SAMUEL AKINIU 4 - Sumi Naga CL (Re-edited) Bible (BSI)

Ish-bosheth Heqhive

¹ Kughou Saul nu Ish-bosheth no Abner ye Hebron lono thivae pi chilu keno, pa ye msave eno Israelmi kümtsü no aghüthisüve.

² Tipa ghuloki lo Saul nu ye akilemi mqo lo kepten kini ache, lakhi je no Baanah eno lakhiu no Rekhab, pama ye Benjamin lagha lo Beerothmi Rimmon nuli ke (kughengu Beeroth ghi Benjamin gholo lakhi shi kihi cheke);

³ Beerothmi ye Gittaim lo pove no ishi tsala kutolo tilau kupokichemi shi acheni.

⁴ Saul nu Jonathan ye anu lakhi apukhu kinitave keu ache. Jezreel lono Saul ngo Jonathan pama sütsa ighikeu chiluke ghuloki lo pa ye ampe pungu shia, eno pa tuchomjo chekeu no pa saluve no pove, eno li no mighimghai pocheke lono, pa ye veqhive eno aphiau kinitave. Pa je Mephibosheth ke.

⁵ Beerothmi Rimmon nuli, Rekhab ngo Baanah, pama no wuno atsala külü dolo Ish-bosheth no puchou akulhoqhi ake lono pa kilo ighi.

⁶ Eno pama no ashothi luniye ighi akeu ghola shi aki mta lo iloghive eno pama no pa polo jisüve tsü. Tithiu Rekhab ngo pa thiküzüu Baanah pama ye pove.

⁷ Kughou pama no aki lo iloghi keno, pa ye pa chebo lo pa lüpa lo ihozü ae, pama no pa heqhi pithive no pa kütsü lovetsü. Pama no pa kütsü pesü putho tsala kupuju Arabah kathasü wuve,

⁸ eno Ish-bosheth kütsü pesü Hebron lo David lau ighi. Pama no akükau vilo pi, “O küxü phuche keu, o ghümi, Saul nu Ish-bosheth kütsü hi anie. Ishi tsala lono Ampeu no I mpeu akükau ghenguno Saul eno pa tikughuko shou amkhü luve tsüae.”

⁹ Ikemu David no Beerothmi Rimmon nuli Rekhab ngo pa thiküzüu Baanah pama khochile, “Ampeu xüküau khuu no akümsapu kümtsü lono I xaphetsü keno Pa je lono piani ke,

¹⁰ kughou milakhi no I vilo, ‘Julo, Saul ye thivae,’ ipi keno, pa ye asütsa kivi süghi ani küghashive, ikemu I no pa tsüqü luve no Ziklag lono heqhive, tino pa sütsa kivi ghenguno asaxü shitsüe.

¹¹ Tishi aye tinguno alau, kughou küsaküghami no achipiu mikuchomi lakhi pa ki eno pa züabo lono heqhive keno, ni ye nokujo u lono pa ji avehupu shimoni keshea eno ayeghi lono nokujo kütsave moni keshea?”

¹² David no paw apumiqo azah tsüve, eno panongu no pama ghiqhive no pama u ngo apukhu ghithave tsüno tipaqo Hebron lo ayizükucho phivilo tshüpe qhive. Ikemu panongu no Ish-bosheth kütsü luve no tipau pe Hebron lo Abner kumoki lo shiqhove.