SAMUEL AKINIU 5 - Sumi Naga CL (Re-edited) Bible (BSI)

David no Israel Kükau shive

¹ Tithiu Israel lo ashiaye kümtsü no Hebron lo David lau ighi no pi, “Julo, ningu ye o ghi eno o shi ke.

² Wovekeu lo, Saul no ningu shou akükau shi akelo ghi, nono Israel ghüshiqo lo saphe ighike. Eno Ampeu no o vilo pi, ‘Nono Iw timi Israelmi kheu shi nani, eno nono panongu yepeu shi nani.’”

³ Tighenguno Israel lo layemi kümtsü Hebron lo akükau lau ighi, eno David no Ampeu zülono panongu sasü puloshoqhi lakhi Hebron lono shi, eno panongu no Israel kükau shi David nukishe luve.

⁴ David no ayepe ke ghuloki lo pa ye ampe shighi shia, eno pa ye ampe lhobidi ayepelu.

⁵ Pa ye Hebron lo Judahmi shou ampe tsüni eno aqhi tsügho ayepe eno Israelmi ngo Judahmi kümtsü shou Jerusalem lono ampe shighi-küthü ayepelu.

⁶ Akükau eno paw timiqo no Jebusimi mjochile niye Jerusalem lo wu, panongu ye tile küxümi, panongu no David vilo pi, “No ye hile iloghimo nani, anhethi kighichemi eno aphiau kinitave kemi no o lakha nani”—panongu no ishi kümsü, “David ye hile iloghi mla nani.”

⁷ Tishimu David no Zion sükusho-a leluve, ti ye David phughi.

⁸ Eno tipani David no pi, “Khukhumu Jebusimi leni keu ye azüla kathasü ‘aphiau kinitave kemi ngo anhethi kighichemi’ lelu nani, hipaqo ye David ghümiqo ke.” Tighenguno ishi picheni, “Anhethi kighichemi ngo aphiau kinitave kemi ye kükaki lo iloghimla nani.”

⁹ David no sükusho-a lo ngoluve eno tipau pesü Davidw mishighüna ipi kuvetsü. Pa no Millo kümtsü homxa mishighüna shiqhe pukuve.

¹⁰ David ye alau akumto shive, kughengu Ampeu, Aqokitikhi Lhou no pa gholo ae.

¹¹ Tyre kükau Hiram no David lau aghinimi puwu, eno cedarbo ngo asükümlami eno atukümlami pelo David ki mla penike puwu.

¹² David ye AMPEU no pa pelo Israel kükau shi penike süsü, eno Paw timi Israelmi ghenguno pa kükaqha süqhe tsüe pi ithive.

¹³ David no Hebron lono ighive kethiu Jerusalem lo anipu eno anipu amishimi alau auve, eno kiptimi ngo totimi alau ithulu.

¹⁴ Jerusalem lono punu keqo je: Shummua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada eno Eliphelet.

Philistiami Shou Tolu

¹⁷ Kughou Philistiami no David ye Israel shou akükau shi nukishe luvae pi chilu keno, panongu kümtsü no David phuni ye ighi. Ikemu David no ti chiluve no sükusho-a lo iqive.

¹⁸ Philistiami no ighi no Rephaim Khila nhakhave.

¹⁹ David no Ampeu vilo ighiju, “Ni ye Philistiami mjochile nike iqho kepu kemo kea? No ye I u lo panoqo phesü tsüni kema?” Ampeu no David vilo pi, “Iqholo, kughengu I no mtsümishei o u lo Philistiami phesüve tsüni.”

²⁰ David no Baal-perazim lo ighi no panoqo shou toluve. Pa no pi, “Ampeu no züqozü lakhave ketoi I zülono I ghümiqo lakhavae.” Ikehu tipa-a pesü Baal-perazim kuvetsü.

²¹ Eno Philistiami no tile pano lhou julhoqo qhive kehu David ngo paw timiqo no tipaqo pewove.

²² Philistiami no itaghi iqhoghi no Rephaim Khila nhakha luve.

²³ Kughou David no Ampeu vilo ighiju keno, Pa no pi, “No ye iqho kevino panongu thiu no homxa wulo, eno Balsam süboqo ghüngü lono panongu lelo.

²⁴ Kughou nongu no Balsam süboke lono alakiche sütsa chiluni keno ithulo, kughengu Ampeu no Philistiami ghüshimi ghiqhini ke nongu züuno wuve ake.”

²⁵ David no Ampeu no azah tsüke toi shino Geba lono Gezer kutolo Philistiami ghiqhive tsü.