SAMUEL AKINIU 20 - Sumi Naga CL (Re-edited) Bible (BSI)

Sheba Hekibide

¹ Tipa ghuloki lo ameküküha timi lakhi ache, pa je ye Sheba, Bikhri nu, Benjaminmi. Pa no afuko küigha no pi, “Ningu ye David gholo asaje kühae, eno Jesse nu gholo amheghi kühae; kümtsü no aki lo wovelo, O Israel!”

² Ikehu Israelmi kümtsü no David qhive no Bikhri nu Sheba pape wuve. Ikemu Judahmi ye Jordan lono Jerusalem kutolo akumtoshi panongu kükau pape wuve.

³ David no Jerusalem lo pa kilo ighive. Pa no anipu amishiu chighi khunoqo aki jukuto peniye qhive keno panoqo saluve no aki lakhi lo qhive, eno akhemi no ngokhepe no avehupu shi akeu tsü, ikemu panoqo lau wumoe. Ikehu panongu kithi kutolo panongu ye khathape qhive no chimemi toi xü acheuve.

⁴ Tithiu akükau no Amasa vilo pi, “Atsala küthü dolo Judahmiqo I lau ku saghi no hekütsü lo, eno no ghi ighilo.”

⁵ Tighenguno Amasa no Judahmi kuniye wu, ikemu pa ye munuve no pa ghenguno kihitha tsükeu nguno alau ado luve.

⁶ David no Abishai vilo pi, “Bikhri nu Sheba ye Absalom nguno alau ningu ghüza niye ani. O mpeu qemiqo sasü pa hawulo, tikumo aye pa ye aliwo akeu phughi lo ilove no ningu launo pokave nosae.”

⁷ Joabw timi, Kherethmi ngo Pelethmi eno aghükivimi kümtsü no pa hasüwu. Panongu no Jerusalem lono Bikhri nu Sheba haniye ipeve.

⁸ Kughou panongu no Gibeon lo atu kije akeu lo akeno, Amasa no panongu sholu niye ighi. Joab ye ghüshimi phimini pepu ae, eno tipa shou apokha lakhi lo azütakikihi bohu pa chita lo xipuve no ae, pa no azüu pükawu kelaye tipau ikiqive.

⁹ Joab no Amasa vilo pi, “I thazü, no ye akivi shi anima?” Eno Joab no pa müma ni ye ketoi shino pa u ajeu no amkhümhi lo pugho luve.

¹⁰ Ikemu Amasa ye Joab u lo azütakikihi akeu ithumlave. Ikehu Joab no tipau pesü pa polo qhusüve tsüno akiniu ye qhusü move, paw kighinoli no ayeghi lo ile ipeghive eno pa ye thive. Tishino Joab ngo pa thiküzüu Abishai pama no Bikhri nu Sheba hawuve.

¹¹ Joabw lhothemi lakhi no Amasa phivilo puthugho no pi, “Khukhumu Joab eno David pulo keu no Joab papelo.”

¹² Amasa ye alaghila lo pa ji lono ihi ae. Eno khukhumu tile ighi keqo ye pa ithulupe ngove ae. Kughou timi kümtsü no ngove keu timi huno ithulu keno, pa no alaghila lono Amasa kuhope aluza lo wuve no aphi lakhi pesü pa khonhave.

¹³ Kughou alaghila lono pa kuhope wuve keno, timi kümtsü no Joab papesü Bikhri nu Sheba hawuve.

¹⁴ Sheba no Israel shiaye kümtsü kathasü Beth-maacah lo Abel lo ighi, eno Bikhrimi kümtsü no hekumqo no pa pape ighi.

¹⁵ Joab gholo kichemi no ighi no Beth-maacah lo Abel lono pa süho luve. Panongu no aphughi leniye aqo ghepuku, aghukhe-a tile shiqhe, eno aliwo tulaqhive tsüniye hepho ae.

¹⁶ Tileno alokütsümi topumi lakhi no mishighüna lono igha, “Inilo! Inilo! Joab vilo pilo, ‘I no o pütsani ke hile ighilo.’”

¹⁷ Joab no li phivilo ighi, eno topumi huno pi, “Nono Joab keshea?” Pa no khochile, “Iyei.” Tile li no pi, “O qeu tsa inilo.” Pa no khochile, “Ni ye ini ani.”

¹⁸ Li no pi, “Wovekeu lo panongu no ishi piche, ‘Abel lo likhino xakütha khuwulo,’ tishino aküpüna xathache.

¹⁹ Israel lo iqüghai eno pükhükulu gholo nighi lakhi ke. Israel lo aza lakhi shi ache keu mishighüna nono kütsaveni ye phucheni. Kushiye no ye Ampeu mheghi shipühave tsüniye ani kea?”

²⁰ Joab no khochile, “Ni ye khilemu pühave tsü momu kütsave tsüniye amoe!

²¹ Ti ye kuchou kumoe. Ikemu Ephraim ato yeghi lono milakhi Bikhri nu Sheba huno akükau hebide ithughi anie. Pa likhi ikhiphe tsüvelo, eno I no mishighüna lono idechile woveni.” Topumi huno Joab vilo pi, “Julo, aliwo lono pa kütsü vepiqi o tsüni.”

²² Tishino topumi huno li lokütsü lono timi kümtsü lau wu. Panongu no Bikhri nu Sheba kütsü michepe Joab lau vepiqi tsü. Ikehu Joab no afuko küigha no mishighüna lono apanagha kümtsü pütüta kilo wove. Joab ghi Jerusalem lo akükau lau idewove.

²³ Tithiu Joab no Israel lo ghüshimi kümtsü shou zatsüu shive; Jehoiada nu Benaiah no Kherethmi ngo Pelethmi shou zatsüu shi;

²⁴ Adoram no anguka lono akümla shipe keqo shou ampi shi; Ahilud nu Jehoshaphat no yekükütsüu shi;

²⁵ Sheva no akiyeu shi; Zadok ngo Abiathar pama no achineu shi;

²⁶ eno Jairmi Ira ghi Davidw achineu shive.