SAMUEL ATUGHIU 19 - Sumi Naga CL (Re-edited) Bible (BSI)

Saul no David Pithi niye shi

¹ Saul no pa nu Jonathan eno pa qemi kümtsü vilo panongu ye David pithive masae pi. Ikemu pa nu Jonathan no David lau shishe alokiqi shiche.

² Jonathan no David vilo pi, “I pu no o pithive niye ani. Tighenguno thanau inaqhe o jukuto luve lo. Tuqhou-a lakhi lo itshü luve lo.

³ I no wuno aluza khile nono ani keno tilehi I pu phivilo ngono pa vilo o ghili pini. Tsala I no kiuala ithilu aye o vilo pini.”

⁴ Jonathan no David ghili kivi küsaje eno pa pu vilo pi, “Akükau pelo pa qeu David shou axine shi penishi amoe, kughengu pa ye o shou axine shi püamo, eno pa kümla no o lau akivi süghi püanie.

⁵ Kughengu pa no aküxü tsüno Goliath heqhive, eno Ampeu no Israelmi kümtsü ghenguno xakulu kümla kije shitsüe. No ghi tipau ithulu no alovive. Imaye kushiye no ye David heqhive no akipimi küha kemi ji peleni kea?”

⁶ Saul no Jonathan tsa ini, eno pa no ashoqhi shi, “Ampeu xü anike, David pithi moae.”

⁷ Jonathan no David kuno hi kümtsü pa vilo pi. Jonathan no David sasü Saul lau ighi, eno pa ye azüu toi pa gholo ngouve.

⁸ Itaghi aghü shiuve. David no wuno Philistiami küpüghü eno akumto kije lono panoqo theqhive, eno panongu ye azüu toi pokhave.

⁹ Tithiu Saul no pa kilo angupa pesü ngo akelo Ampeu launo aghawu lhoksa Saul shou ikughi. David no aheo küigha ae.

¹⁰ Saul no angupa pesü atozü lo David chheda niye shi kemu pa no Saul launo tsüghüve, eno angupa ye atozü lo chhe pukuve. David ye tipaji ghi pojo luve.

¹¹ Saul no David kilo aghinimi puwu no miqeju pe, eno thanau no pa pithive niye shi. Ikemu David nipu Michal no pa vilo pi, “Nono itiji no itshüvemo aye, thanau ye pithive niae.”

¹² Ikehu Michal no alashe lono David pupove, eno pa ye pokasü wuve.

¹³ Michal no ajulho lakhi ikhipe alüpa lo püzüve no anemhi kütsü kümkhü pesü akütsü mlatsü eno akuuphi no khonhave.

¹⁴ Kughou Saul no David kügha niye aghinimi puwu keno, li no pi, “Pa ye sü ani.”

¹⁵ Saul no David ju penike aghinimi puwu no pi, “Alüpa lono pa kuhope I lau ighilo, I no pa pithiveni.”

¹⁶ Kughou aghinimi no ighi keno, julo, anemhi kütsü kümkhü no akütsü shino alüpa lo ajulho püzü püaghi.

¹⁷ Saul no Michal vilo pi, “No ye kushiye I pishiqhive no I ghümi pelo povepe kea?” Michal no Saul khochile, “Pa no I vilo pike, ‘I no poveni, kushiye ni ye o heqhiveni kea?’”

¹⁸ David ye pove no itshüuve, eno pa no Ramah lo Samuel lau ighi no pa vilo Saul no pa lau kiu shikeno pi. Samuel ngo pama Naioth lo wuno tilau ngove.

¹⁹ Ikemu asütsa hipau Saul tove, “Julo, David ye Ramah lo Naioth lo ngo ani.”

²⁰ Ikehu Saul no David saghi peniye aghinimi puwu. Ikemu kughou panongu no tungkupmi loji tungkuptsa pi eno Samuel no panoqo mpeu shi aghi keu ithulu keno, Alhou Ghungu no Saul ghinimi shou ikughive, eno panongu ghi tungkuptsa piuve.

²¹ Kughou hipau ghili Saul vilo pi keno, pa no aghinimi kütami puwu, eno panoqo ghi tungkuptsa piuve.

²² Ikehu pa ampi no Ramah lo wuno azükikhe kije akeu Secu lo ighi. Pa no ighiju, “Samuel ngo David pama khile ani kea?” Timi lakhi no pi, “Pama ye Ramah lo Naioth lo ani.”

²³ Pa no Ramah lo Naioth lo ighi. Ikelo Alhou Ghungu no pa shou ghi ikughive no pa no Ramah lo Naioth tomoke kutolo tungkuptsa piuve.

²⁴ Pa ghi pa phimini xave no Samuel zülo tungkuptsa pi, eno putho pucho aphimini pepumo no ngove. Ikehu ishi picheni, “Saul ghi tungkupmi gholo lakhi keshea?”