SAMUEL ATUGHIU 14 - Sumi Naga CL (Re-edited) Bible (BSI)

Jonathan no Philistiami Leluve

¹ Ghulo lakhi Saul nu Jonathan no apumi lakhi pa ghünanu kupuu vilo pi, “Ighilo, nikujo hukukuu Philistiami mqo-a lo wuni.” Ikemu pa ye pa pu vilo pimove.

² Saul ye Gibeah lono kushuo kumo lo Migron lo khaghatu tuki lo ngoae. Timi 600 toike pa gholo ae,

³ panoqo gholo Shiloh lo Ampeu chineu Eli nu, Phinehas nu, Ahitub nu, Ichabod thiküzüu Ahijah ye achinemi phimini pepuve no ngo ae. Ikemu timiqo ye Jonathan no wuve keu ithimoe.

⁴ Jonathan no kakütha la khipau vechesü Philistiami mqo lo wuniye shikeno tilau ye hula-hila atu nhepho shiae. Anhepho lakhi je no Bozez eno lakhiu je no Seneh.

⁵ Anhepho lakhi no ahuu Michmash zülo eno lakhiu no apeu Geba zülo ae.

⁶ Jonathan no apumi pa ghünanu kupuu vilo pi, “Ighilo, nikujo aphighüyiko ghamo kemi lau ikuni. Ampeu no nikujo ghenguno akümla shitsü peni, kughengu Ampeu no xaluni keu ye kutomo vecheo shi aghina aghulo vecheo shi aghi namu lakha chile mlae.”

⁷ Pa ghünanu kupuu no pa vilo pi, “O mlo lo kiu ani keno kümtsü shilo. Nono pulo akeu shilo, I mlo eno I ngulho ye o gholo ani.”

⁸ Tile Jonathan no pi, “Nikujo no katha ikuno panongu zülo ipeghi piyeni.

⁹ Tsala panongu no nikujo vilo, ‘Nino tilau ighi moke kutolo ngo aghilo,’ ipi aye nikujo no ngove no pano-a lo iku moveni.

¹⁰ Ikemu panongu no, ‘Ningu lau ikughi lo,’ ipi aye, nikujo no ikuni kughengu ti ye Ampeu no panoqo pesü nikujo u lo süve tsüake. Ikehu hipau no nikujo michipu shini.”

¹¹ Pama no Philistiami mqo zülo ipeghi. Eno Philistiami no pi, “Julo, Hebrewmi acheku khile panongu no itshü akeno tileno ipeghi ani.”

¹² Panongu no Jonathan eno pa ghünanu kupuu vilo pi, “Ningu lau ikughi lo eno nino thime lakhi piyeni.” Jonathan no pa ghünanu kupuu vilo pi, “I pape ikughi lo, kughengu Ampeu no panoqo pesü Israelmi u lo süve tsüae.”

¹³ Jonathan no pa u eno pa pukhu no mugho iku, pa ghünanu kupuu no pa pape iku eno Philistiami ye pama zülo ikiqive.

¹⁴ Pama no ghiqhi khavi lono aluche lakhi toike lono timi muku qhalo ghiqhive tsü.

¹⁵ Tile kichimamai keu no aghazü lo, aluza lo, eno timiqo gholo ighive. Ghüshimi mqo eno akilemi ghi thüthüshi, ayeghi no ithauve, eno tino shishe kichimamaive.

¹⁶ Benjamin yeghi Gibeah lo Saul khemi no pishipuwo jukelo aqokitikhi no küsakiphi hula hila pocheghi.

¹⁷ Saul no pa gholo akeqo vilo pi, “Khuu no ni gholo kühave akeno kihiju lo.” Kughou panongu no kihiju keno, Jonathan ngo pa ghünanu kupuu pama tile aghi move.

¹⁸ Ikehu Saul no Ahijah vilo pi, “Alhouw puloshoqhi bohu hile süghilo.” Kughengu tipa ghuloki lo puloshoqhi bohu ye Israelmi gholo ake.

