SAMUEL AKINIU 19 - Sumi Naga CL (Re-edited) Bible (BSI)

Joab no David Sakiyi

¹ Joab vilo ishi pi, “Akükau ye qa ani eno Absalom ghenguno mlo ani.”

² Ikehu tipani timi kümtsü ghenguno tokulu huye akumlou shive, kughengu panongu no, “Akükau ye pa nu ghenguno amloiju ani” ipi chiluke.

³ Ikehu panongu ye aghüshiqa lono pove no kujoqhiyi kemi toi mükhano aphughi lo wokhave.

⁴ Akükau no pa gi nhave no asütsa kuloghi lono qa, “O I nu, Absalom, O Absalom, I nu, I nu!”

⁵ Tile Joab no akükau kilo ighi no pi, “Ishi nono o qemi, khunono o küxü, eno o pu-angaqo, o nipuqo eno o nipu amishiuqo küxü xalutsü keno kümtsü shikujovae,

⁶ kughengu no ye o mithi kemi kimiye eno o kimiye kemi mithi chenie. Ishi no nono zatsümi ngo aqemiqo ye o ghenguno kiumu kumoe pi mtsüqheive tsüae, kughengu tsala Absalom no xü aghi no ninguu no thikhave aghi aye, no ye alovi aghini che kepi I no ithivae.

⁷ Tighenguno itehi ithulo, khalau ipe o qemi kimiyeqhiyi pütsa lo, kughengu I no Ampeu zülono tushoqhi anike nono ipe move aye itiji milakhi mu o gholo ngo move nani, eno hi ye o lhothe ghuloki lono itehi kutolo küsakügha o lau ighikeu kümtsü nguno alhoksau shive nani.”

⁸ Tileno akükau no ithu khagho lo pa lakhü lo iqave. Eno timi kümtsü no akükau zülo ighi. Tipa ghuloki lo Israelmi ye kümtsü pütüta kilo wove.

David no Jerusalem lo Idewo

⁹ Eno Israel shiaye kümtsü no aqha lo ishi küptsa ae, “Akükau no ni ghümi u lono eno Philistiami launo ni xalu, ikemu itehi pa ye Absalom launo ayeghi qhive no povae.

¹⁰ Ikemu Absalom khuu ningu no nukishe keno, pa ye aghüshi lono thivae. Ikehu itehi nongu ye kushiye akükau sachile ighini ke kiumu piamo kea?”

¹¹ Akükau no achinemi Zadok ngo Abiathar pama lau asütsa hipau tsüpuwu: “Judah lo layemi vilo pilo, ‘Israelmi kümtsü tsa akükau tove akeghi kushiye akükau sasü pa kilo ideighini keu lo nongu no ashekhau shi ani kea?

¹² Nongu ye I thiküzümi; I ghi eno I shi ke. Tishiaye kushiye akükau sachile ighini keu lo nongu ye ashekhau shi ani kea?’

¹³ Eno Amasa vilo pilo, ‘No ye I ghi eno I shi kekumo? I no ishi no o pesü Joab züqhulo Iw ghüshimi zatsüu shive pemo aye Alhou pelo I ghime peni.’”

¹⁴ David no Judah lo timi kümtsü mlo lakhishi ghokütsü luve kehu panongu no akükau lau asütsa puwu, “No eno o qemi kümtsü ideighi lo.”

¹⁵ Ikehu akükau no Jordan lo ideighive, eno Judahmi no akükau sasü kusholu eno pa sasü Jordan kathasü wuniye Gilgal lo ighi.

David no Akipimi Qhitsü

¹⁶ Benjamin laghami Bahurim lo küami Gera nu Shimei no Judahmi sasü akükau sholu niye mtazü ighi.

¹⁷ Pa gholo Benjaminmi qhethonhe che. Saul kibolomi qeu Ziba no pa nuli chighipungu eno pa qemi muku sasü mtazü Jordan lo akükau zülo ighi,

¹⁸ panongu no akükau kibolomi salu no pa lopu shitsü niye kakütha-a hechesü wu. Akükau no Jordan kathani ye akelo Gera nu Shimei no pa zülo itsaqi,

¹⁹ eno pi, “I mpeu akükau no Jerusalem qhive no cheke tsala lo o qeu no kishi akumou shi keno kümsüchilelu püzü akipimi I tsüpe kevilo. Akükau no amlo lo qhitsü kevilo.

²⁰ Kughengu I no axine shivae pi ithi ani. Tighenguno, ishi tsala lo I no Joseph lagha lo atüghüu shi I mpeu akükau lau ighi ani.”

²¹ Zeruiah nu Abishai no khochile, “Shimei no Ampeu no nukishe keu ghushoke ghenguno pa ye pithive kepu kekumo?”

²² Ikemu David no pi, “Zeruiah nuliqo, ni ye nongu lau kiu shive pi ishi tsala lo I külami shi ani kea? Ishi tsala lo ghi Israel lo khuana pithive kepu keshea? Ni ye Israel kükau ipi ithi move ani keshea?”

