SAMUEL ATUGHIU 22 - Sumi Naga CL (Re-edited) Bible (BSI)

Adullam Tuki lo Ngove

¹ David ye tileno wuve no Adullam tuki lo itshüve. Kughou pa munoqo eno pa pu kibolomi no ti chilu keno, panongu no tilau pa lau wu.

² Aghime kitikhi lo akemi, api kupumi, eno kukhukimji shi akemi kümtsü no pa gholo hekütsü luve. Eno pa no panoqo zatsüu shive. Tile pa gholo timi 400 qhalo ae.

³ David no tileno Moab lo Mizpeh lo wuve. Pa no Moab kükau vilo pi, “Kimiyeno Alhou no kiu I lau shiniye ani keno I no ithi moke kutolo, I pu ngo I za pelo o gholo ngolu pelo.”

⁴ Pa no Moab kükau gholo panoqo qhive, eno David no sükusho-a lo ake kutolo panongu no Moab kükau gholo ae.

⁵ Tithiu tungkupu Gad no David vilo pi, “Sükusho-a lo ngo kevilo; chevelo, eno Judah yeghi lo wuve lo.” Ikehu David no Hereth ghasü lo wuve.

Nob lo Achinemi Pithive

⁶ David ngo pa gholo kichemi ithulue pikeu sütsa Saul no chilu. Saul ye Gibeah lo atope lakhi lo tamarisk sübo qholo angupa pesü ngono pa qemi kümtsü no sühope ae.

⁷ Saul no pa qemi vilo pi, “Inilo, Benjamin timiqo; Jesse nu David no aluza ngo atsailu nongu kümtsü tsülu nanio? Nongu kümtsü pesü qhethonhe eno aqhe zatsüu shitsü nani keshea?

⁸ Eno tighenguno nongu kümtsü no I shou küsüqe ani keshea? Kughou I nu no David sasü puloshoqhi shikeno nongu khumu I vilo pimoe. Khunomu I ghenguno amlo samo, momu ishi tsala lo toi, I nu no I qeu xukutho no I mjochile no I miqe ngokhe akeu I vilo pimoe.”

⁹ Tileno Edommi Doeg no khochile, “David no Nob lo Ahitub nu Ahimelek lau ighi keu I no ithulue,

¹⁰ pa no Ampeu lau pa vehu ghenguno iniju eno achuqupu ngo Goliath zütakikihi ghi pa tsüe.”

¹¹ Tileno akükau no Ahitub nu achineu Ahimelek eno pa pu kibolomi Nob lo achinemi kümtsü akükau lau ighi penike kupuwu.

¹² Saul no pi, “Inilo, Ahitub nu.” Pa no khochile, “I mpeu, ni hile ani.”

¹³ Saul no pa vilo pi, “Kushiye no eno David ye I shou küsüqe ani kea? Nono asho ngo azütakikihi pesü pa tsüno Alhou lau pa vehu ighiju tsü kehu ishi pa ye I hebide ithughi no I miqe ngokhe ani.”

¹⁴ Tile Ahimelek no akükau khochile, “Imaye o qemi dolo khuu no David toi ighono pükhükulu, akükau makishiu, o ghukhemi shou kepten, eno o kibo lo gihuküzümi kea?

¹⁵ Ishi no atüghüu shi ni ye pa ghenguno Alhou vilo ighiju tsü keshea? Moe! Akükau no o qeu shou momu I pu kibolomi khumu nguku tsü kevilo, kughengu o qeu ye hipa vehu kitilamu ithi amoe.”

¹⁶ Akükau no pi, “Ahimelek, no eno o pu kibolomi kümtsü mtsüqheino thive masavae.”

¹⁷ Akükau no aghukheu pa phivilo akeu vilo pi, “Ampeu chinemi pithive lo, kughengu panongu ghi David gholo ani, pa no poche keu ithi pülaghi I vilo pimoe.” Ikemu akükau qemi no Ampeu chinemi shou au süqheni keu shimove.

¹⁸ Tileno akükau no Doeg vilo pi, “Nono achinemi pithive lo.” Doeg no tsüghüwo achinemi ghiqhive, pa no tipa tsalani phepheike phi ephod pepu akemi pano lhotache pungu ghiqhive.

¹⁹ Saul no achinemi mishighüna Nob lo azütakikihi peithave; kiptimi eno totimi, itimi eno anga kughunu, amshitsü, khurha eno ambe kümtsü azütakikihi no pithive.

²⁰ Ikemu Ahitub nu Ahimelek nuli dolo milakhi Abiathar ye pokasü David pape ighive.

²¹ Abiathar no David vilo Saul no Ampeu chinemi pithive tsükeu pi.

²² David no Abiathar vilo pi, “Tipa tsalani kughou Doeg no tile akeno, pa ye mtsüqheino Saul vilo pive nanie pi I no ithiae. O pu kibolomi thive keqo kümtsü I ghenguno ke.

²³ I gholo ngove lo; msa kevilo, kughengu I küxü phuche keu huno o küxü ghi phucheni. No ye I gholono sükusho ithulu nani.”