¹⁹ Saul no achineu pütsa akelo Philistiami ghazü lo mbumghu keu alau-alau shive. Ikehu Saul no achineu vilo pi, “O u süchile luvelo.”

²⁰ Tishino Saul ngo pa gholo akemi kümtsü no aghüshiqa lo wuve. Ikelo Philistiami ye pano dolo azütakikihi no ghiqhikile aghive eno tile shishe kübangü aghi.

²¹ Hipa züu Hebrewmi khunoqo Philistiami gholo ache eno panoqo ghazü lo wuve keno, panongu ghi Israelmi Saul ngo Jonathan pama gholo akemi lau ideighive.

²² Titoi Israelmi khunoqo Ephraim ato yeghi lo itshüuve keno panongu no Philistiami ye pokha ayae pi chilu kelo akumtoshi aghüshi lo panongu papewu.

²³ Ikehu tipa tsalani Ampeu no Israelmi xalue. Eno Beth-aven ghi vechesü aghüshie.

Saul no Lolhülo Tushoqhi

²⁴ Israelmi ye tipa tsalani shishe akulho shive, ikehu Saul no timiqo lau ashoqhi shino pi, “Timi khuu no avela shimphi züuno eno I ghümi shou amkhü lumphi züuno achuqupu chuveni keno angusüpue.” Ikehu khunomu achuqupu miche move.

²⁵ Kughou timi kümtsü no aghasa lo ighive keno, julo, akhingozü ayeghi lo aghi.

²⁶ Kughou timiqo no aghasa lo ighi keno, julo, akhingozü ijiqi aghi, ikemu khunomu au no chope akichi lo sümoe, kughengu timiqo ye ashoqhi msa ae.

²⁷ Ikemu Jonathan ye papu no ashoqhi pesü timiqo ghasü püakeu ithi mono akehu pa no aküsü pa u lo peche keu kekümtsü no akhibo lo chosü no mineve, eno pa nhethi ye vüipeghi kitheve.

²⁸ Tileno timi lakhi no pi, “O pu no mtütüi ashoqhi timiqo lau shino pi, ‘Ishi tsala lo khuu no achuqupu chuveni keno ahasapue.’ Ikehu timiqo ye lhovae.”

²⁹ Jonathan no pi, “I pu no aghakhu pünaqhivae. I no akhingozü hipau kitila miche kelono I nhethi ye kishi vü ipeghive akeno julo.

³⁰ Tishiaye ishi tsala lo timiqo no pano ghümi launo hakholu keu chuqupu ililai chuluke aye kishita akiviu shiniche kelae. Kughengu itehi Philistiami theqhilu keu ye kiumu kije kumo toivae.”

³¹ Tipa tsalani panongu no Michmash lono Aijalon kutolo Philistiami ghiqhive tsü. Eno timiqo ye ighono akulho shive.

³² Timiqo no hakhokulu thime kishi, eno ambe, amshitsü eno amshiti ghiqhi no aji pusüsü ashi chuve.

³³ Panongu no Saul vilo pi, “Julo, timiqo ye aji gholono ashi chuno Ampeu shou axine shivae.” Pa no pi, “Nongu ye pishikiqhi shivae, atuqu kije hile kulu saghi lo.”

³⁴ Saul no pi, “Timiqo dolo vesayi ngove lo eno panoqo vilo pilo, ‘Timi kümtsü no amishi ngo ambe hile saghi no ghiqhipe chulo, ikemu aji gholono chuno Ampeu shou axine shi kevilo.’” Ikehu tipa ji timi kümtsü no pütüta mishitsü saghi no tileno ghiqhi.

³⁵ Saul no akümlla-khache Ampeu lau shiqhe; ti ye pa no Ampeu lau akümlla-khache shiqhe keu atüghüu ke.

