SAMUEL AKINIU 21 - Sumi Naga CL (Re-edited) Bible (BSI)

David no Gibeonmi Mkhü Lutsü

¹ David ghuloki lo ampe küthü ishokibe püqümiye ighive kehu pa no Ampeu phuighi. Ampeu no pi, “Aji pelekeu kipimi Saul eno pa kibo shou ani, kughengu pa no Gibeonmi pithive ke.”

² Tighenguno akükau no Gibeonmi kuno pütsa. Gibeonmi ye Israelmi kumo kemu Amorimi ghükulumi ke. Israelmi no panongu süsho tsünipi ashoqhi shipüa kemu Saul no Israelmi ngo Judahmi lau pa zükini shi anipi panongu pithive niye shike.

³ David no Gibeonmi vilo pi, “Ni ye nongu ghenguno kiu shitsüni kea? Nongu pelo Ampeu mheghi kümghatsü penike ni ye kishi nongu lochileni kea?”

⁴ Gibeonmi no pa vilo pi, “Ningu dolo ameshoyi momu ghükayi eno Saul momu pa kibolomi vehu kumoe; momu ningu ye Israelmi khumu pithi akepu kühae.” David no pi, “I no nongu ghenguno shitsülu kepu kiu ani kea?”

⁵ Panongu no akükau vilo pi, “Khuu no ningu kütsave niye kughu eno Israel yeghi kupuju lo ningu-a qhitsü moniye shikeno,

⁶ pa laghami tsüni pesü ningu tsüvelo, tishino nino Ampeuw kishephe Saul phughi Gibeah lo Ampeu zülono panoqo tshüqhi pithiveni.” Akükau no pi, “I no panoqo tsüni.”

⁷ Ikemu akükau no Jonathan nu, Saul tilimi Mephibosheth ye püxüve, kughengu ti ye David ngo Saul nu Jonathan pama dolo ashoqhi akeu ghenguno ke.

⁸ Akükau no Aiah nonga Rizpah, khuu Saul lau punu tsü keno, pa nuli kini Armoni ngo Mephibosheth, eno Saul nonga Merab nuli pungu khunoqo li no Meholathmi Barzillai nonga Adriel lau punu tsü keno, panoqo küghape,

⁹ Gibeonmi u lo süvetsü, eno panongu no Ampeu zülono panoqo tshüqhi pithive, eno pano tsüni ye kümtsa thive. Panongu ye barleythi ghile tsala hukuthu lono pithive.

¹⁰ Tithiu Aiah nonga Rizpah no yeqhiyephi pesü atu shou apusho shino ghile hukuthu lono mütsü tusho lo tsütsüghu akumo shou ikughi moke kutolo tile ngove. Puchou li no aghauqo pelo momu putho lo aluza lo tüghashiqo pelomu tipaqo shou ikughi pemoe.

¹¹ Kughou Saul nipu amishiu Aiah nonga Rizpah no kiu shi akeno David vilo pi kelo,

¹² David no wuno Jabesh-gileadmi launo Saul ngo pa nu Jonathan saghi süghive. Philistiami no Gilboa lono Saul pithiveke tsalani akumo pewo Beth-shan lo kobidi-a lo tshüqhive ke Jabesh-gileadmi no tileno püka luve ke.

¹³ David no tilauno Saul ngo pa nu Jonathan saghi pesü iqhoghi, eno tshüqhi pithive keqo saghi ghi kiche kumqope.

¹⁴ Tishino Saul ngo pa nu Jonathan saghi pesü Benjamin yeghi Zela lo papu Kish kumoki lo shiqhove. Eno akükau no azah tsükeu kümtsü timiqo no shive. Tithiu no Alhou no ayeghi ghenguno qhüiniju keu khochile tsüe.

Philistiami Sasü Aghüshi

¹⁵ Philistiami ngo Israelmi dolo aghüshi ipeghive, David no paw timi sasü iqi no Philistiami sasü aghüshi, eno pa ye akulho shive.

¹⁶ Sübosüghimi kughukomi lakhi Ishbi-benob, khuu ngupa alazayi ahu küthü tüxa no shi, eno khuu azütakikihi kithe peche keno, pa no David pithive niye shie.

¹⁷ Ikemu Zeruiah nu Abishai no Philistiami mjothuve no pa heqhive püzü David xaluve. Tithiu Davidw timiqo no ashoqhi shive, “No ye khilemu ningu gholo aghüshi lo wumoae, tikumo aye nono Israel kulu pinheve nosae.”

¹⁸ Tithiu itaghi Gob lo Philistiami sasü aghüshi. Tile Hushathmi Sibbecai no Saph, khuu sübosüghimi tikughukomi keno, pa ghiqhive.

¹⁹ Itaghi Gob lo Philistiami sasü aghüshi kelono Bethlehemmi Jaare-oregim nu Elhanan no Gathmi Goliath, khuu ngupa akishilau aghüqasü toi keno, pa ghiqhive.

²⁰ Itaghi Gath lo aghüshi, tile sübosüghimi lakhi ae, pa ye au kinikujo lo auloti tsüghogho eno apukhu kinikujo lo apukhuloti tsüghogho, aqolo muku bidi ae, pa ghi sübosüghimi kughukomi.

²¹ Kughou pa no Israelmi thogha keno, David thiküzüu Shimei nu Jonathan no pa ghiqhive.

²² Hipano bidi ye Gath lo sübosüghimi kughukomi, eno panongu ye David ngo paw timiqo u lono ikiqi khave.