SAMUEL AKINIU 8 - Sumi Naga CL (Re-edited) Bible (BSI)

Davidw Tokuluqo

¹ Hipa thiu David no Philistiami theqhive no qhasü luve, David no Philistiami u lono Metheg-ammah luvetsü.

² Pa no Moabmi ghi theqhive. Pa no panoqo pelo ayeghi lo ikiqi züvepe no akighi lakhi pesü panoqo mighive. Akimghi kini shi aghi keqo thaqhü pithive, eno akimghi aküthüu ye xüluvepe. Ikehu Moabmi no David qholo xüuve eno zame süghi no tsüche.

³ David no Euphrates ghoki qhalo pa küka ikhichile luve niye wuke lono Rehob nu Hadadezer Zobah kükau ghi theqhive.

⁴ Eno David no pa launo khurshimi 1,700 eno ghüshimi qhethonhe muku luvetsü. David no khurkulu sala khurshiqo qhiluve no kümtsü apukhu hechheve tsü.

⁵ Kughou Damascus lo Syriami no Zobah kükau Hadadezer kuphuni ye ighi keno, David no Syriami qhethonhe muku kini ghiqhive.

⁶ Tithiu David no Damascus Aram lo ghüshimi ghazü qhive, eno Syriami ye David qemi shive no zame süghitsü. David no khile wu keno Ampeu no tokulu tsü.

⁷ Hadadezer qemi no peche keu ameshoyi züto David no luve no Jerusalem lo süghive.

⁸ Hadadezerw mishighüna Betah ngo Berothai lono Akükau David no alazayi kümzapu ikhipe wuvetsü.

⁹ Kughou Hamath kükau Toi no David no Hadadezerw ghüshimi kümtsü theqhivae pi chilu keno,

¹⁰ Toi no Akükau David ye ashiaji kiu toi ani keno iniju eno pa kümgha tsüniye pa nu Joram puwu, kughengu Hadadezer no ado akichiu lono Toi sasü aghü shiche ke. Eno Joram no ghükayi, ameshoyi eno alazayi no shikeu nhemgha pa gholo süghi.

¹¹ David no qhasülu keu shiyeqo launo ghükayi ngo ameshoyi luve keu gholono hipaqo ghi Ampeu lau ikhiphe tsü,

¹² ti ye Edom, Moab, Ammonmi, Philistiami, Amalek eno Zobah kükau Rehob nu Hadadezer launo leluve keqo.

¹³ Kughou David no Amti Khila lono Edommi qhethonhe chighitache heqhive no idewo chekeno, pa ye ajekipi shive.

¹⁴ Pa no Edom lo ghüshimi ghazü qhiwove; Edom qha kümtsü lo pa no ghüshimi ghazü qhive, eno Edommi ye David qemi shive. David no khile wu keno Ampeu no tokulu tsüe.

Davidw Hiyampemi

¹⁵ David no Israel kümtsü shou ayepe luve. Pa no kuchou xakütha eno aqhemi lono timi kümtsü shou ayepe.

¹⁶ Zeruiah nu Joab no ghüshimi shou zatsüu, Ahilud nu Jehoshaphat no yekikithiu shi,

¹⁷ Ahitub nu Zadok ngo Abiathar nu Ahimelek pama no achinemi, Seraiah no akiyeu shi,

¹⁸ Jehoiada nu Benaiah no Kherethmi ngo Pelethmi shou ampeu shi, eno David nuliqo no achinemi shiche.