SAMUEL ATUGHIU 2 - Sumi Naga CL (Re-edited) Bible (BSI)

Hannah Kighini

¹ Hannah no akighini shino pi, “I mlo no Ampeu lau alovi ani; I kibo no Ampeu sheqhe ani. I kichi no I ghümiqo junu ani, kughengu I no Ow xakulu lo alovi anie.

² “Khumu Ampeu toi akimthe kühae: kughengu O nguno alau kütami kühae; ningu Lhou toi atuqu khumu kühae.

³ Aqheküza shi atsa pi akevilo, nongu kichi lo akumchho tsa ipeghipe kevilo; kughengu Ampeu ye akighithi Lhou ke, Pa vecheo akümla kümtsü huju cheni.

⁴ Aghütomi shexilikaqo ye hechhevae, ikemu miqemlei keu no akumtou tsügha luvae.

⁵ Khunono chhitoi ache keno asho ghenguno aqe qeuvae, ikemu akhüava shiche keqo no müzüthi movae. Anuhami no anu tsüni punuvae, ikemu khuu no anuli kutomo ache keno li ye ijuvae.

⁶ Ampeu no pithive eno püxü tsü cheni; Pa no Kithigha lo saiqive no saputhu cheni.

⁷ Ampeu no kumlhomi ngo kinimi kughulhotsü cheni; Pa no sünheqhi eno xaqhe cheni.

⁸ Pa no ayeghimkhu lono kumlhomi xaqhe; ayevu lono athokhami sünheqhe panoqo pe sakiphemi gholo iqape no agigihu lakhü ighilupe. Kughengu ayeghi tsükuchoqo ye Ampeuw ke, eno tipaqo shou no Pa no ayeghiqha shiqhe pukue.

⁹ “Pa no Paw pükhükulumi khekuto nani, ikemu kixikilami ye aküzü lono hapupove nani, kughengu timi ye akumto lono tokulu shimo nani.

¹⁰ Ampeu ghümi ye mukhumuno shive nani; Pa no atsütsü lono tsütsüsü panoqo mjo nani. Ampeu no ayeghi shekichi kutolo xaküthau shi nani; Pa no akumto pesü Pa kükau tsü nani eno Pa no nukishelu keu kibo süqhe nani.”

¹¹ Tithiu Elkanah ye Ramah lo pa kilo wove. Eno anu ye achineu Eli zülono Ampeu qeuve.

Eli Nuli Ameküha keqo

¹² Eli nuli pama ye ameküha kemi. Pama ye Ampeu ithi moe.

¹³ Achinemi khuaye ye kughou timi no aghakishi kümllagho tsüni keno, achineu qeu no ashileqhi lho aphi lono shoküba küthü jilisa pesü ighi no,

¹⁴ akhosali, sünizüli, aliqu momu ali lo jisüche. Jilisa no jiphelu keu kümtsü achineu no pa sala qhiveche. Israelmi khunoqo Shiloh lo ighini keno kümtsü lau pama no tishi che.

¹⁵ Tinguno alau, atha piti lumphi lono achineu qeu no ighi no aghakishi tsü akeu timi vilo piche, “Achineu ghenguno ghuchu kepu shileqhi tsülo, kughengu pa ye o launo ashileqhi lhove keu lumo nani ikemu ashi aküxü likhi lunani.”

¹⁶ Tsala timi huno pa vilo, “Panoqo no atha piti luve paghi pelo, tithiu no nono khijehi lunishi ani keno lulo” ipi aye, aqeu no ishi piche, “Moe, no ye itehi no I tsüve masae, tikumo aye I no anguka lono luveni.”

¹⁷ Ikehu achineu pama xine ye Ampeu zülo ighono kije shive, kughengu pama no Ampeu kümllagho küthakügha shi peithake.

¹⁸ Samuel no achinemi phimini pepuve no itimi lakhi shi Ampeu zülo achinemi kümla shiche.

¹⁹ Pa za no ampe atsütsü chijeboike phi aghulo pa ghenguno ghotsü eno kughou li no akimi sasü ampelo ghakishi tsüniye wu keno, pa lau ti süghi che.

²⁰ Tishino Eli no Elkanah ngo pa nipu kümghatsü no piche, “Li no Ampeu vilo khu ketoi, Ampeu no totimi hipau vecheo anuli o tsü peniu.” Tishino panongu ye aki lo ide woveche.

