SAMUEL ATUGHIU 18 - Sumi Naga CL (Re-edited) Bible (BSI)

David ngo Jonathan Aposhuu

¹ David no Saul pütsa tave kemtsa Jonathan mlo no David sasü lakhi shiluve, Jonathan no pa ampi kimiye aketoi David kimiyeve.

² Tipani no Saul no David pa gholo qhiluve no aki lo puwo move.

³ Jonathan no David sasü puloshoqhi shi, kughengu pa no pa ampi kimiye aketoi David kimiyeve.

⁴ Jonathan no pa philo pepu akeu kuuphi xape David tsüve, eno pa ghünanu, azütakikihi, shexilika, eno apokha ghi pesü tsüve.

⁵ David ye Saul no khile pa puwu keno tokulu shi, ikehu Saul no pa pesü ghüshimi shou atou shive. Eno hi ye timiqo eno Saul qemi zülo akivi shilue.

Saul no David Ju Anheshu

⁶ Kughou David no Goliath heqhive no idewo chekeno, Israel lo mishighüna kümtsü lono totimi no alephe eno ilhesü akükau Saul saluni ye ighi. Panongu no amqübo ngo akighilebo jeli pesü alokivi le phesü ighi.

⁷ Totimiqo no alokivi shi lakhino lakhi lau ishi ale phe, “Saul no qhethonhe heqhilu, ikemu David ye qhethonhe chighi piqi heqhilue.”

⁸ Hipa tsa no Saul loshipüsüve no pa ye ighono amloideve, eno pi, “David jelo 10,000 piqi piani, ikemu I je loye 1,000 piani, itehi pa no ithuluni keu ye kükaqha kepi ani keo?”

⁹ Tipani no huthusü Saul no David miqe thuve.

¹⁰ Thoghiu Alhou launo aghawu lhoksa no Saul shou ikughive no pa ye pa kilo atsa pi küghüzü ae, eno David no tsala kipetsü shiche ketoi aheo küigha ae. Saul no pa u lo angupa pesü ngoa.

¹¹ “I no atozü lo David chhedaveni,” ipi pa no kümsü no angu chhepuwu kemu David no ghuthu kini kutolo tsüghüve.

¹² Saul ye David msave kughengu Ampeu no pa qhive no David gholo auveke.

¹³ Ikehu Saul no pa zülono pa ikhive no qhethonhe zatsüu shivepe. David no timiqo sasü aghüshi lo wu.

¹⁴ Eno pa no shikeu kümtsü lo tokulu shilu, kughengu Ampeu no pa gholo ake.

¹⁵ Kughou pa no tokulu kije shikeu Saul no ithulu keno, pa ye alau msaighüve.

¹⁶ Ikemu Israel ngo Judah kümtsü no David kimiyeve, kughengu pa no panongu züu shino saphe ke.

David no Michal sasü Külave

¹⁷ Tithiu Saul no David vilo pi, “I nga akichiu Merab hile ani. I no li pesü o nipu shi penike o tsüni. I ghenguno amlo kumto shino Ampeu ghüshi shilo.” Kughengu Saul no ishi kümsü, “Pa shou I u süqhe moni, ikemu Philistiami u no pa shou ikughi peni.”

¹⁸ David no Saul vilo pi, “Ni ye khuue pi, eno I lagha I pu kibolomi ye khuu keno akükau makishiu shiluni kea?”

¹⁹ Ikemu kughou Merab pesü David tsükepu do tove keno, li ye Meholathmi Adriel nipu shi penike tsüve.

²⁰ Saul nga Michal no David kimiyeve. Eno Saul vilo pi kelo pa mloqilu.

²¹ Saul no kümsü, “I no li pesü pa tsüveni, tishino li pelo pa lichhe shipe no Philistiami no heqhive peni.” Tighenguno, Saul no akiniu ghi David vilo pi, “Itehi no ye I makishiu shiniae.”

²² Saul no pa qemi azah tsü, “Lomoshi David pütsa no pilo, ‘Julo, akükau ye o lau amlo qiqhiyi ani, eno pa qemi kümtsü no o kimiye ani. Ikehu akükau makishiu shilo.’”

²³ Saul qemi no atsa hipaqo David kini lo pisütsü. Eno David no pi, “Ni ye kumlhomi eno ajuaje küha ke akükau makishiu shini keu ye aghulo vehu küghashi ani keshea?”

²⁴ Panongu no Saul vilo, “David ye tishi piae,” ipive.

²⁵ Tile Saul no pi, “David vilo ishi pilo, ‘Akükau ye pa ghümi Philistiami lau amkhü luni kehu pano phighüyiko aqhe piqi kumo aye o launo ameh kiumu avehupu shiamoe.’” Saul ye David pelo Philistiami u lono ikiqive penishi ae.

²⁶ Kughou pa qemi no David vilo atsa hipaqo pi keno, David ye akükau makishiu shinike pulove. Kihiküthado veche mphi lono

²⁷ David no pa gholo timiqo sasü wuno Philistiami aqhe kini pithive. Eno akükau makishiu shiniye panoqo phighüyiko akikihi kiqi lono kupukülai akükau lau süghitsü. Saul no pa nga Michal pesü pa nipu shi penike tsüve.

²⁸ Ikemu kughou Saul no Ampeu ye David gholo ani, eno Michal ye pa kimiyevae pi ithulu eno ithive keno,

²⁹ pa ye itaghi alau David msave. Ikehu pa ye alhokuthu David ghümi shi acheuve.

³⁰ Tithiu Philistiami zatsümi no aghü shinike ashou ipeghi, ikemu panongu no khije ashou ipeghi keno David no Saul qemi nguno alau itaghi tokulu shilu, tishikeu lono pa ye shishe agigihu ithulu.