SAMUEL AKINIU 2 - Sumi Naga CL (Re-edited) Bible (BSI)

David no Judah Kükau shive

¹ Tithiu David no Ampeu vilo iniju, “Judahw mishighünaqo lakhi lo ni ye iqholu nanima?” Ampeu no pi, “Iqholo.” David no pi, “Khipa-a lo iqhoni kea?” Pa no pi, “Hebron lo.”

² Tighenguno David no tilau iqho, eno pa nipu Jezreelmi Ahinoam ngo püzüu Carmelmi Nabal nipu Abigail pama ghi iqhoe.

³ David no paw timi khunoqo pa gholo akeno panoqo saighi, kümtsü no pütüta kibolomi saighi no panongu ye Hebron lo mishiphuqo lo ngoluve.

⁴ Judah timi no ighi eno tilau panongu no David pesü Judah shiaye shou akükau shi nukisheve. Kughou panongu no David vilo, “Jabesh-gilead lo timiqo no Saul kumo shiqhovae,” ipi keno,

⁵ David no aghinimi Jabesh-gilead lo puwu no panoqo vilo pi, “Ampeu pelo nongu kümghatsü peniu, kughengu nongu no ithamo keu sakuphu nongu mpeu Saul lau piye eno pa shiqhove ke.

⁶ Itehi Ampeu pelo iqemokeu kikimiye eno pükhübekulu nongu lau pephe piye peniu. Eno I no nongu lau akivi mlani kughengu nongu no hi shike.

⁷ Tighenguno itehi nongu u shikumto lo, eno tsükhüi lo, kughengu Saul nongu mpeu ye thivae, eno Judah shiaye no I pelo panongu shou akükau shivepe ae.”

Ish-bosheth no Israel Kükau shi

⁸ Ikemu Ner nu Abner, Saul ghüshimi shou zatsüu no Saul nu Ish-bosheth sasü Mahanaim lo ighi,

⁹ eno pa pesü Gilead, Ashur, Jezreel, Ephraim, Benjamin eno Israelmi kümtsü shou akükau shivepe.

¹⁰ Kughou Saul nu Ish-bosheth no Israel shou ayepelu keno pa ye ampe lhobidi shiae, eno pa ye ampe kini ayepelu. Ikemu Judah shiaye ye David papeche.

¹¹ Tipa ghuloki lo David ye ampe tsüni eno aqhi tsügho Hebron lono Judah shiaye shou ayepelu.

Gibeon Ghüshi

¹² Ner nu Abner ngo Saul nu Ish-bosheth qemiqo no Mahanaim lono Gibeon lo wu.

¹³ Eno Zeruiah nu Joab ngo David qemiqo ghi wuno Gibeon yizükucho lono panoqo sasü kusho. Kütamiqo ye ayizükucho kukuu ngove.

¹⁴ Abner no Joab vilo pi, “Apumiqo pelo ithu ni sasü kumjo pelo.” Eno Joab no pi, “Tishi peni.”

¹⁵ Tishino panongu no ithu akikihi kiqi lono Benjaminmi eno Saul nu Ish-bosheth qomi no chighikini eno David qemiqo no chighikini ishi ngoluve.

¹⁶ Milakhikhi no pütüta müzülo aghümi kütsü tsüqü luve no azütakikihi pe aghümi chuxu kile, ikehu panongu ye kümtsa ikiqi thikhave. Tighenguno tipa-a pesü Helkath-hazzurim ipi cheni, ti ye Gibeon lo ani.

¹⁷ Tipa tsalani aghüshi ye ighono ayiküsa shive. Eno Abner ngo Israelmi ye David qemiqo theqhi mlave.

¹⁸ Zeruiah nu pano küthü, Joab, Abishai eno Asahel ye tile ae. Asahel ye aghalo anetsü pukhu toi mthüe.

¹⁹ Pa no Abner hawu, eno pa no wuche kelo pa ye piyiu mu ajeu mu kugho mono vejoi Abner hawu.

²⁰ Ikehu Abner no pa thiu jupuwo no pi, “Asahel, no keshea?” Pa no khochile, “Iyei, ni ke.”

²¹ Abner no pa vilo pi, “Piyiu mu ajeu mu ilove lo, eno apumiqo dolo milakhi tsüqü luve no pa no hakhope chekeu luvelo.” Ikemu Asahel no pa hasü chekeu lono kughove moe.

²² Abner no itaghi Asahel vilo pi, “I ha kevino tsüghüve lo. Kushiye I pelo ayeghi lo o yikuluve apeni kea? Tikumo aye ni ye kishi o mu Joab lau I gi peqhe luni kea?”

²³ Ikemu pa no tsüghü move. Ikehu Abner no pa ngupa pesü Asahel kive lo qhusüve tsü, ikehu angupa ye qhupilipe pa thiu no ipeghive. Eno pa ye tilehi ikiqive eno tipa-a lono thive. Asahel no ikiqi thive keu-a lo ighi keqo kümtsü no apuchopungo puthughope ngove.

²⁴ Ikemu Joab ngo Abishai pama no Abner hasüwu. Eno khetsünhe ilove kethiu pama ye Ammah toghi lo ighive, ti ye Gibeon lo yenguyi keu laghila lo Giah ipikeu phivilo akeu-a lo ke.

²⁵ Eno Benjaminmi no Abner zülo hekütsü luve no amqo lakhi shi atoghi kütsüqa lo puthugho luve.

²⁶ Tithiu Abner no Joab ku, “Azütakikihi ye alhokuthu ghiqhilu acheni keshea? Ashekha loye kukhukimji shi nani pi mtha keshea? Ow timiqo pelo panoqo thiküzümi hasü chekeu lono tsüghüve penike pimono ado khitohi anani kea?”

²⁷ Joab no pi, “Alhou xü anike tsala nono pimoke aye, mtsüqheino timiqo ye tave mono inaqhe kutolo mu panongu hawuni cheke.”

²⁸ Ikehu Joab no afuko küighave, eno timi kümtsü no ngove no Israelmi hawu kithe move, momu itaghi kichighi keu shimove.

²⁹ Abner ngo paw timiqo ye tipaji putho kupuju Arabah kathawu. Panongu no Jordan kathasü inaqhe kupuju chewu no Mahanaim lo ighi.

³⁰ Joab no Abner hawu keu lono ideighive. Eno kughou pa no timi kümtsü hekütsü kumqo keno, tile Asahel kihi küqha mono David qemi pano chighitoku kühave aghi.

³¹ Ikemu David qemi no Benjaminmi Abner timi pano 360 ghiqhi pithive.

³² Eno panongu no Asahel sükumo ikhipe papu kumoki lo shiqhove, ti ye Bethlehem lo ani. Eno Joab ngo paw timiqo ye putho kupuju chesü wuno Hebron lono inaqhe küvü panongu shou vü ipeghi.