SAMUEL ATUGHIU 10 - Sumi Naga CL (Re-edited) Bible (BSI)

Saul Nukishepe Akükau Shi

¹ Tithiu Samuel no thazü bohu ikhiphepe Saul kütsü lo lepuku no pa müma eno pi, “Ampeu no Paw timi Israelmi shou yepeu shi penike o nukisheve ake kumo keshea? Nono Ampeuw timiqo shou ayepe nani eno aghümi pano homxape akemi launo panongu xalu nani. Ampeu no o pelo Pa mheghi shou sakipheu shi penike o nukishe keu michipu hino shinani.

² Ishi tsala lo kughou nono I launo wuveni keno, Benjamin ghakhu lo Zelzah phivilo nono timi kini Rachel kumoki lono sholu nani eno pama no o vilo pi nani, ‘Nono phuwu keu khurhaqo ye ithuluvae, eno itehi o pu ye khurhaqo ghenguno kumono nokujo ghenguno amlosa ghi pi ani, “I nu ghenguno ni ye kiu shiveni kea?”’

³ Tishino no ye tilauno chekithesü wuno Tabor lo aphisübo-a lo ighi nani. Timi küthü Bethel lo Alhou phuwu chekemi no o sasü kusholu nani, timi lakhi no ane küthü hasasü cheghi nani, lakhi no asho küthü, eno lakhiu no ashiyiko hughi lono atsaizü pecheghi nani.

⁴ Panongu no petha o tsüno asho kini o tsü nani, nono panoqo u lono ikhilu nani.

⁵ Tithiu nono Gibeath-elohim, khile Philistiami ghüshimi ghazü ani keno, tipau lo ighi nani. Tilau nono mishighüna lo ighi kemtsa, tungkupmi amqo lakhi qhemghaike-a lono iqi cheghi keu ithulu nani, eno panoqo zülo aheo, amqübo, fulili, eno akighi lebo küigha ghi tungkuptsa picheghi nani.

⁶ Tileno Ampeu Ghungu no o shou ikughi no no ye panoqo gholo tungkuptsa pi nani eno timi kütami toive nani.

⁷ Kughou amchipu hipaqo sholuni keno, kiu mla kepu keno mlalo, kughengu Alhou ye o gholo ani.

⁸ Tishino I züuno chesü Gilgal lo iqilo. Eno julo, I no o lau iqighi no akipti kümllagho eno külakishi kümllagho pesü aghashi nani. I no o lau ighi no nono kiu shikepu keno o piye moke kutolo no ye atsala tsüni ngokhe nani.”

⁹ Kughou pa no wuveni ye Samuel launo tsüghü idewo keno, Alhou no amlo kütau pa tsüve. Eno tipa tsalani amchipu hi kümtsü shikupuve.

¹⁰ Kughou panongu no Gibeah lo ighi keno, julo, tungkupmi amqo lakhi no pa sholu, eno Alhou Ghungu no pa shou ikughive no pa ye panongu gholo tungkuptsa pi.

¹¹ Kughou azüu no pa ithi chekemi no pa no kishi tungkupmi gholo tungkuptsa pi akeu ithulu keno, panongu lakhino lakhi vilo pi, “Kish nu shou kiu ikughive akea? Saul ghi tungkupmi lakhi keshea?”

¹² Tipa-a lo ache kemi lakhi no khochile, “Eno panoqo papu ye khuu kea?” Ikehu tino aholetsa shive, “Saul ghi tungkupmi lakhi keshea?”

¹³ Kughou pa no tungkuptsa kipi kishekhave keno, pa no qhemghaike-a lo ighive.

¹⁴ Saul papu thiküzüu no pa ngo pa qeu vilo pi, “Nokujo ye khilau wuve kea?” Eno pa no pi, “Khurhaqo juniye wuve. Ikemu kughou nikujo no khurhaqo ithumlave keno nikujo no Samuel lau wuve.”

¹⁵ Saul papu thiküzüu no pi, “Kimiyeno Samuel no kiu nokujo vilo pi keno I vilo pilo.”

¹⁶ Saul no pi, “Pa ye vejoi nikujo vilo khurhaqo ye ithuluvae pike.” Ikemu kükaqha vehu khikhi Samuel no pi keno ti ye pa vilo kiumu pimove.

Saul Pesü Akükau ipi Asheshu

¹⁷ Samuel no Mizpah lo timiqo pelo Ampeu lau hekütsüpe.

¹⁸ Pa no Israelmi vilo pi, “Ampeu, Israel Lhou no ishi piani, ‘I no Egypt lono Israelmi saipeghi, Egyptmi eno kükaqha nongu kijipüsa chekemi u lono I no nongu sülekholu.’

¹⁹ Ikemu ishi nongu no nongu Lhou, khuu no amhekiqi eno aghime kitikhi kümtsü lono nongu xalu keno, Pa milivae, eno nongu no Pa vilo pi, ‘Kükami lakhi ningu shou qhitsülo.’ Tighenguno itehi nongu shiaye eno qhethonhe mqo kiqi lono Ampeu zülo ighilo.”

²⁰ Tishino Samuel no Israel shiaye kümtsü aphivilo saghi, eno asakiqhi lono Benjamin shiaye kishelu.

²¹ Pa no alagha kiqi lono Benjamin shiaye azüu saighi, eno asakiqhi lono Matrites lagha ikhilu eno asakiqhi lono Kish nu Saul ikhiluve. Ikemu kughou panongu no pa phuighi keno, pa ithumlave.

²² Tighenguno panongu no itaghi Ampeu vilo iniju, “Timi lakhi ighini aphi keshea?” Ampeu no pi, “Julo, pa ye anhemgha dolo itshü ani.”

²³ Tile panongu no posü wuno tilau no pa saluve. Kughou pa no timiqo dolo puthugho keno, timi kümtsü pa bighi qhou likhi shi aghi.

²⁴ Samuel no timi kümtsü vilo pi, “Ampeu no khuu kisheve akeno nongu ye pa ithulu anima? Timiqo dolo khumu pa toikeu kühae.” Eno kümtsü no ighamku, “Akükau axüpushu peniu!”

²⁵ Tile Samuel no timiqo vilo akükau chipiu eno akümlapuqo pitsü, eno pa no tipaqo kaku lo yesüve no Ampeu zülo qhivetsü. Tithiu Samuel no timi kümtsü pütüta kilo puwove.

²⁶ Saul ghi Gibeah lo pa kilo wove, eno timi akumtomi khunoqo mlo Ampeu no butsü keno panoqo no pa gholo wove.

²⁷ Ikemu ameküküha timi khami no pi, “Timi hipau ye kishino ningu xaluni kea?” Eno panongu no pa thogha no agho kiumu pa lau peighimo. Ikemu pa ye inaqhoive.