SAMUEL ATUGHIU 23 - Sumi Naga CL (Re-edited) Bible (BSI)

David no Keilah Phughi Xalu

¹ Timiqo no David vilo pi, “Philistiami no Keilah sasü aghüshi ani eno athi pekütsü püa keqo püka luvetsü anie.”

² Tighenguno David no Ampeu ighiju, “I no wuno Philistiami hipaqo leni keshea?” Ampeu no David vilo pi, “Wuno Philistiami lelo eno Keilah xalulo.”

³ Ikemu David timiqo no pa vilo pi, “Julo, ningu ye hile Judah lo akeghi msa anike ningu no Keilah lo wuno Philistiami ghüshimi sasü aghü shini keu ye alau akümsapu ke kumo?”

⁴ David no itaghi Ampeu ighiju. Ampeu no khochile, “Ithu no Keilah lo wulo, kughengu I no Philistiami o u lo süvetsü nani.”

⁵ David eno paw timiqo no Keilah lo wuno Philistiami sasü aghüshi, eno panow pichepighi sawove tsüno kütsakungo kije süghitsü. Eno David no Keilah lo küami xaluve.

⁶ Kughou Ahimelek nu Abiathar no Keilah lo David lau poighi keno, pa u lo achinepu phiküzü pesü ighi.

⁷ David ye Keilah lo anie pikeu sütsa Saul tsü. Saul no pi, “Alhou no pa pesü I u lo süve tsüae, kughengu khagho ngo akhadu akeu mishiphu lo iloghi keu ye pa ampi khatha süvae.”

⁸ Saul no timi kümtsü kukütsü no Keilah lo iqi aghü shiwu no David ngo paw timiqo küghaluve niyeshi.

⁹ David ye Saul no pa ghüzani ye kuchughu akeu ithive no achineu Abiathar vilo pi, “Achinepu phiküzü hila süghi lo.”

¹⁰ David no pi, “O Ampeu, Israel Lhou, I ghenguno Saul no Keilah lo ighi no aphughi kütsave niye akeu o qeu no mtsüqheino chiluvae.

¹¹ Ikehu Keilah lo timiqo ye I küghape pa u lo süvetsü nani keshea? O qeu no chilu aketoi Saul ye ighi nani keshea? O Ampeu, Israel Lhou, kimiyeno o qeu vilo pi tsülo.” Ampeu no pi, “Pa ye ighi nani.”

¹² Ikehu David no pi, “Keilah lo timiqo ye ni eno Iw timiqo pesü Saul u lo süvetsü nani keshea?” Ampeu no pi, “Panongu ye o tsüve nani.”

¹³ Ikehu David eno paw timi aqhe tsügho qhalo akeqo no ithu Keilah lono khila wulu keno tilau pove. Kughou David ye Keilah lono povae pi Saul vilo pi keno, pa ye tile wumove.

¹⁴ David ye Ziph sayeqha lo atoghi sükusho-a lo ngove, Saul no tsala kipetsü pa phuche, ikemu Alhou no pa pesü pa u lo süvetsü moe.

Saul no David Hawu

¹⁵ Saul no pa küxü phuche keu David no ithuluve. David ye Ziph sayeqha lo Horesh lo ae.

¹⁶ Saul nu Jonathan no Horesh lo David lau wuno Alhou kumto lono pa shikumto tsü.

¹⁷ Pa no pi, “Msa kevilo, kughengu I pu Saul ye o küghamla nani. Nono Israel kükau shive nani, eno I no o shelo shinani. I pu ghi tipau ithi ani.”

¹⁸ Pama no Ampeu zülo puloshoqhi shi. Eno David ye Horesh lo ngove no Jonathan no aki lo wove.

¹⁹ Ziphmi no Gibeah lo Saul lau ighi no pi, “Horesh lo Hakhilah toghi, khikhi Jeshimon apeu ani keno, tilau David ye sükusho-a lo anike kumo?

²⁰ O akükau, itehi iqighi lo, o kupulo kiqi lono ighilo, pa küghape akükau u lo süve tsüni keu no ningu sajeke.”

²¹ Saul no pi, “Ampeu no nongu kümghatsü peniu, kughengu nongu no I kimiyeqhiyi tsüke.

²² Wulo, eno itaghi thebei julo. Pa pukhu no khile nesü püani keno julo, eno khuu no tile pa ithulu püani keno ithilo, kughengu pa ye ighono mqümgha kepi I no chilue.

²³ Tighenguno aküghütshü-a khipaqo pa no peitha cheni keno kümtsü phuju no thebei keu sütsa pewo I tsülo. Tileno I no nongu gholo wuni. Pa no aghakhu lo aghi aye, I no Judah lagha qhethonhe gholo pa phujuni.”

²⁴ Panongu no Saul züuno Ziph lo wuve. David ngo paw timiqo ye Jeshimon apeu Arabah lo Maon sayeqha lo ae.

²⁵ Saul ngo paw timiqo no pa phuwuni ye wuve. Tipau sütsa David vilo pi, ikehu pa ye atuqu küdau iqive no Maon sayeqha lo ngove. Kughou Saul no tipau chilu keno, pa no Maon sayeqha lo David hawu.

²⁶ Saul no naghuto tüxau wuve, eno David ngo paw timiqo no naghuto halau wuve. David no Saul launo pove niye mighimghai ae. Saul ngo paw timiqo no David ngo paw timiqo küghaluve niye kupunuve kelo,

²⁷ aghinimi lakhi no Saul lau ighi no pi, “Mtazü ighilo, kughengu Philistiami no ayeghi leighi ani.”

²⁸ Ikehu Saul ye David hache keu lono idewove no Philistiami mjochile thuve. Tighenguno tipa-a pesü Pojokulu Tuqu ipi kuvetsü.

²⁹ David ye tileno Engedi sükusho-a lo wuve no tila ngove.