SAMUEL ATUGHIU 11 - Sumi Naga CL (Re-edited) Bible (BSI)

Saul no Ammonmi Leluve

¹ Tithiu Ammonmi Nahash no ighi no Jabesh-gilead leluve, ikehu Jabesh lo küami kümtsü no Nahash vilo pi, “Ningu sasü visho shilo, eno ningu no o qeni.”

² Ikemu Ammonmi Nahash no panongu vilo pi, “Aghola hipau lono I no nongu sasü visho shini, ti ye I no nongu kümtsü nhethi ajeu lejove tsüni, eno tipau no Israelmi kümtsü lau küthakügha shitsüni.”

³ Jabesh lo layemi no pa vilo pi, “Atsala tsüni akulho kiqhi do ningu tsülo eno nino Israel yeghi kümtsü lo atsapemi puwuni. Tishino ni xaluni kemi khumu aghi move aye, nino ningu ampi pesü tsüveni.”

⁴ Kughou atsapemi no Gibeah lo Saul lau ighi keno, panongu no timi kümtsü kini lo hipau sütsa pikülha, eno timi kümtsü no aghügha kije lono ighaqae.

⁵ Saul ye amshitsüqo thiu shino aluza lono woche. Eno Saul no pi, “Timiqo ye kiu pimive keno qa ani kea?” Ikehu panongu no Jabesh lo küxümi sütsa pa vilo pi.

⁶ Kughou pa no atsa hipaqo chilu keno, Alhou Ghungu no Saul shou ikughi, eno pa xukighide kije shikitheve.

⁷ Pa no amshitsü kuokhasü ikhipe atachushi hechheve no atsapemi u lono tipaqo Israel yeghi kümtsü lo tsüpuwu no pi, “Khuu no Saul ngo Samuel pape ighi moni keno, pa mishitsüqo lau hitoi shitsüni.” Tileno timi kümtsü shou Ampeu kümsa ikughive, eno kümtsü no lakhi shi ashou ipeghive.

⁸ Kughou pa no Bezek lo panoqo hekütsü keno, tile Israelmi timi lakh küthü eno Judahmi no timi qhethonhe shighi ighilu.

⁹ Panongu no atsapemi ighi keqo vilo pi, “Jabesh-gileadmi vilo pilo: ‘Thoghiu khetsünhe kümka dolono nongu no xakulupu ithulu nani.’” Kughou atsapemi no ighi no Jabeshmi vilo pi keno, panongu no alovive.

¹⁰ Tighenguno Jabeshmi no pi, “Thoghiu nino ningu ampi pesü o tsüveni, eno kiu no o ghenguno akivi keno nono ni lau shilo.”

¹¹ Thoghiu Saul no timiqo amqo küthü shi kijeve. Eno panongu no tsükutholau no aghazü mta lo ighive no puchomta kutolo Ammonmi ghiqhi thuve. Khunoqo xülu keno panongu ye apanaghave kehu panongu dolo mikini mu kümtsa ngomlave.

Kükaqha Shiqhe Kithe

¹² Tithiu timiqo no Samuel vilo pi, “Khuu no, ‘Saul no ningu shou kani keshea’ ipi kea? Timi tipaqo saghi lo, ningu no pithiveni.”

¹³ Ikemu Saul no pi, “Ishi tsala lo timi lakhi mu pithi moni, kughengu ishi ye Ampeu no Israel lau xakulupu shitsüe.”

¹⁴ Tithiu Samuel no timiqo vilo pi, “Ighilo, ningu Gilgal lo wuni eno tilau no kükaqha shiqhe kitheni.”

¹⁵ Tighenguno timi kümtsü no Gilgal lo wuno tilau no Saul pesü Ampeu zülono akükau shivepe. Tilau no panongu no külakishi kümllagho pesü Ampeu lau aghashi, Saul eno Israelmi kümtsü no shishe alovilu.