SAMUEL ATUGHIU 20 - Sumi Naga CL (Re-edited) Bible (BSI)

Jonathan no David Ghutu

¹ David ye Ramah lo Naioth lono pove eno Jonathan zülo ighi no pi, “Ni ye kiu shive kea? I kipimi kiu ani kea? O pu zülo I xine kiu ani keno pa ye I küxü phucheni kea?”

² Jonathan no pi, “Tishimoe, no ye thimo nani. Julo, I pu ye kitila na kije namu I vilo pimo keloye kiumu shi chemoe. Eno I pu ye kushiye I launo küsüveni kea? Ti ye kumoe.”

³ Ikemu David no itaghi tushoqhi, “Nono I kimiye chekeu o pu no ithi ani, eno pa ye ishi kümsü ani, ‘Jonathan pelo hi ithi pemoni, tikumo aye pa ye amlo ijuve nani.’ Ikemu kuchou no Ampeu xü anike eno no hi xü anike, ni eno akithi dolo küpka lakhi likhi ani.”

⁴ Tile Jonathan no David vilo pi, “Nono kiu kiumu pikeu I no shitsüni.”

⁵ David no pi, “Julo, thoghiu ye aqhi kithe pine eno ni ye akükau gholo aghulhu lakhü lo iqa masa nani. Ikemu I pelo wuve pelo, ni ye aküthüni avela kutolo aluza lo itshüveni.

⁶ Tsala o pu no ni kühave keu ithive aye, ishi pitsü lo, ‘David no pano lagha kümtsü no ampelo ghakishi ani kehu pa ghüna Bethlehem lo wunie pi I qhüiniju azah khu auve.’

⁷ Tsala pa no, ‘Alovae!’ ipi aye o qeu ghenguno akivi, ikemu pa no amloide aye, pa ye I ghüza niye kughuvae pi ithilo.

⁸ Tighenguno, o qeu kimiyeqhiyi tsülo, kughengu nono o qeu sasü Ampeuw puloshoqhi shivae. Ikemu tsala I no pimi aghi aye, nou no I heqhive lo, kughengu kushiye I küghape o pu tsüveni kea?”

⁹ Jonathan no pi, “Khilemu tishimoe! I pu no o ghüza nike kughuve aghi aye, ni ye o vilo pimoni keshea?”

¹⁰ David no khochile, “Tsala o pu no mkamghai o pütsa aye khuu no I vilo pitsüni kea?”

¹¹ Jonathan no pi, “Ighilo, nikujo aluza lo wuni.” Ikehu pama kümtsa aluza lo wuve.

¹² Jonathan no David vilo pi, “Ampeu, Israel Lhou no thopie! Thoghiu momu aghiniu hipa ghuloki lo, I no I pu vilo pi kelo, pa no David lau akivi kümsü aghi aye, ni ye o vilo pi puwu moni keshea?

¹³ Ikemu I pu no o ghüza niye kümsüpu aghi no I no o vilo pimove eno o pelo pojolu pemo aye, Ampeu pelo Jonathan lau hinguno alau shipeniu. Ampeu no I pu gholo acheke toi o gholo apeni.

¹⁴ I no xü aghi aye, Ampeuw iqemokeu kikimiye I piyelo, tishi aye ni ye thimo nani;

¹⁵ eno kughou Ampeu no David ghümiqo ayeghi lono ikhiveni keno, I kibolomi launo pülhapuju ow iqemokeu kikimiye ikhive tsü kevilo.”

¹⁶ Jonathan no David kibolomi sasü puloshoqhi shino pi, “Ampeu no David ghümi shou amkhü lutsü peni.”

¹⁷ Jonathan no David kimiye kehu itaghi pa pelo tushoqhipe, kughengu pa no pa ampi toi David kimiye ke.

¹⁸ Jonathan no pa vilo pi, “Thoghiu ye aqhi kithe pine eno o küghüqa-a ye kümsa shiniae.

¹⁹ Aghiniu kughou atüqhüdo toveni keno no ye mtazü khile itshü ani keno tile iqive no atu no amoqhe püakeu lo ijeluve lo.

²⁰ I no vemijipu lo vepuku aketoi ghuthu küthü apiji kapuwuni.