²¹ Kuchou no Ampeu no Hannah xuju ighi no li ye mishiluve eno anu küthü totimi kini punu. Eno anu Samuel ye Ampeu zülo thuwuve.

Eli no Pa Nuli Sakiyi

²² Eli ye ighono muchomi shive eno pa nu pama no Israelmi kümtsü lau kiu shiche eno kuposhukulu phiki kulaghi lo pama no totimi akümla kishimi sasü kishi züche keno chilu che.

²³ Pa no pama vilo pi, “Kushiye nokujo ye hitoi keu kümla shicheni kea? Kughengu timi hi kümtsü launo nokujow küsakügha kümla I no chilu ani.

²⁴ Moe, I nuliqo; I no chilu akeu tsa Ampeuw timiqo no aqha kümtsü veküpha akeu ye akivi kumoe.

²⁵ Tsala milakhi no lakhiu lau axine shive aye, Alhou no pa ghenguno alaki kipiu shitsü cheni, ikemu khuana no Ampeu lau axine shive aye, khuu no pa ghenguno alaki shitsüni kea?” Ikemu pama no apu tsa ini tsümove, kughengu pama shou akithi süghini keu ye Ampeu pulou shiveke.

²⁶ Anu Samuel ye Ampeu zülo eno timi zülo ghi aphimpi kuchopu thuwuve.

Ampeu no Eli Kibolomi Milive

²⁷ Alhouw timi lakhi no Eli lau ighi no pa vilo pi, “Ampeu no ishi piani, ‘Kughou nongu puasüqo no Egypt lo Pharaoh kibolomi qholo ache keno mtsüqheino I no I kutoshino o pu lau ipeghi kekumo keshea?

²⁸ Israelmi shiaye kümtsü dolono I no pa kishe no I chinemi shipe, I kümlla khache lo ighipe, axokütsüngü piti mllape, I zülo achinemi phimini pepupe; eno Israelmi no akipti kümllagho süghi keqo kümtsü I no no kibolomi tsüe.

²⁹ Tishiaye kushiye I ghakishi eno I kümllagho khipaqo I no I chineki ghenguno azah tsü keno tipau thaigha eno Iw timi Israelmi no mlla keu lono ashi leqhi akiviu pe nongu ampi no atha pubeyi luve no I nguno alau o nuliqo gihuve kea?’

³⁰ Tighenguno Ampeu, Israel Lhou no asheshu ani: ‘I no o kibolomi eno o puasüqo kibolomi pelo pülhapuju I zülo ipeilo peniye ashoqhi shike,’ ikemu itehi ye Ampeu no asheshuvae: ‘I launo putosüve lo, kughengu khunono I gihuni keno I no gihu nani, eno khunono I thaighani keno tipaqo thaigha nani.

³¹ Julo, I no o kumto eno o puasü kibolomi kumto ikhive tsüni keu tsala cheni, tishikeu lono o kibo lo kitemi shi xüwo tolu kemi kühave nani.

³² Tishino aghime kitikhi lono nono anheshu Israelmi shou küakini kümghatsü keu ju nani, eno pülhapuju o kibo lo kitemi shi xüwo toluni kemi kühave nani.

³³ Milakhi khuu I no I kümlla khache lono ikhive monani keno pa no amloiju anhezü piji nani, eno o lagha kümtsü ghüyi lono wove nani.

³⁴ Hipau vehu khikhi anu Hophni ngo Phinehas pama lau ikughi niye ani keno ti ye amchipu shi nani: pama gha atsala lakhi lono thive nani.

³⁵ Eno I no I ghenguno pükhükulupu chineu lakhi puthu nani, pa no I mlo lo eno I kükümsü lo kiu ani keno tipau kiqi lono mla nani. I no pa ghenguno aki lakhi shiqhe nani pütsa, eno pa no Iw nukishe luve keu zülo pülhapuju ipe-ilo nani.

³⁶ Eno o kibo lo achili akeqo kümtsü no ighi no ghükayi lakhi momu asho lakhi laju ghi khu no pi nani, “Kimiyeno achinemi kümla-a lakhi lo I qhitsü lo, ni ghi asho tachu lakhi likhimu chulu kepu shipelo.”’”