SAMUEL AKINIU 23 - Sumi Naga CL (Re-edited) Bible (BSI)

Davidw Ashekha Tsa

¹ Hi no Davidw ashekha tsake: Jesse nu Davidw müzüküsü tsa, khuu pesü qhemghai süqhe keno paw müzüküsü tsa, Jacob Lhou no nukishe keu, Israel züküvüpu leshetou:

² “Ampeu Ghungu no I vecheo pi; Pa tsa ye I mili lo anie.

³ Israel Lhou no piqhivae; Israel Tuqu no I vilo pivae: Kughou milakhi no achipiu lono, Alhou sümsa ghi ayepeni keno,

⁴ panoqo shou pa no inaqhe küvü toi vüipeghi cheni, khüngküsü küküha inaqhe lo khetsünhe vüipeghi ketoi, tsütsüghu no atsüni mini ipeghi peke toi chenie.

⁵ “I kibo ye titoi Alhou gholo puthugho acheni kekumo? Kughengu Pa no I sasü lhokta puloshoqhi shivae, thokha kithikiyi eno mtotoivae. Kughengu Pa ye I kuphutsü eno I kimji shikupu tsümoni keshea?

⁶ Ikemu amekükühami ye kümtsü asahu peveke toi nani, khunomu au kümsa no bumlae;

⁷ khuu no tipaqo buni keno pa ye ayi momu angupa peitha cheni, eno ami no ti piti pühave cheni.”

Davidw Aghükivimi

⁸ Hipaqo no Davidw aghükivimiqo je: Tahkhemonmi Josheb-basshebeth; pa ye sakiphemi küthü gholo atou. Pa no angupa pesü timi 800 sasü küpüghü no kümtsü ghulo lakhi lono pithive.

⁹ Aghükivimi küthü dolo akiniu no Ahohi nu, Dodo nu Eleazar. Philistiami no aghü shiniye kütsüpe akelo Israelmi kümtsü no idewove kemu pa no David gholono panoqo khü ke.

¹⁰ Pa no ithu au qeive moke kutolo Philistiami ghiqhia no pa u azütakikihi lo meluve. Tipani Ampeu no tokulu kije tsü. Eno pa no ghiqhive keqo launo thime lunike ghengu likhino timiqo ye ighi.

¹¹ Aküthüu no Hararmi Agee nu Shammah. Philistiami no Lehi lo aghüche lakhi lo axali akeu lo kumqope akelo timiqo ye panongu launo pokhave.

¹² Ikemu pa no aghüche tipau süsho ghi Philistiami pithive tsü, eno Ampeu no tokulu kije tsüe.

¹³ Ghile ghuloki lo kughou Philistiami mqo lakhino Rephaim Khila lo aghazü shipe akeno, aghütomi shighi gholo atou küthü no Adullam tuki lo David lau ighi.

¹⁴ David ye sükusho-a lo ae, eno Philistiami mqo no Bethlehem lo ae.

¹⁵ David no tüghüthi qhiyi pi, “O, khuana no Bethlehem zükhe khagho phivilo akeu lono azü pewo I piyelu keaye lae!”

¹⁶ Tile aghükivimi küthü huno Philistiami ghazü vexü ilo Bethlehem zükhe khagho phivilo akeu lono azü pesü David lau ighi. Ikemu pa no yemono Ampeu lau lepheve tsü,

¹⁷ eno pi, “Ni ye khilemu hi yemlae, O Ampeu. Timiqo no pano küxü ji tsüno süghi keu ni ye yeni keshea?” Tighenguno pa no yemove. Hi ye aghükivimi pano küthü no shike.

¹⁸ Zeruiah nu Joab thiküzüu Abishai no shighi shou atou. Pa no angupa pesü timi 300 sasü küpüghü no panoqo ghiqhive, eno pano küthü gholo pa ghi aje shike.

¹⁹ Pa ye shighi dolo ighono ajekipi shive no panoqow zatsüu shive, ikemu küthü qhemi lo ikughi mlave.

²⁰ Jehoiada nu Benaiah ye Kabzeelmi aghütomi lakhi, akümla kije shiche kemi. Pa no Moabmi aghütomi kini ghiqhive tsü. Pa no avü kiqi tsalani wuno abongshuu lakhi aqokutho lono heqhive tsü.

²¹ Pa no Egyptmi ahi kivimi lakhi ghiqhive tsü. Egyptmi huno au lo angupa akemu Benaiah no aküsü pesü wuno Egyptmi u lono angupa süxape tino pa qhuqhive.

²² Jehoiada nu Benaiah no hitoi shino aghükivimi küthü gholo aje qelu.

²³ Pa ye shighi dolo ajekipimi, ikemu küthü qhemi lo ikughi mlave. David no pa pesü paw ghukhemi shou ampi shivepe.

²⁴ Joab thiküzüu Asahel ye shighi dolo lakhi; Bethlehemmi Dodo nu Elhanan,

²⁵ Harodmi Shammah, Harodmi Elika,

²⁶ Paltitmi Helez, Tekoami Ikkesh nu Ira,

²⁷ Anathothmi Abiezer, Hushathmi Mebunnai,

²⁸ Ahohimi Zalmon, Netophahmi Maharai,

²⁹ Netophahmi Baanah nu Heleb, Gibeah lo Benjamin timi Ribai nu Ittai,

³⁰ Pirathonmi Benaiah, Gaash ghokiti phivilo kungomi Hiddai,

³¹ Arbathmi Abi-albon, Bahurimmi Azmaveth,

³² Shaalbonmi Eliahba, Jashen nu Jonathan,

³³ Hararmi Shammah, Hararmi Sharar nu Ahiam,

³⁴ Macaahmi Ahasbai nu Eliphelet, Gilohmi Ahithophel nu Eliam.

³⁵ Carmelmi Hezro, Arbimi Paarai,

³⁶ Zobahmi Nathan nu Igal, Gadmi Bani,

³⁷ Ammonmi Zelek, Beerothmi Naharai, Zeruiah nu Joab ghünanu kupuu,

³⁸ Ithrimi Ira, Ithrimi Gareb,

³⁹ Hittimi Uriah: kümtsü aqolo shighi tsüni.