SAMUEL ATUGHIU 16 - Sumi Naga CL (Re-edited) Bible (BSI)

David Nukishepe Akükau Shi

¹ Ampeu no Samuel vilo pi, “Israel shou akükau shipemo niye I no Saul milive ake no ye khitohi pa ghenguno amlo ijuni kea? O kibo lo thazü lesüpe wulo. Bethlehemmi Jesse lau I no o puwuni, kughengu I no pa nuli dolo lakhi pesü akükau shipenike kutope qhivae.”

² Samuel no pi, “Ni ye kishino wuni kea? Saul no chiluve aye, I heqhive nani.” Ampeu no pi, “Amshiti lakhi o gholo pewu no pilo, ‘Ni ye Ampeu lau aghakishi tsüniye ighi ani.’

³ Aghakishi lo Jesse kusü lo, eno nono kiu shikepu keno I no o piyeni. I no khuu o lau shuphe tsüni keno nono I ghenguno pa nukisheni.”

⁴ Ampeu no azah tsüke toi Samuel no tishi nike Bethlehem lo ighi. Mishiphu tipau lo layemi no pa sasü kushoni ye msa khokhoshi ighi no pi, “No ye külakishi lono ighi anima?”

⁵ Pa no pi, “Külakishi lono Ampeu lau aghakishi tsüniye ighi ani. Nongu ampi kishekimthe lo, eno I gholo aghakishi lo ighilo.” Pa no Jesse ngo pa nuliqo kishekimthe no aghakishi lo kusü.

⁶ Kughou panongu no ighi keno Samuel no Eliab juno kümsüve, “Mtsüqheino Ampeu no nukishe luve keu ye hile Pa zülo anie.”

⁷ Ikemu Ampeu no Samuel vilo pi, “Pa ju akoghe momu pa thethu ju kevilo, Ni ye pa milivae. Kughengu Ampeu ye timi no ithulu aketoi ju chemoe: timi ye ashou aju akoghe jucheni ikemu Ampeu ye amlo jucheni.”

⁸ Jesse no Abinadab kuno Samuel lau wupe. Pa no pi, “Ampeu ye hipau mu kishe püamoe.”

⁹ Tithiu Jesse no Shammah pelo ighipe. Eno pa no pi, “Ampeu ye hipau mu kishe püamoe.”

¹⁰ Jesse no pa nu tsüni pelo Samuel lau wupe kemu Samuel no pi, “Ampeu ye panongu kishe püamoe.”

¹¹ Tile Samuel no Jesse vilo pi, “O nuli kümtsü hile anima?” Eno pa no pi, “Anipau aphi, ikemu pa ye ambe khe ani.” Samuel no Jesse vilo pi, “Pa kupuwu no saghilo, kughengu pa no hile ighi moke kutolo ningu ye iqamo no aghini.”

¹² Jesse no pa kupuwu no saghi. Pa ye agi hughüi, anhethi no jukivi, eno ahi kivi. Tile Ampeu no pi, “Ithu no pa nukishe lo, kughengu pi akeu ye hike.”

¹³ Ikehu Samuel no pa kibo lono thazü ikhiphe no amunoqo küa lono pa nukisheve. Tileno Ampeu Ghungu no tipa tsala lono David shou ikughive. Tishino Samuel ye Ramah lo idewove.

David ye Saul Kümla lo Süsüve

¹⁴ Ampeu Ghungu ye Saul launo wuve, eno Pa launo aghawu lhoksa no pa shikughuju thuve.

¹⁵ Saul qemi no pa vilo pi, “Alhou launo aghawu lhoksa no o shikughuju ani.

¹⁶ Ni mpeu no pa qemi hile pa zülo akeqo azah tsüno timi lakhi aheo pekithimi phuwu pelo, kughou Alhou launo aghawu lhoksa o shou ikughini keno, pa no ti küigha kelo no ye alove nani.”

¹⁷ Ikehu Saul no pa qemi vilo pi, “Khuu no akivishi küighathi ani keno phusawo I lau saghilo.”

¹⁸ Apumi lakhi no khochile, “Julo, Bethlehemmi Jesse nu lakhi khuu akivishi küigha ithi ani keno I no ithulu püani, pa ye amlo kumtomi, aghütomi, atsapi lo lotsü-loghü, aghili aye kivimi, eno Ampeu no pa gholo ani.”

¹⁹ Tighenguno Saul no pa ghinimi Jesse lau puwu no pi, “O nu David, khuu ambe khe ani keno I lau puwulo.”

²⁰ Jesse no khurha lakhi lo asho, ashiyiko hughi lo atsaiji süno ane alhothe lakhi ishi xapipe no pa nu David gholono Saul lau tsüpuwu.

²¹ David no Saul lau ighi no pa kümla lo ilove. Saul no ighono David kimiyeve, eno pa pesü pa ghünanu kupuu shive.

²² Saul no Jesse lau puwu no pi, “David pelo I kümla lo apelo, kughengu pa ye I mlo chuluvae.”

²³ Kughou Alhou launo aghawu lhoksa Saul shou ikughi keno, David no aheo ikhipe pa u lono küigha. Tishiaye Saul ye aghüthi püxü luve no akivi shiveche eno aghawu lhoksa ye pa launo wuveche.