SAMUEL AKINIU 7 - Sumi Naga CL (Re-edited) Bible (BSI)

AMPEUw Puloshoqhi

¹ Kughou akükau no pa kilo ngoluve eno pa hokümxa lo aghümi akeqo launo Ampeu no akulhokiqhi pa tsü keno,

² pa no Nathan tungkupu vilo pi, “Julo, itehi ni ye cedar kilo ngo ani, ikemu Alhouw puloshoqhi bohu ye aphiki lo anie.”

³ Nathan no akükau vilo pi, “Wulo, o mlo lo akeu kümtsü shilo, kughengu Ampeu ye o gholo ani.”

⁴ Ikemu tipaji Ampeu tsa Nathan lau ighi,

⁵ “Wulo eno I qeu David vilo pilo, ‘Ampeu no ishi piani: No ye I ghenguno akungoki mlani keshea?

⁶ Egypt lono Israelmi saipeghi kelono ishi tsala kutolo Ni ye aki lo ngo mphi, ikemu Ni ye aphiki lono I kungo-a shino iqho-iqi acheni.

⁷ I no Israelmi gholono khile wu keno ti kümtsü lo Ni ye Israelmiw xaküthami, khunoqo no Iw timi jukuto acheni keno, tipaqo vilo azah tsü ghi, “Nongu ye kushiye I ghenguno cedar ki mla mokea ipi keshea?”’

⁸ Ikehu, itehi no ye I qeu David vilo pilo, ‘Aqokitikhi Mpeu no ishi piani, Atsüni kümtsha-a lo ambe pape cheke lono I no no ikhiphepe o pelo Iw timi Israelmi shou sakipheu shipe.

⁹ Nono khile wu keno I no o gholo ae eno o ghümi kümtsü o zülono ikhive tsü. Eno ayeghi lo akighichemi toi I no o ghenguno aje kije shitsü nani.

¹⁰ I no Iw timi Israelmi ghenguno a-a lakhi kishe tsüno tile panoqo shosüni, tishianguno panongu ye aküpüna shimove no pano-a lo ngouve nani.

¹¹ Eno püzüu I no xaküthami süsüke ghuloki lo toi ngukangughami ye panongu ghime kithemo nani. Nongu ghümi kümtsü launo I no nongu kulhoqhi tsü nani. Tinguno alau, Ampeu no o lau shuphe anike Pa no o sala aki shitsü nani.

¹² Kughou o tsala tove no nono o puasüqo gholo züuveni keno, I no o shelo o polo kughuko o phi lono ighikeu saputhu nani, eno I no pa kükaqha puthuphe tsü nani.

¹³ Pa no I je lono aki shiqhe nani, eno I no alhokupuju pa kükalakhü iqhikumto tsü nani.

¹⁴ I no pa pu shi nani, eno pa no I nu shi nani. Kughou pa no pimiveni keno, apu lakhino pa nu sakiyi keshi I no pa ghasü nani,

¹⁵ ikemu I no pa zülono Saul launo Iw iqemokeu kikimiye süwuve keshi Ni ye pa launo süwuve monani.

¹⁶ O lagha eno o kükaqha ye alholo I zülo mtsüqhei anani. O kükalakhü ye alholo ghenguno shosüve nani.’”

¹⁷ Atsa hipaqo eno kungunhetsü hi kümtsü kiqi lono, Nathan no David vilo pive.

Davidw Shikimthi Kighini

¹⁸ Akükau David no alou ilo Ampeu zülo iqa no pi, “O Ampeu Alhou, ni ye khuu eno I lagha ye kiue pi No ye hi kutolo I saighi kea?

¹⁹ Ikeghi O nhethe lo hi ye aghuloe, O Ampeu Alhou. Nono O qeu lagha ghenguno ighini keu kutolo piqhive tsüae, eno hi ye timi kümtsü ghenguno akükütsütsa ke, O Ampeu Alhou!

²⁰ David ye O vilo itaghi kiu piluni kea? Kughengu Nono O qeu David ithi ani, O Ampeu Alhou!

²¹ O shoqhi ghenguno eno O mlo lo akeu kiqi lono, Nono thime kije hipaqo kümtsü shikeu ye, O qeu pelo ithi peniye shike.

²² Tighenguno No ye kije ke, O Ampeu Alhou. Ni kini lono chilu keu kiqilo O toi keu khumu kühae, eno O nguno alau ye Alhou kütau kühae.

²³ Eno khunono Ow timi Israelmi toi kea? Ayeghi lo shiye lakhi Alhou no Paw timi shipeni ye qhüchilelu, Pa je ghenguno akümzapu kije shino panoqo zülono ashiaye haphe, shiye lakhi Egypt, eno tipau lhouqo launo Nono O salashi qhüchilelu ke.

²⁴ Nono Ow timi Israelmi pesü alholo Ow timi shiniye shosüvae, eno Nono panongu Lhou shivae, O Ampeu.

²⁵ Ikehu O Ampeu Alhou, Nono O qeu eno pa lagha ghenguno pive keu tsa alholo ghenguno thebei shitsü no pive ketoi mla tsülo.

²⁶ Eno O je ye alholo kije shikithe pi nani, ‘Aqokitikhi Mpeu ye Israel Lhou ke,’ eno O qeu David lagha ye O zülo mtotoi nani.

²⁷ Kughengu No, aqokitikhi Mpeu Israel Lhou, no piyeküsü hipau O qeu lau piye no pike, ‘I no o ki shitsü nani.’ Ikehu O qeu ye akighini hipau O lau inikhuni ke amlo mtolue.

²⁸ O Ampeu Alhou, No ye Alhou, O tsa ye kuchou, eno Nono thime akivi hipau O qeu lau ashoqhi shivae.

²⁹ Tighenguno itehi O qeu lagha kümgha tsünike pulo tsülo, tishianguno ti ye O zülo kishekhave monani. Kughengu Nono piqhive ake, O Ampeu Alhou, Ow kükümgha vecheo O qeu kibolomi ye alholo müghalu nanie.”