³⁶ Saul no pi, “Ningu Philistiami hasü wuno putho lono inaqhe küvü ipeghi moke kutolo panongu leni nolo; panongu dolo timi lakhimu ghümoni.” Panongu no pi, “Kiu no o ghenguno akiviu keno tishilo.” Ikemu achineu no pi, “Ningu hile Alhou zülo kupunu wuni nolo.”

³⁷ Saul no Alhou vilo ighiju, “Ni ye Philistiami hawu kepu kemo kea? No ye panongu pesü Israelmi u lo süvetsü nani kema?” Ikemu tipa tsalani Pa ye khochile move.

³⁸ Saul no pi, “Nongu sakiphemi kümtsü hilau ighilo, eno ishi hipau xine kishi ipeghive akeno ithilo.

³⁹ Kughengu Ampeu khuu Israel xalu cheni keno, Pa xü anike, I nu Jonathan no shi aghimu, pa ye mtsüqheino thini.” Ikemu khunomu pa khochile moe.

⁴⁰ Tile pa no Israelmi kümtsü vilo pi, “Nongu no huküdau ngoni eno I nu Jonathan nikujo no hiküdau ngoni.” Timiqo no Saul vilo pi, “Kiu no o ghenguno akiviu keno shilo.”

⁴¹ Tighenguno Saul no pi, “O Ampeu Israel Lhou, No ye kushiye ishi o qeu khochile move akea? Tsala hipau kipimi no I shou momu I nu Jonathan shou aghi aye, O Ampeu, Israel Lhou, Urim tsülo. Ikemu hipau kipimi no Ow timi Israel shou aghi aye, Thummim tsülo.” Eno asaqhi kelo Jonathan ngo Saul pama je ikhiluve no timiqo ye pojo luve.

⁴² Saul no pi, “I nu Jonathan nikujo dolo asaqhi lo.” Ikelo Jonathan ikhiluve.

⁴³ Tile Saul no Jonathan vilo pi, “No ye kiu shive akeno I vilo pilo.” Jonathan no pa vilo pi, “I no I u lo peche keu küsü kekümtsü chosü no akhingozü kitila micheve ke. Ni hi ani. Ni ye thive masae.”

⁴⁴ Saul no pi, “Alhou no titoi I lau eno alau ghi shipelo; Jonathan, no ye mtsüqheino thiniae.”

⁴⁵ Timiqo no Saul vilo pi, “Jonathan vecheo Israel lo xakulu kije süghi keghi pa pithiveni keshea? Tishi mlae! Ampeu xü anike, pa kütsü lo asa lothi lakhimu ayeghi lo ikiqimo nani, kughengu ishi pa ye Alhou gholono akümla shivae.” Ikehu timiqo no Jonathan xaphe luve, eno pa pithi move.

⁴⁶ Tithiu Saul ye Philistiami hawu move eno Philistiami ghi pano-a lo idewove.

Saul no Israel Ghümi Küpüghü

⁴⁷ Kughou Saul no Israelmi shou aküka ikhiluve keno, pa no aqha kümtsü lo pa ghümi Moabmi, Ammonmi, Edommi, Zobah kükami, eno Philistiami sasü küpüghü. Pa no khile wu keno tipaqo shou tolue.

⁴⁸ Pa no akumtoshi Amalekmi theqhi luve, eno khunono pano pükaqhi chekeno tipaqo u lono Israel xaphelu.

⁴⁹ Hipaqo no Saul nuli, Jonathan, Ishvi, eno Malkhi-shua. Pa nga akichiu no Merab, eno ayitiu no Michal.

⁵⁰ Saul nipu je ye Ahinoam, li ye Ahimaaz nga. Paw ghüshimi zatsüu je no Abner, pa ye Ner nu, Saul papu pamu nu.

⁵¹ Kish no Saul papu, eno Abner papu Ner ye Abiel nuke.

⁵² Saul küxü tivilo Philistiami sasü akumtoshi aghü shiche. Saul no akumtomi khukhumu ithulu aye, pa gholo qhive che.