SAMUEL ATUGHIU 13 - Sumi Naga CL (Re-edited) Bible (BSI)

Philistiami sasü Küpüghü

¹ Saul ye apunu mpe shighi shi akelono akükau shilu; eno pa ye ampe lhobidi kini Israel shou ayepe.

² Saul no Israelmi 3,000 kishephe. 2,000 no Michmash eno Bethel ato yeghi lo Saul gholo ngoa, eno 1,000 no Benjamin yeghi Gibeah lo Jonathan gholo ae. Pa no timi kütami kümtsü pütüta kilo puwove.

³ Jonathan no Geba lo Philistiami mqo theqhive, eno Philistiami no chiluve. Saul no Israel yeghi kümtsü lo afuko küigha no pi, “Hebrewmi pelo chilu pelo.”

⁴ Israelmi kümtsü no ti chilu no Saul no Philistiami mqo theqhivae pi, eno itaghi Israel ye Philistiami xukutho puthuvae pi ithive. Timi kümtsü no Saul gholo küqha penike Gilgal lo kukütsü.

⁵ Philistiami no Israel sasü aghü shinike kuloqu luve, khurkulu 30,000 eno khurshimi ngo ghüshimi loji 6,000 no azüghi mkülo asaye toi ngove. Panongu no ighi no Michmash lono Beth-aven kipelau kutolo aghazü shipe ngove.

⁶ Kughou Israelmi no panongu ye aküpüna lo ilove akepi ithi keno (kughengu aghümi no mkamihi ighive ke), timiqo no atuki, akuthoku, akighipe, akumoki, eno azü tughuko lo itshü khave,

⁷ eno Hebrewmi khami ye Jordan kathasü Gad eno Gilead yeghi lo wuve. Saul ye Gilgal lo ae, eno kümtsü no khokhoshi pa pape.

Saulw Hekibide Ghakishi

⁸ Samuel no ado kihipe qhitsü ketoi, Saul no atsala tsüni ngokhe. Ikemu Samuel no Gilgal lo ighi move no timiqo ye pa launo apanaghave.

⁹ Ikehu Saul no pi, “Akipti kümllagho ngo külakishi kümllagho I lau süghilo.” Eno pa no akipti kümllagho tsüve.

¹⁰ Pa no akipti kümllagho tsüve kemtsa Samuel no ighi. Eno Saul no pa kusholu no petha shiniye wu.

¹¹ Samuel no pi, “No ye kiu shive akea?” Saul no pi, “Kughou timiqo no I launo apanaghave, nono kihitha tsükeu tsala lo ighi move, eno Philistiami no Michmash lo hekütsü luve keno,

¹² I no pi, ‘Philistiami no Gilgal lo I leniye ani eno ni ye Ampeu lopu shimphi.’ Ikehu I no anguka no akipti kümllagho tsüve.”

¹³ Samuel no Saul vilo pi, “No ye mbomzü kümla shivae. No ye Ampeu o Lhou no azah o tsükeu pemovae. Kughengu Ampeu ye alholo o kükaqha pesü Israel kümtsü shou iqhikumto tsüniye ake.

¹⁴ Ikemu itehi o kükaqha ye pekibe womae. Ampeu ye Pa mlo kuchuu timi lakhi phuluvae, eno Paw timi sakipheu shi penike Ampeu no azah pa tsüvae, kughengu Ampeu no azah kiu o tsü keno nono pape movae.”

¹⁵ Eno Samuel ye Gilgal lono wuve. Timi kütami no ghüshimi sasü kushoni ye Saul pape wuve; panongu no Gilgal lono Benjamin yeghi Gibeah lo wuve. Saul no timi pa gholo akeqo kihiju kelo 6,000 qhalo ae.

¹⁶ Saul ngo pa nu Jonathan eno timi pa gholo akeqo ye Benjamin yeghi Gibeah lo ngove, ikemu Philistiami ye Michmash lo aghazü shiae.

¹⁷ Philistiami ghazü lono zülekilemi aloji küthü shino ighi. Aloji lakhi no Ophrah küdau Shual yeghi lo wuve;

¹⁸ lakhi no Beth-horon küdau; eno lakhi no asayeqha küdau Zeboim Khila ithulu chekeu lughi küdau wuve.

¹⁹ Israel yeghi kümtsü lo ayi kiyiqimi lakhimu kühano ache, kughengu Philistiami no pi, “Hebrewmi no pano sala azütakikihi ngo angu mlaluve nosae.”

²⁰ Ikemu Israelmi kümtsü no panow akhuwo, akuphu, amüghü, eno ayevü chighi nike Philistia lo wuche,

²¹ eno akhuwo ngo akuphu chighikeu me ye ghükayi muno kini, amüghü ngo ayikhumu no ghükayi muno lakhi luche.

²² Ikehu aghüshi tsala lo Saul ngo Jonathan gholo akemi dolo timi khuu u lomu azütakikihi eno angu aghi move, ikemu Saul ngo Jonathan pama ye ae.

²³ Philistiami mqo no Michmash katha wuniye ighi.