²³ Eno akükau no Shimei vilo, “No ye thimo nani” ipi ashoqhi shive.

²⁴ Saul nu Mephibosheth no akükau sasü kushoni ye iqighi. Pa ye akükau no wuveke tsala lono ideighi moke kutolo apukhu mu qhumo, akichimhi mu tsamo momu aphimini mu ishimoe.

²⁵ Kughou pa no akükau sholu niye Jerusalem lo ighi keno, akükau no pa vilo pi, “No ye kushiye I gholo wumo kea, Mephibosheth?”

²⁶ Pa no khochile, “I mpeu, O akükau, I qeu no I pishiqhive, kughengu o qeu no pa vilo pi, ‘I no I sala khurha kutoni, tishino tipau shou no I no akükau gholo wuni.’ Kughengu o qeu ye apukhu kinitave kemi ke.

²⁷ Pa no I mpeu akükau lau o qeu pipüthave. Ikemu I mpeu akükau ye Alhouw kungumi toike; tighenguno kiu no o ghenguno akivi keno tishilo.

²⁸ Kughengu I pu kibolomi kümtsü I mpeu akükau zülono pithive kepushi akemu nono o qeu pelo o ghulhu lüpa lo chuche kemi gholo ngolu peke. I mpeu lau qani keu nguno alau ni ye kiu chipi ani kea?”

²⁹ Akükau no pa vilo pi, “Kushiye o ghili alau pini kea? I no xathavae: no eno Ziba nokujo dolo ayeghi kijeve niae.”

³⁰ Mephibosheth no akükau vilo pi, “O, pa pelo ti kümtsü luve pelo, kughengu I mpeu akükau ye kütüsü mono aki lo ighive ake.”

³¹ Tithiu Gileadmi Barzillai no Rogelim lono iqighi, eno pa no akükau gholono Jordan lo wuve, ti ye pa süshosü Jordan katha wuniye shike.

³² Barzillai ye ighono kichimi ampe lhotache shive kemi. Akükau no Mahanaim lo akelo, pa no achuqupu akükau tsüe, kughengu pa ye ighono kinimi ke.

³³ Akükau no Barzillai vilo pi, “I gholo ighive lo, eno I no Jerusalem lono o vehupu kuto tsünie.”

³⁴ Ikemu Barzillai no akükau vilo pi, “I no ampe khije itaghi xü anani pi akükau gholono Jerusalem lo iqhoni kea?

³⁵ Ishi tsala lono ni ye ampe lhotache shi ani. Ni ye kiu no alokiqipu eno kiu no kumo keno kimchi luni keshea? O qeu ye kiu chuni momu kiu shoni keno micheluni keshea? Ni ye itaghi kiptimi eno totimi alephemi sütsa chikulupu keshea? Tishiaye o qeu ye kushiye I mpeu akükau lau amakho alau veqabe tsüni kea?

³⁶ O qeu ye akükau gholono Jordan vechesü alaghi kushuo kumo kutolo wuni. Ikemu kushiye akükau ye asaxü pesü I tsüchile amasa kea?

³⁷ Kimiyeno o qeu pelo idewove pelo, tishianguno ni ye I phughi lo I pu ngo I za pama kumoki phivi lono thivenie. Ikemu o qeu Khimham hi anike pa pelo I mpeu akükau gholo wulu pelo, eno o ghenguno kiukiumu akivi pa pelo shipelo.”

³⁸ Akükau no khochile, “Khimham ye I gholo wuni, eno nono pa ghenguno akivi kümsü aketoi I no tishini, nono I lau laju chekeu kümtsü I no o ghenguno shitsüni.”

³⁹ Tithiu timi kümtsü no Jordan kathasü wuve, eno akükau ghi cheve. Pa no Barzillai müma no pa kümghatsü, eno pa ye pa kilo idewove.

⁴⁰ Akükau ye Gilgal lo wuve, eno Khimham no pa gholono wuve. Judah timi kümtsü eno Israel timi tüxa ghi ala lono akükau salu.

⁴¹ Tithiu Israelmi kümtsü no akükau lau ighi no pi, “Kushiye ni thiküzümi Judahmi ye no ikhi süwuve no itaghi akükau ngo pa kibolomi eno paw timiqo sasü Jordan kathasü ighi ani kea?”

⁴² Judahmi no Israelmi khochile, “Kughengu akükau ye ni bolomi ke. Tishiaye kushiye hi ghenguno nongu ye amlo ide ani kea? Ningu ye akükau mhesüqhi chuve akeshea? Momu pa ye agho kiuala ningu tsü keshea?”

⁴³ Israelmi no Judahmi khochile, “Ningu ye akükau lau asaje chighi ani, ikehu pa lau ghi ningu ye nongu nguno akichiu saje ani. Tishiaye kushiye nongu ye ningu jukünatha ania? Akükau sachile ighini keu tsa ye ningu paghino pike kumo?” Ikemu Judahmi tsa huno Israelmi tsa nguno ayiküsau shive.