SAMUEL ATUGHIU 21 - Sumi Naga CL (Re-edited) Bible (BSI)

David eno Akimthe Sho

¹ Tithiu David no Nob lo achineu Ahimelek lau ighi. Ahimelek no msa khokhoshi David sholu niye ighi no pi, “Khumu o gholo chemo no kushiye o likhi kea?”

² David no pa vilo pi, “Akükau no avehu lakhi ghenguno azah I tsüno pi, ‘I no azah o tsüno o puwu akeu vehu khuu pelomu ithipe kevilo.’ Ni ye apumiqo sasü a-a hami lono kushoni ke kughu püani.

³ Tighenguno itehi no ye kiu o u lo ani kea? Asho pungu momu kiu kiumu hile aghi keu I tsülo.”

⁴ Achineu no khochile, “I u loye balha sho kühae, ikemu apumiqo no totimi sasü kitiqe mono aghi aye, akimthe sho ani.”

⁵ David no pi, “I no aghüla wukelo alhokuthu shiche ketoi kuchou no ningu ye totimi launo putosü ani. Avehu tachu lo ghi apumiqo phimpi ye akimthe shicheni aye ishi vehu lou ye tinguno alau akimthe shi anie!”

⁶ Ikehu achineu no akimthe sho pa tsü, kughengu tile kütau sho ye kühano ikhiphepe Ampeu zülo tsüve keu sho likhi ae, ti ye asho külü pewo qhike tsala lo likhino Ampeu zülono ikhipe wuve cheke.

⁷ Tipa tsalani Saul qemi lakhi ye tile Ampeu zülo khathape ae. Pa je ye Doeg, Edommi lakhi. Pa ye Saul mishi khemi atou ke.

⁸ David no Ahimelek vilo pi, “Tishiaye hile o u lo angu momu azütakikihi anima? Kughengu akükau vehu no mighimghai kepu shive kehu ni ye I züta mu I ghünanu mu süghi movae.”

⁹ Achineu no pi, “Philistiami Goliath khuu Elah Khila lono nono heqhive keno, julo, pa zütakikihi ye aphi no küzüpe hile ephod thiu anie. Nono lunishi aye, luve lo, kughengu tikumo aye kütau ye kühae.” David no pi, “Titoi keu kütau kühae; I tsüve lo.”

David no Gath lo Pove

¹⁰ David no tipani no Saul launo pove no Gath kükau Achish lau ighi.

¹¹ Achish qemi no pa vilo pi, “Hi ye David aghakhu lo akükau ke kumo? Panongu no ishi ilhe ale pheke kumo keshea? ‘Saul no qhethonhe heqhilue, ikemu David ye qhethonhe chighi piqi heqhilue’”

¹² Atsa hipaqo no David mlo pünave eno pa ye Gath kükau msave.

¹³ Ikehu pa no pano zülo pa ghilisüqe kilive no küghüzümi toi amqü shi, eno khagho lashe lo inapügha jeli kixi puku no pa mtsazü no akichimhi lo iji iqighipe.

¹⁴ Tile Achish no pa qemi vilo pi, “Julo, timi huye küghüzümie. Kushiye nongu ye I lau pa saghi ani kea?

¹⁵ Ni ye küghüzümi küha sheo kushiye nongu ye timi hipau saghi no I zülono hitoi anipe kea? Pa pelo I kilo iloghi peni keshea?”