SAMUEL AKINIU 22 - Sumi Naga CL (Re-edited) Bible (BSI)

Davidw Xaphekulu Le

¹ Kughou Ampeu no aghümi eno Saul u lono David xaphelu keno, tipani no pa no ale hipau lono Ampeu pütsae.

² Pa no pi, “Ampeu ye I tuqu, I liwo eno I xaphekuluu,

³ I Lhou, I tuqu, I no Pa launo sükusho luchenie, I züto, eno I xakulu kibo, I sükusho-a eno I küghütshü-a, I xakuluu; kütsakungo keu lono Nono I xalue.

⁴ I no Ampeu, khuu sheqheküzü keno, Pa kue, I ghümiqo launo I xalu tsüe.

⁵ “Kughengu akithi zükukucho no I süho luve, kütsakungo keu zükuqo no I shou ikughie;

⁶ Kithigha kighi no I tsügha luve; Akithi lichhe no I shou ikughie.

⁷ “I veküsa lono I no Ampeu ku; I no I Lhou kue. Pa chineki lono Pa no I sütsa chilu tsü, eno I küqa no Pa kini lo iloghive.

⁸ “Tile ayeghi no thüthüshi itha; atsütsü boqha no khokho shiuve, kughengu Pa ye amloideve ke.

⁹ Pa nigi lono amchhi ipeghi eno akichi lono ami mili kuchughei iqü akeu mibalu ipeghi.

¹⁰ Pa no atsütsü kiyeve no iqighi; Pa pukhu qholo aküzü kutho ae.

¹¹ Pa no cherub shou ikuno yewu; amülhü no achishibo shino yewu.

¹² Aküzü pesü Pa pushonha shi, khüngküsü shishoi keu lono azü khepucho keu shie.

¹³ Pa zülo vüqalei keu küvü no amibalu kuchughei iqü ipeghi.

¹⁴ Ampeu no atsütsü lono tsütsüsü, Shishe Akughushuu no sheshue.

¹⁵ Pa no apiji kapuwu no aghümi apanaghave tsü; tsütsüpha no panoqo hakiphive.

¹⁶ Ampeu no alomipi kelo, Pa nigi lono atuthu shephe kelo, Azüghi lo azüla ithuluve; ayeghi boqha küzü püakeu ye lhapheve.

¹⁷ “Pa no kunguu no I sünhe luve; azüghi lono I sünhephe luve.

¹⁸ Pa no I ghümi kumto, I mithi chekemi launo I xaphelu, kughengu panongu ye I nguno akumtou ke.

¹⁹ I mhekiqi lo panoqo no I mghoe, ikemu Ampeu no I saphutsüe.

²⁰ Pa no aghüche kivi lo I saighie; Pa no I lau azüvü kehu I xalue.

²¹ “Ampeu no I chipiu mikucho kiqi lono I saphu; I mlo kimthe kiqi lono asaxü I tsü.

²² Kughengu I no Ampeu pape eno kixikila shi I Lhou launo putosüve moe.

²³ Pa yezah kümtsü I zülo ae, ni ye Pa khuaye lono tsüghüve moke.

²⁴ Pa zülo ni ye tukutiye shipüamo, ikemu akipimi lono putosüve ke.

²⁵ Ampeu no I chipiu mikucho, Pa zülo I no mithemithei keu kiqi lono asaxü I tsüe.

²⁶ “Kimiyekinimi lau Nono kimiyeqhiyi cheni; tukutiye küha kemi lau Nono tukutiye küha keu piye cheni;

²⁷ mqhamqhi kemi lau Nono mqhamqhiyi peitha cheni, chighichilai kemi lau Nono kijipüsa keu piye cheni.

²⁸ Nono mtshaivü kemi xalu cheni, ikemu aqheküzami sünheqhi veniye Nono panoqo jucheni.

²⁹ O Ampeu, No ye I kulu, I Lhou no I küzü yepüvü tsüe.

³⁰ Kughengu O vecheo I no ghüshimi loji mjochilelu nani, eno I Lhou vecheo I no aliwo ilhe kachelu nanie.

³¹ Alhou hipau laghi ye kupukülai; Ampeu tsa ye kuchoue pi mtsüqheilu cheni; Pa ije chekemi lau Pa ye azüto ke.

³² “Ampeu no kumo aye Khuu no Alhou kea? Eno ni Lhou likhino kumo aye Khuu no atuqu kea?

³³ Alhou hipau no I küghütshü kumto eno I laghi pesü tukutiye küha keu shitsüe.

³⁴ Pa no I pukhu pesü ashe pukhu toi shitsü no qhemghai ke-a lo I pelo mtotoi ngolu pe.

³⁵ Aghüshi ghenguno Pa no I qophe kehu I umlo no alazayi shexilika piqelu chenie.

³⁶ Nono Ow xakulupu züto I tsü, O kümtsha no I pesü kije shitsüe.

³⁷ Nono I pukhu lo a-a kije kutotsü kehu I pukhu ye nepiyeve moe;

³⁸ I no I ghümiqo hawu no kütsave, eno panoqo pühave moke kutolo idechile ighimoe.

³⁹ I no panoqo kütsakungove kehu panoqo ye ithughi move; panoqo ye I pukhu qholo ikiqive.

⁴⁰ Kughengu aghüshi ghenguno Nono aküka pesü I pipe; khunono I mjochile keno pano pelo I qholo ikiqive pe.

⁴¹ Nono I ghümi, I mithi kemi pelo I launo tsüghüve pe, eno I no panongu kütsave ke.

⁴² Panongu no laju akemu xaluni kemi kühae; Ampeu lau ighamku kemu khochile moe.

⁴³ I no ayeghimkhu toi panoqo mukhumuno shivetsü; alaghi lo aniba toi I no panoqo qoqhi eno nedaqhi.

⁴⁴ “Nono I sasü küpüghü akemi Iw timi launo I xalue; Nono I pesü shiyeqo kütsü shie; I no mtha kemi no I huthu ke.

⁴⁵ Inaghami no I lau pishiqho ighi; I sütsa chilu kemtsa I gholue.

⁴⁶ Inaghami no amlo hauve no thüthüshi sükusho-a lono ipeghie.

⁴⁷ “Ampeu ye xüani, I tuqu sheqhelo, I xakulu tuqu, I Lhou je süqhelo.

⁴⁸ I Lhou no I mkhü lutsü, I qholo ashiaye akeqo Pa no ghasü tsü,

⁴⁹ I ghümi launo Pa no I xaphelu; I mjochile kemi shou I sünheqhe; küsaküghami launo I xaphelue.

⁵⁰ “Ikehu I no shiyeqo zülono O sheqheni, O Ampeu, eno O shikipili le pheni.

⁵¹ Pa no xakulu kije Pa kükau tsüe, eno alholo iqemokeu kikimiye pe Paw nukikishe David eno pa kughukomi lau piyeke.”