SAMUEL AKINIU 6 - Sumi Naga CL (Re-edited) Bible (BSI)

Puloshoqhi Bohu Jerusalem lo Süghi

¹ David no itaghi Israel lo kishekiphemi pano qhethonhe shighi hekütsü.

² Eno pa no pa gholo akeqo kümtsü sasü Baale-judah lono Alhouw puloshoqhi bohu, ti ye cherubim shou kükalakhü akeu lo iqa chekeu aqokitikhi Mpeu je lono kukeu, süghini ye wuve.

³ Panongu no mishikulu kithe shou Alhouw puloshoqhi bohu pukuve no sasü Abinadab ki atoghi lo akeu lo süghi. Abinadab nuli Uzzah ngo Ahio pama no mishikulu kithe sache,

⁴ Ahio no puloshoqhi bohu zülo shino wue.

Uzzah eno Puloshoqhi Bohu

⁵ David ngo Israelmi kümtsü no alejo, aheo, akighilebo, amqübo, qüqüpu eno küghapayi pesü Ampeu shipili che.

⁶ Kughou panongu no Nacon niqa lo ighi keno, amshitsü küma no küpxalu kehu Uzzah no pa u chhopuwo Alhouw puloshoqhi bohu mtulu.

⁷ Ikelo Ampeu mlokighide Uzzah shou ikughive, eno paw shikipimi ghenguno Alhou no Paw puloshoqhi bohu phivilo no heqhive.

⁸ Uzzah shou Ampeu loghu ikughi kehu David ye amloideve. Tipa-a pesü ishi kutolo Perez-uzzah ipi kucheni.

⁹ Tipa tsalani David ye Ampeu msave no pi, “Kishino AMPEUw puloshoqhi bohu I lau ighi luni kea?”

¹⁰ Ikehu David ye AMPEUw puloshoqhi bohu pesü David phughi lo ighini keu pulo move. Eno pa no Gathmi Obed-edom kilo qhive.

¹¹ AMPEUw puloshoqhi bohu ye Gathmi Obed-edom kilo aqhi küthü ngove, eno Ampeu no Obed-edom ngo pa kibolomi kümtsü kümghatsü.

¹² “Alhouw puloshoqhi bohu ghenguno Ampeu no Obed-edom kibolomi eno pa no aghikeu kümtsü kümghave tsüae” ipi akükau David vilo pive. Ikehu David no Obed-edom kilo wuno alokivi shi Alhouw puloshoqhi bohu pesü David phughi lo ighive.

¹³ Kughou Ampeuw puloshoqhi bohu peche keqo no küpka tsügho chewuve keno, pa no amshitsü lakhi eno atha pubeyi keu lhoxü lakhi ghiqhipe aghashi.

¹⁴ David no pa kumto kümtsü süno ilhe.

¹⁵ Titoi David ngo Israelmi kümtsü no ighamku eno akibo küigha ghi Ampeuw puloshoqhi bohu süghive.

David ngo Michal

¹⁶ Ampeuw puloshoqhi bohu pesü David phughi lo iloghi kelo, Saul nonga Michal no alashe lono jupipe, eno Akükau David no Ampeu zülo ilhe cheghi keu ithulu, ikelo li no amlo lono pa jukünathave.

¹⁷ Panongu no Ampeuw puloshoqhi bohu pewo David no aphiki shiqhe püakeu alou ghope qhive. Eno David no akipti kümllagho ngo külakishi kümllagho pesü Ampeu mlla.

¹⁸ David no akipti kümllagho ngo külakishi kümllagho tsüve kethiu, pa no aqokitikhi MPEU je lono timiqo kümghatsü,

¹⁹ eno Israelmi aqokitikhi, kiptimi totimi kümtsü lau asho, ashi eno atsaikipki sho lakhikhi tsü. Tithiu timi kümtsü no pütüta kilo idewove.

²⁰ David no pa kibolomi kümgha tsüniye ighi. Ikemu Saul nga Michal no David sholu niye ighi no pi, “Ishi Israel kükau ye kishi pa ampi gihu kela, pa ghinimi qelimi nhethe lono ghaghumi toi kujomo mithe pa phimini xake!”

²¹ David no Michal vilo pi, “O pu eno pa lagha kümtsü nguno akiqheu shi I kishephe, eno Ampeuw timi Israelmi kümtsü shou sakipheu shipeni ye I süsükeu, Ampeu zülou aloviae, eno ni ye Ampeu zülo alovi ani aphie.

²² Ni ye I likhi I pesü hinguno alau ghi jukünatha nani, eno o nhethe lo küthaküghapu shi nani. Ikemu aqelimi khunoqo ghili nono pi akeno, panoqo vecheo ni ye agigihu ithulu nani.”

²³ Eno Saul nga Michal ye li kithi tsala kutolo atianuli kühave.