SAMUEL ATUGHIU 12 - Sumi Naga CL (Re-edited) Bible (BSI)

Samuel Kikini Tsa

¹ Samuel no Israelmi kümtsü vilo pi, “Julo, nongu no I vilo pikeu tsa kümtsü I no agholuve tsüae eno akükau nongu shou qhive tsüae.

² Itehi ye akükau no nongu züu checheni, eno ni ye kitemi shive no asa mpavae; eno I nuli ye nongu gholo ani. I lhothe ghuloki lono ishi tsala kutolo I no nongu züu shino ighivae.

³ Ni ye hile ani; Ampeu zülo eno Paw nukikishe zülo I lachile kepu aghi aye thopi shijulo. Khuu mishitsü momu khurha I no luvetsü kea? I no khuu pishiqhi chuve momu khuu qhasüve kea? Momu khuu u lono I no külügho luve no tino I nhethi miyi luve kea? I lachile ghi thopi shijulo eno I no tipaqo nongu lochileveni.”

⁴ Panongu no pi, “No ye ningu pishiqhi chu momu qhasü püamoe, khuu u lomu kiumu lupe püamoe.”

⁵ Pa no panoqo vilo pi, “Ampeu no thopi ke eno ishi Paw nukikishe no thopi ke, nongu ye I lau akipimi kiumu ithulumoe.” Eno panongu no pi, “Pa no thopi ke.”

⁶ Samuel no timiqo vilo pi, “Ampeu, khuu Moses eno Aaron süküsü shino nongu puasüqo Egypt yeghi lono saipeghi keno, Pa no thopi ke.

⁷ Tighenguno itehi itha mono puthugho lo tishi aye I no Ampeu zülono nongu qhüiniju no Pa chipiu mikucho kümla Pa no nongu eno nongu puasüqo lau mlakeu kümtsü pitsüni.

⁸ Jacob no Egypt lo ighi kelo, Egyptmi no panoqo ghimeqhi, ikehu nongu puasüqo no Ampeu lau ighamku eno Pa no Moses ngo Aaron puwu no nongu puasüqo Egypt lono saipeghi no panoqo pelo hipau-a lo xülupe.

⁹ Ikemu panongu no pano Mpeu Alhou kümsümave. Ikehu Pa no Hazor ghüshimi zatsüu Sisera u lo, Philistiami u lo, eno Moab kükau u lo panoqo jesüve. Eno panongu no pano sasü aghüshi.

¹⁰ Panongu no Ampeu lau ighamku pi, ‘Nino axine shivae, kughengu ningu no Ampeu pheve no Baal ngo Ashtaroth qeuve. Ikemu itehi ni ghümi u lono ni xaphelu tsülo, tishi aye ningu no O qeni.’

¹¹ Ikehu Ampeu no Jerubbaal, Barak, Jephthah, eno Samuel puwu no nongu ghümi launo nongu xalu eno nongu ye sükusho lo xülue.

¹² Eno kughou nongu no Ammonmi kükau Nahash no nongu leighi keu ithulu keno, Ampeu nongu Lhou no nongu shou akükau shi akeghi nongu no I vilo pi, ‘Moe, akükau lakhi no ningu shou ayepe nani.’

¹³ Itehi akükau khuu nongu no kishe, eno khu akeno pa julo, Ampeu no nongu shou akükau süsüvae.

¹⁴ Tsala nongu no Ampeu sümsa eno Pa huthu, Pa tsa gholu eno Pa zakütsü hebidemo, tsala nongu eno nongu shou ayepe akeu akükau no Ampeu nongu Lhou pape aye nongu kivipu shinani.

¹⁵ Ikemu nongu no Ampeu tsa gholu mono Pa zakütsü hebideve aye, Ampeu u no nongu eno nongu kükau shou ikughi nani.

¹⁶ Tighenguno itehi inaqhoi puthugho lo eno thime kije hipau Ampeu no nongu nhethe lo shiniye akeu julo.

¹⁷ Ishi ye ashothi ghile ghuloki ke kumo keshea? I no Ampeu kuni, tishino Pa no pasapagha eno tsütsüghu puwu tsü peni. Nongu no nongu ghenguno akükau khu keu lono now küsakügha kije shive akepi nongu no ithi eno ithulu nani.”

¹⁸ Ikehu Samuel no Ampeu ku, eno tipa tsalani Ampeu no pasapagha ngo tsütsüghu puwu, eno timi kümtsü no shishe Ampeu ngo Samuel msave.

¹⁹ Timi kümtsü no Samuel vilo pi, “O qemiqo ghenguno Ampeu o Lhou lau inikhu tsülo, tishianguno ningu ye thimo nani, kughengu ningu no akükau khu keu lono nino ni xine shou küsakügha hipau küphavae.”

²⁰ Samuel no timiqo vilo pi, “Msa kevilo; nongu no küsakügha hi kümtsü shivae. Ikemu Ampeu pape mono tsüghüve kevilo, nongu mlo kuchopu pesü Pa qelo.

²¹ Eno abokümsa thime kiumu ala küha eno xamlani keu pape kevilo, kughengu tipaqo ye abokümsa ke.

²² Kughengu Ampeu ye Pa je kije ghenguno Paw timiqo phevemo nani, Pa no nongu pesü Paw timi shivekeu ye Ampeu lopue.

²³ Tinguno alau, ni ye nongu ghenguno inikhu mono Ampeu zülo pimive keu shimo nani, ikemu kiu no akivi eno achipiu laghi keno I no tipaqo nongu kütsüshika nani.

²⁴ Ampeu sümsake likhi shilo eno nongu mlo kuchopu no pükhü kulupu shi Pa qelo. Kughengu Pa no thime kije kiu nongu ghenguno mlatsü keno kümsüju lo.

²⁵ Ikemu nongu no itaghi küsakügha shi aye, nongu eno nongu kükau kümtsü joleve nani.”