SAMUEL ATUGHIU 1 - Sumi Naga CL (Re-edited) Bible (BSI)

Samuel Punu

¹ Ephraim toghi lo Ramathaim-Zophim ipikeu phu lo timi lakhi ache, pa je ye Elkanah. Pa ye Jeroham nu, Elihu nu, Tohu nu, Zuph nu, Ephrathami lakhi ke.

² Pa ye anipu kini ache. Anipu lakhi je no Hannah eno lakhiu je no Peninnah. Peninnah ye anuli bidi ache ikemu Hannah ye atianuli kühae.

³ Elkanah ye ampe atsütsü akümlla eno aghakishi pesü Shiloh lo aqokitikhi Mpeu mllani ye iqhoche. Tile Eli nu kini, Hophni ngo Phinehas pama no Ampeu chinemi shi ache.

⁴ Tipa tsalani kughou Elkanah no aghashi akeno, pa no asajeqo pesü pa nipu Peninnah eno li nuliqo kümtsü tsüe.

⁵ Ampeu no li tita lakhave tsü namu pa no li kimiye kehu Hannah lau asaje kini kishe no tsüche.

⁶ Hannah sasü kumgho achekeu huno shishe li ghashikighide tsüniye li chuxu, kughengu Ampeu no li tita lakhave tsüke.

⁷ Ikehu ampe atsütsü titoi shiche. Kughou li no Ampeu kilo wuni keno, li no Hannah ghashikighide tsüche. Ikehu Hannah ye qa-ano chusho move che.

⁸ Li kimi Elkanah no li vilo pi, “Hannah, kushiye no ye qa ani kea? Eno no ye kushiye chusho move ani kea? Kushiye o mlo ime ani kea? Ni ye o ghenguno anu chighi nguno akichiu kumo keshea?”

⁹ Shiloh lo panongu no chushove kethiu, Hannah no ithuve. Achineu Eli ye Ampeu chineki hukikha phivilo alakhü lo iqa ae.

¹⁰ Li ye ighono amloime ae eno Ampeu lau kukhukimji shi qa ae.

¹¹ Li no ashoqhi lakhi shino pi, “O aqokitikhi Mpeu, tsala Nono o qeliu ghime jutsü eno o qeliu kümsümave tsümo no anu lakhi pesü o qeliu tsü aye, I no pa pesü aküxü kupuju ghenguno Ampeu lau tsüveni eno aqe pesü pa kütsü lo bemoni.”

¹² Li no tamono Ampeu zülo inikhua, eno Eli ye li kichi chheju ae.

¹³ Hannah ye amlo lono atsa pi ake; li mütsü likhino itha eno asütsa ye chimlae. Tighenguno atopuu ye shomzü ani küghashi Eli no kümsüve.

¹⁴ Eli no li vilo pi, “No ye khitohi shomzüni kea? O tsaizü launo putosüve lo.”

¹⁵ Ikemu Hannah no khochile, “Moe, I mpeu, ni ye aghungu lono ime akemi topumi lakhi ke. Ni ye khilemu atsaizü momu aji kümka yeju mphie, ikemu ni ye Ampeu zülo I ngulho süghi ani.

¹⁶ O qeliu ye ameküküha totimi kepi kihitsü kevilo, kughengu I kütakihi keu eno amlokighishi lono ni ye itehi kutolo atsa pi aphike.”

¹⁷ Ikehu Eli no khochile, “Aloino wulo, Israel Lhou pelo nono Pa lau qhüiniju akeu khochiletsü peni.”

¹⁸ Eno li no pi, “O qeliu pelo o zülo kimiyeqhiyi keu ithulu pelo.” Tishino li no wuve eno chushove no amloksa gi kühave.

¹⁹ Panongu no inaqhe itheno ithuve no Ampeu mllave; tithiu panoqo ye Ramah lo pano kilo idewove. Eno Elkanah no pa nipu Hannah ithive, eno Ampeu no li kümsülu.

²⁰ Ado achipi lono Hannah ye mishiluve no anu lakhi punu eno li no pa je Samuel kutsü, li no pi, “Kughengu Ampeu vilo I no pa khulue.”

Samuel Pesü Ampeu Tsüve

²¹ Elkanah ngo pa kibolomi kümtsü ampe lo aghakishi kümllagho tsü chekeu pesü Ampeu mlla nike eno pa no tushoqhi keu tsünike wue.

²² Ikemu Hannah ye wumove kughengu li no li kimi vilo pi, “Anu no asatheve kethiu no I no pa sawuni, tishianguno no pa ye Ampeu zülo wuno pülhapuju tilau acheuve peni.

²³ Li kimi Elkanah no li vilo pi, o ghenguno kiu no akiviu keno tishilo; nono pa saputhu no asatheve moke kutolo ngo aghilo; Ampeu pelo Pa tsa shikupu peni.” Ikehu Hannah ye ngove eno anu no asatheve moke kutolo pa tucho ache.

²⁴ Kughou li no pa khove keno li no pa sasü wuno li gholo ampe küthü mishitsü lakhi, ashothi akho lakhi eno atsaizü ashiyiko hughi lakhi pesü Shiloh lo Ampeu kilo süghi. Anu ye itimi shiae.

²⁵ Tishino panongu no amshitsü ghiqhi no anu sasü Eli lau ighi.

²⁶ Li no pi, “O I mpeu, no hi xüanike totimi khuu o zülo hile puthugho no Ampeu lau inikhu akeno ti huye ni ke.

²⁷ Anu hipau ghenguno I no inikhu, eno I no qhüiniju ketoi Ampeu no I khochileve tsüae.

²⁸ Tighenguno I no Ampeu lau ikhiphe tsüve ani. Pa no xüake tivilo pa ye Ampeu lau ikhiphe tsüvae.” Pa no tileno Ampeu mllae.