SAMUEL ATUGHIU 24 - Sumi Naga CL (Re-edited) Bible (BSI)

David no Saul Küxü Pükhalu

¹ Kughou Saul no Philistiami hawu no ideighi keno pa vilo ishi pi, “David ye Engedi sayeqha lo ani.”

² Saul no Israel lo kishekiphemi 3,000 sasü Aghalo Ne Tuqu lo David ngo paw timiqo phuwu.

³ Pa no ambe lojiki vechesü atuki lo ighi, eno tile akulhoqhi niye ilove. David ngo paw timiqo ghi tipa tuki alou ae.

⁴ Davidw timiqo no pa vilo pi, “Ampeu no o vilo, ‘I no o ghümi pesü o u lo sütsü nani, eno nono pulo kümsü aketoi pa lau shilu nani,’ ipi püakeu tsala ye hike.” David no mükhano ipe Saulw chijeboike phishe ghotha luvetsü.

⁵ Ikemu pa no Saulw chijeboike phishe gholuve tsüke ghenguno pa ye amlo pünave.

⁶ Pa no paw timiqo vilo pi, “Pa ye Ampeuw nukikishe kepi ithi apülaghi I no I mpeu shou hitoi I u süqheni keu ye Ampeu msa nolae.”

⁷ Ikehu David no atsa hipaqo pesü paw timiqo pütsa qhive no Saul ghüzani keu azah tsümove. Tithiu Saul no ithughi no atuki qhive püzü pa lalo cheve.

⁸ David ghi atuki lono ipeghive, eno Saul kuno pi, “I mpeu akükau!” Kughou Saul no pa thiu jupuwu keno, David no ayeghi lo pa gi daluve no agigihu tsü.

⁹ Eno Saul vilo pi, “Kushiye o vilo, ‘Julo, David ye o ghüza niye phucheni,’ ipikeu tsa ini cheni kea?

¹⁰ Ishi Ampeu no kishi atuki lo o pesü I u lo sütsü keno o nhethi no ithuluvae. Khami no I vilo o heqhive lopie, ikemu I no o püxüve eno ishi pi, ‘I mpeu shou ni ye I u süqhemoe, kughengu pa ye Ampeuw nukikishe ke.’

¹¹ Julo, I pu, ow chijeboike phishe I u lo ani. I no mtsüqhei o phishe gholuve tsüno o heqhi move keu ye I lolo akipimi momu pishikiqhi kühae pi o pelo ithi eno ithulu peniye ke. Nono I küxü luve tsüniye phucheni kemu ni ye o lau axine shi püamoe.

¹² Ampeu no nikujo dolo xathatsü peniu, Ampeu no o lau I mkhü lutsü peniu, ikemu I u ye o shou süqhemo nani.

¹³ Khaghilo ahole tsa no pike toi, ‘Kixikilami u lono kixikila ipeghi cheni.’ Ikemu I u ye o shou bemo nani.

¹⁴ Israel kükau ye khuu phucheni kea? Khuu hakuqo cheni kea? Atsü kithi keo? Ahi keo?

¹⁵ Tighenguno Ampeu no nikujo dolo xathatsü peni, eno I saphu tsüno o u lono I xaphetsü peni.”

¹⁶ David no atsa hipaqo Saul vilo piqhi khavi, Saul no pi, “I nu David, hi ye o sütsa keshea?” Eno Saul no ighamku qauve.

¹⁷ Pa no David vilo pi, “No ye I nguno amikuchoue, kughengu I no alhoksa pesü o tsü keghi nono akivi pesü I lochilevae.

¹⁸ Eno ishi nono kishi I lau akivi shikeno sheshuvae, Ampeu no I pesü o u lo sütsü keghi no ye I heqhimoe.

¹⁹ Kughengu milakhi no pa ghümi ithulu aye, pa ye ghüza mono puwuve cheni keshea? Ikehu nono kiu I lau shikeno titoi Ampeu no akivi pesü o saxü shitsü peni.

²⁰ I no ithi anike no ye mtsüqheino akükau shi nani, eno Israel kükaqha ye o u lono shiqhe nani.

²¹ Tighenguno no ye I lagha püghamo eno I pu kibo lono I je pühave tsümoe pi Ampeu je lono I lau tushoqhi lo.”

²² David no Saul lau ashoqhi hipau shive. Tithiu Saul ye aki lo wove, ikemu David ngo paw timiqo ye sükusho-a lo iqhove.