SAMUEL AKINIU 24 - Sumi Naga CL (Re-edited) Bible (BSI)

David no Timi Kihi

¹ Itaghi Israel shou Ampeu loghu ye iqü ipeghi, Pa no David xukutho no pi, “Wulo, Israel ngo Judah kihiju lo.”

² Ikehu akükau no ghüshimi zatsüu pa gholo akeu Joab vilo pi, “Dan lono Beersheba kutolo Israel shiaye kümtsü lau wuno timi kihiju lo, tishianguno I no timi kikihi ithini.”

³ Ikemu Joab no pi, “I mpeu akükau nhethi no ithulu ghi itehi timi akeu nguno ghuthu aqheno piqi Ampeu o Lhou no küphatsü peniu, ikemu kushiye I mpeu akükau ye hipau lo azüvü ani kea?”

⁴ Ikemu Joab ngo ghüshimi shou zatsümi ye akükau tsa lamlave. Ikehu panongu no akükau zülono Israelmi kihi juniye wuve.

⁵ Panongu no Jordan kathasü no Aroer lono huthu, eno Gad lughi küdau akhila lo aphughi lono Jazer lo wuve.

⁶ Tishino Gilead lo, Kadesh lo Hittimi yeghi lo; Dan lo, eno Dan lono Sidon homxasü wu,

⁷ eno Tyre liwo lo ighi no Hivimi ngo Canaanmi phughi kümtsü lo wu; tishino Judah yeghi apeu Beersheba lo Negeb lo wue.

⁸ Panongu no aghakhu kümtsü itsü wuno aqhi toku atsala muku thiuno Jerusalem lo ighi.

⁹ Eno Joab no aqo lono hitoi timi kihipe akükau tsü: Israel lo aghütomi azütakikihi kipemi lakh tache, eno Judah lono lakh pungu.

David shou Küghathabe

¹⁰ Ikemu timi kikihi luve kethiu David lolo alokughuno kühave. Eno pa no Ampeu vilo pi, “I no kiu shive akeno ti ye axine kije shivae. Ikemu O Ampeu, itehi kimiyeno O qeu kipimi peve tsülo, kughengu I no ighono mbomzü shivae.”

¹¹ Kughou David no inaqhe ithughi keno, paw tungkupu Gad lau Ampeu tsa ighi,

¹² “Wuno David vilo pilo, ‘Ampeu no ishi piani, thime küthü I no o tsü ani. Khikhiu keno lakhi kishelu lo, I no o lau shitsüni.’”

¹³ Gad no David lau ighi no pi, “O ghakhu lo ampe küthü püqümiye ighi peni keo? Moaye aqhi küthü o ghümi no haqhi no panoqo zülono poni keo? Ikeo atsala küthü o ghakhu lo püsa ighi peni kea? Kümsüju no ni ye I puwu keu vilo kiu khokichile tsüni keno xathalo.”

¹⁴ David no Gad vilo pi, “Ni ye ighono avesavae. Ningu Ampeu u lo ikiqiveni, kughengu Paw kikimiye ye kije ke; ikemu I pelo timi u lo ikiqi ilovepe kevilo.”

¹⁵ Ikehu Ampeu no püsa pesü inaqhe no wo kihikütha do tomoke kutolo Israel lo puwuve. Tile Dan lono Beersheba kutolo timi qhethonhe lhotsüni thive.

¹⁶ Kughou kungumi no Jerusalem küdau pa u süqhepe ti kütsave niye shikeno, Ampeu no küsakusho lono süchileve no timi kütsakungo akeu kungumi vilo pi, “Kughomae; o u süchile luvelo.” Ampeuw kungumi huye Jebusimi Araunah niqa lo ake.

¹⁷ Kughou David no timi ghiqhi akeu kungumi ithulu keno, pa no Ampeu vilo pi, “Julo, I no axine shivae, eno I no küsakügha kümla shivae. Ikemu ambe hipaqo ye kiu shive kea? Kimiyeno O u I shou eno I laghami shou pukuve tsülo.”

David no Akiptia Shiqhe

¹⁸ Gad no tipani David lau ighi no pi, “Ithu no Jebusimi Araunah niqa lo Ampeu lau akümlla-khache shiqhelo.”

¹⁹ Ikehu Ampeu no azah tsüke toi David no Gad tsa chilu kemtsa wuve.

²⁰ Kughou Araunah no jupiqi keno, akükau ngo pa qemiqo pa küdau cheghi keu ithulu. Pa no wuno ayeghi lo pishiqhope agigihu akükau tsü.

²¹ Araunah no pi, “Kushiye I mpeu akükau ye pa qeu lau ighi ani kea?” David no pi, “O niqa qhüpe Ampeu lau akümlla-khache shiqhe puku niye ke, tishianguno timiqo launo püsa tave peniye ke.”

²² Tile Araunah no pi, “I mpeu akükau no kiu pulo ani keno lulo eno mllalo. Akipti kümllagho ghenguno amshitsü hi ani eno süküghüpu sü ghenguno athi hechekeu süpa ngo kuokhasü anie.

²³ Hi kümtsü Araunah no o tsüve ani, O akükau.” Pa no itaghi pi, “Ampeu o Lhou pelo no ikhilu tsüpeni.”

²⁴ Ikemu akükau no pi, “Moe, ni ye ame tsüno qhüni. Ni ye ame tsümo keu kipti kümllagho ye Ampeu I Lhou tsümoe.” Ikehu David no ghükayi ahu tüxa no aniqa ngo amshitsü qhüluve.

²⁵ Eno David no tile Ampeu lau akümlla-khache shiqhe no akipti kümllagho ngo külakishi kümllagho pesü mlla. Ikehu aghakhu züqhushi qhüiniju keu Ampeu no khochile tsüno Israel lo püsa kishekhave tsü.