsülo.’”

⁹ Kughou Davidw timiqo ighi keno, panongu no David je lono hi kümtsü Nabal vilo pive no ngokhea.

¹⁰ Nabal no David qemi khochile, “David ye khuu kea? Jesse nu ye khuu kea? Itodolo aqemi kutomo no pano mpemi launo pokawuve ani.

¹¹ Ni ye I sho, I zü, eno I no ambe mhi kütsami ghenguno heqhi püakeu shi pesü khilau no ighi keno mtha kemi tsüni keshea?”

¹² Ikehu Davidw timiqo no idewo pa vilo hi kümtsü pive.

¹³ David no paw timiqo vilo pi, “Kümtsü no pütüta zütakikihi xipuve lo!” Panongu no pütüta zütakikihi xipuve. David ghi pa zütakikihi xipu luve. Timi aqhe kini no anhemgha ngokheve no pano aqhe bidia no David pape wuve.

¹⁴ Ikemu apumi lakhi no Nabal nipu Abigail vilo pi, “David no yenguyi ke-a lono aghinimi puwu no ni mpeu lau petha tsüpuwu, ikemu pa no panoqo thoghave.

¹⁵ Ikeghi panongu ye ni lau ighono akivi mla eno ni ghüza moe, ningu no aluza lo pano gholo ake tivilo ningu ye kiumu pühamoe.

¹⁶ Nino panongu gholo ngono ambe khe akelo putho pucho panongu no atupikiye toi ni süshoe.

¹⁷ Tighenguno hi ithi no kiu shikepu keno nono kümsü kutoju lo, kughengu I mpeu eno pa kibolomi kümtsü kütsaveni keu thebeivae, eno pa ye ameküküha timi khunomu pa pütsa mlae.”

¹⁸ Tileno Abigail no mtazü ashopa 200, atsaizü ashiyiko hughi kini, ambeshi kutope püakeu pungu, athi küsave keu ashoghi pungu, atsaikipki apho 100, eno mubuthi shopa 200 pesü khurhaqo xapipe.

¹⁹ Eno li no aqemiqo vilo pi, “I züuno kholo; I no nongu pape ighini.” Ikemu li ye li kimi Nabal vilo pimoe.

²⁰ Li no khurha lo ikuve no naghuto qholo chekelo julo, David ngo paw timiqo ye li küdau iqi cheghi eno li no panoqo sholu.

²¹ David no pi ae, “Mtsüqheino asayeqha lo timi hipau no pighi akeu kümtsü adou lono ni ye süsho ae, pa no pighi akeqo lakhimu pühave moe, ikemu pa ye akivi züqhulo alhoksa pesü I tsüchile ani.

²² Tsala thanau paw kiptimi lakhimu qhive aye, Alhou no David ghümi lau shikeu nguno alau I shou shipeni.”

²³ Kughou Abigail no David ithulu keno, li no mtazü wuno khurha lono iqighi püzü David zülo itsaqi ayeghi lo pishiqhove.

²⁴ Li no pa pukhu philo itsaqi no pi, “I mpeu, akipimi I shou likhi beve tsülo. Kimiyeno o qeu pelo o pütsalu pelo, eno o qeu tsa ini tsülo.

²⁵ I mpeu no ameküküha timi, Nabal hipau akhoto shitsü kevilo, kughengu pa ye pa je paphishi Nabal ke, ikehu mbomzü no pa lolo ani. Ikemu ni o qeu ye I mpeu no ow apumiqo puwu keqo ithumlae.

²⁶ Ikehu itehi, Ampeu xü anike eno I mpeu no xüake toi, nono aji peleni ye akeu lono Ampeu no o hakhalu ketoi, itehi o ghümi eno khunoqo o shou alhoksa shiniye phucheni keno tipaqo pelo Nabal toive pelo.

²⁷ Itehi o qeu no I mpeu lau agho süghi akeu pesü ow apumi khunoqo I mpeu pape cheni keno tipaqo tsüni.

²⁸ Kimiyeno o qeu no alughi vecheve keu kipimi qhive tsülo. Ampeu ye mtsüqheino I mpeu küka shiqhetsü nani, kughengu I mpeu ye Ampeu ghüshi shicheni, eno nono xüake tivilo alhoksa ye o lolo ithulumo nani.

²⁹ Tsala timiqo no o haqhi eno o küxü phuniye shi aye, Ampeu o Lhou no tucho ache keu lono I mpeu küxü ye küxümi gholo küqhape qhitsü nani. Eno o ghümi küxü ye Pa no hevüla kighi lono kihive nani.

³⁰ Kughou Ampeu no akivi o ghenguno piqhi püakeu kümtsü shikupu tsüno o pesü Israel sakipheu shiveni keno,

³¹ I mpeu ye ameküha keu ji pele keu momu pa mkhükulu ghenguno akükümsü püna kepu küha nani. Eno kughou Ampeu no tokulu I mpeu tsüni keno, o qeu kümsülu lo.”

³² David no Abigail vilo pi, “Ampeu, Israel Lhou khuu ishi tsala lo o puwu no I sasü kusholupe keno, Pa sheqhelo!

³³ Ishi tsala lo I no I u pesü aji pele no amkhü luniye akeu lono ow xakütha kivi huno I hakhalu ke mügha peniu!

³⁴ Kughengu Israel Lhou xü anike mtsüqheino o ghüzave niye akeu lono Pa no I hakhalue, nono mtazü I sholu moke aye, kuchou no thanau Nabal kilo kiptimi lakhimu püxü moni cheke.”

³⁵ Li no kiu süghi keno David no li u lono luvetsü. Eno li vilo pi, “Aloino o kilo wulo. Julo, I no o tsa luve tsüae, eno nono qhüiniju keu shitsüni.”

³⁶ Abigail no Nabal lau ighi kelo, pa ye aki lo akükau lakhi ghulhu toi sasü aghi. Eno pa ye ighono shomzüve kehu amlo lo aloviqhiyi ae. Ikehu thanau tsütho moke kutolo li ye kiumu pa vilo pimove.

³⁷ Inaqhe kughou Nabal no alotsüve keno, pa nipu no hi kümtsü pa vilo pi, ikelo pa mlo no thive, eno pa ye atu toive.

³⁸ Eno atsala chighi thiu Ampeu no Nabal buve no pa ye thive.

³⁹ Kughou David no Nabal thivae pi chilu keno, pa no pi, “Ampeu khuu Nabal no I thaigha keu mkhü lutsü, eno akumou shiniye akelono Pa qeu hakholu keno, Pa je sheqhelo. Ampeu no Nabal lhoksa pesü pa ampi kütsü lo pukuve tsüae.” Tithiu David no li pesü pa nipu shinike timi puwu no Abigail vilo pi.

⁴⁰ Kughou David qemi no Carmel lo Abigail lau ighi keno, panongu no li vilo pi, “David no o pesü pa nipu shinike o lau ningu puwu ani.”

⁴¹ Li no agi ayeghi lo pishiqho luve no pi, “Julo, o qeliu ye I mpeu qemi pukhu qhutsüni keu qeliu ke.”

⁴² Abigail no mtazü ithu no khurha lo ikuve, li qelimi pungu no li gholono David ghinimi pape wuve no pa nipu shive.

⁴³ David no Jezreelmi Ahinoam ghi luve, eno pama gha pa nipu shive.

⁴⁴ Saul no pa nga Michal, David nipu, pesü Gallim lono ighi kemi Laish nu Palti tsüve.