SAMUEL AKINIU 9 - Sumi Naga CL (Re-edited) Bible (BSI)

Mephibosheth lau Kikimiye

¹ David no pi, “I no Jonathan ghenguno kikimiye pephe tsünike Saul lagha lo khuana itaghi ani kema?”

² Tile Saul kibolomi qemi lakhi Ziba ipikeu ache, eno panongu no David lau pa kupuwu. Akükau no pa vilo pi, “No ye Ziba keshea?” Eno pa no pi, “Ni ye o qeuke.”

³ Akükau no pi, “Saul lagha lo itaghi khuana I no Alhouw kikimiye piyelu kepu ani kema?” Ziba no akükau vilo pi, “Jonathan nu lakhi ani; pa ye apukhu kinitavae.”

⁴ Akükau no pa vilo pi, “Pa ye khile ani kea?” Ziba no akükau khochile, “Pa ye Lo-debar lo Ammiel nu Makhir kilo anie.”

⁵ Tileno Akükau David no Lo-debar lo Ammiel nu Makhir ki lono pa saighi.

⁶ Saul tilimi, Jonathan nu Mephibosheth no pa lau ighi no pa gi pishiqho luve no agigihu tsü. David no pi, “Mephibosheth!” Pa no khochile, “Julo, ni ye o qeuke.”

⁷ David no pi, “Msa kevilo, kughengu o pu Jonathan ghenguno I no kikimiye o piyeni, eno I no o sü Saul yeghi kümtsü o tsüchileveni, no ye alhokuthu I ghulhu lüpa lono chuni.”

⁸ Pa no agigihu tsüno pi, “O qeu ye kiue pi, atsü kithi lakhi toike I lau agigihu piye ani kea?”

⁹ Tithiu akükau no Saul qeu Ziba kuno pa vilo pi, “Saul mheghi eno pa kibolomiw thokha kümtsü I no o mpeu tilimi tsüve ani.

¹⁰ No, o nuli eno o qemiqo ye pa ghenguno alu chilo eno ghile lupusü ighilo, tishiaye o mpeu tilimi no asho chulu kepu anani. Ikemu Mephibosheth o mpeu tilimi ye alhokuthu I ghulhu lüpa lo chu nani.” Ziba ye anuli chighipungu eno aqemi muku ache.

¹¹ Ziba no akükau vilo pi, “I mpeu akükau no azah pa qeu tsükeu kiqi lono o qeu no shini.” Tighenguno Mephibosheth ye akükau nuliqo toi akükau ghulhu lüpa lono chuche.

¹² Mephibosheth ye apumi lakhi ache, pa je ye Mica. Eno Ziba kibolomi akeqo kümtsü Mephibosheth qemi shikhave.

¹³ Ikehu Mephibosheth ye Jerusalem lo xüache, kughengu pa ye alhokuthu akükau ghulhu lüpa lono chu acheke. Pa ye apukhu kinikujo kinitave kemi.