²¹ I no itimi lakhi puwu no, ‘Wuno apiji julo,’ ipini. Tsala I no pa vilo, ‘Julo, apijiqo ye o küdau anike tipaqo luve lo,’ ipi aye no ye ipeghive lo, kughengu Ampeu xü anike o ghenguno akümsapu kühavae.

²² Ikemu I no apumi vilo, ‘Julo, apijiqo ye o nguno hulau ani,’ ipi aye, cheve lo, kughengu Ampeu no o puwuve anie.

²³ Eno avehu kiu nikujo no küptsave akeno, julo, Ampeu no nikujo dolo pülhapuju ani.”

²⁴ Ikehu David no aluza lo itshü ae. Kughou aqhi kithe pine ighi keno, akükau no aghulhu shiniye iqa.

²⁵ Thosülo toi akükau ye atozü küdau pa lakhü lo iqave. Jonathan no pa ghüngü lo iqa eno Abner no Saul phivilo iqa, ikemu David-a ye kümsa shive.

²⁶ Ikeghi tipani Saul ye kiumu pimove, kughengu pa no kümsü, “Pa lau kiuala shivae. Pa ye mithe movae; mtsüqheino mithe amoe.”

²⁷ Ikemu thoghiu aqhi kithe pine thiu ghi David-a ye kümsa shive. Ikehu Saul no pa nu Jonathan vilo pi, “Kushiye Jesse nu ye ighina ghi ishi ghi aghulhu lo ighimo kea?”

²⁸ Jonathan no khochile, “David ye Bethlehem lo wunike azah tsü peniye I qhüinijue.

²⁹ Pa no pi, ‘Ni lagha ye mishighüna lono aghakishi shiniye ani, eno I munoqo no ighi lopi azah shivae. Ikehu o pulou shi aghi aye, I pelo wuno I munoqo ithulu pelo.’ Hi ghenguno pa ye akükau ghulhu lo ighilu movae.”

³⁰ Saul no Jonathan shou amlo ideve no pa vilo pi, “No sakibideu eno hekibideu nu, o kukujo kumoshi eno o za shipütha ghi nono Jesse nu kishe luve keu ni ye mtha küghashi keshea?

³¹ Kughengu Jesse nu ayeghi lo xüake tivilo no eno o kükaqha shiqhe lumo nani. Tighenguno wuno I lau saghi lo, kughengu pa ye mtsüqheino thimasa nani.”

³² Tile Jonathan no pa pu khochile, “Kushiye pa pithini kea? Pa ye kiu shive kea?”

³³ Ikemu Saul no pa yive niye pa ngu chhepuwo. Eno Jonathan no pa pu ye David pithive niye kughuvae pi ithive.

³⁴ Jonathan no aghulhu lakhü lono axuidesü ithuve no aqhi kithe pine tsala akiniu lo aghulhu shimove, kughengu pa ye David ghenguno amlo ijuve, eno pa pu no pa thaigha ke.

³⁵ Thanau David sasü kughu püake toi Jonathan no pa gholo apumi itimi lakhi sasü aluza lo wu.

³⁶ Pa no apumi vilo pi, “Powu no I no apiji kapuwu keqo julo.” Apumi huno poche kelono pa no apiji lakhi pa nguno hulau kapuwu.

³⁷ Kughou apumi huno Jonathan no apiji kapuwu ke-a lo ighi keno, Jonathan no pa kuno pi, “Apiji ye o nguno hulau anike kumo?”

³⁸ Jonathan no pa kuno pi, “Mtazü lo! Papashi lo! Ngoa kevilo!” Ikehu apumi no apijiqo hekütsü luve no pa mpeu lau ighi.

³⁹ Ikemu apumi huye kiumu ithimoe. Jonathan ngo David pama likhi no avehu ithi ae.

⁴⁰ Jonathan no aghüshi nanu apumi tsüno pi, “Hipaqo pesü mishighüna lo wolo.”

⁴¹ Apumi huno wove kemtsa David no atuqo amoqhe püakeu lono ithughi no ayeghi lo ghuthu küthü itsaqi. Pama lakhino lakhi müma no qae, ikemu David pachi qae.

⁴² Tileno Jonathan no David vilo pi, “Aloino wolo, kughengu nikujo no Ampeu je lono tushoqhi püani, ‘Ampeu no nikujo eno nikujo tikughuko gholo pülhapuju apeniu.’” Tishino David ye wuve eno Jonathan ghi mishighüna lo idewove.