SAMUEL AKINIU 18 - Sumi Naga CL (Re-edited) Bible (BSI)

Absalom Pithive

¹ Tithiu David no pa gholo timi akemi hekumqo no panoqo dolo qhethonhe eno aqhe shou zatsüu qhive.

² David no ghüshimi saje küthü lo lakhi no Joab zakütsü qholo, lakhi no Zeruiah nu Abishai, eno lakhi no Gathmi Ittai zakütsü qholono puwuve. Eno akükau no timiqo vilo pi, “Ni ghi nongu gholo wuni.”

³ Ikemu timiqo no pi, “No ye wumoe. Kughengu ningu no pove aye, panongu ye ni ghenguno amlo samo nani. Ningu dolo tüxa thivemu panongu ye ni ghenguno amlo samo nani. Ikemu no ye ningu qhethonhe nguno ameküau ke. Tighenguno nono aphughi lono akukuphu ningu tsüpuwu akeu no akiviue.”

⁴ Akükau no panoqo vilo pi, “Kiu no nongu ghenguno akiviu keno I no shini.” Ikehu ghüshimi aqhe mqo eno qhethonhe mqo no wuche kelo akükau no khagho lono jupuwuve.

⁵ Akükau no Joab, Abishai eno Ittai azah tsü, “I je lono apumi Absalom lau akümtsha shitsülo.” Akükau no Absalom ghenguno zatsümi lau azah tsükeu timi kümtsü no chiluve.

⁶ Ghüshimi no Israelmi küpüghü nike aghüshiqa lo wuve, aghüshi ye Ephraim ghasa lono shie.

⁷ Israelmi ye Davidw timiqo no theqhive, eno tipa tsalani mhekiqi ye kije shive, timi qhethonhe muku pithive.

⁸ Aghüshi ye aghakhu kümtsü lo veküpha wove, eno azütakikihi nguno alau aghasü lono timi kutomo kütsave.

⁹ Absalom no anguküsa shi Davidw timiqo sholu. Pa ye paw khurgha sache, khurgha no aphisübo kije mini akeu loka qholo ilolu kelono pa kütsü no tsatsai aphisübo lo hepiye luve, eno khurgha ye vejoi pove no pa ye kunguu thuthu iju ngove.

¹⁰ Milakhi no ti ithulu no Joab vilo pi, “Julo, aphisübo lo Absalom tshüqhipe akeu I no ithulue.”

¹¹ Joab no timi hu vilo pi, “Kiua, no ye pa ithulu yea? Kushiye tileno pa ghiqhive mokea? Ni ye alokivishi ghükayi chighi eno apokha pesü o tsüni cheke.”

¹² Ikemu timi huno Joab vilo pi, “I u lo ghükayi ahu qhethonhe lakhi iloghi namu, ni ye akükau nu shou I u bemo nani, kughengu ningu no chilu ghi akükau no Abishai ngo Ittai azah tsüe, ‘I je lono apumi Absalom süsho tsülo.’

¹³ Tsala I no pa küxü luvetsü namu (ti ye akükau launo kiumu küsüve mla nani), no ye I launo putosü luveni cheke.”

¹⁴ Joab no pi, “Ni ye hitoi o sasü ado kilhe amlae.” Eno pa no angupa küthü ikhipe Absalom no aphisübo lo heküxape xüaphi lono pa mlo lo jisüve tsü.

¹⁵ Eno Joabw aghünanu kupumi, apumi chighi no Absalom vehope pa ghiqhi pithive.

¹⁶ Tithiu Joab no afuko küigha, eno ghüshimi no Israelmi hachekeu lono ideighive, kughengu Joab no panongu ghasüve.

¹⁷ Panongu no Absalom kumo pesü aghasa lo akuthoku kije lakhi lo vesüve no tipa shou atu qhemghai ghepukuve. Eno Israelmi kümtsü pütüta kilo wove.

¹⁸ Absalom no pa xülono Akükau Khila lo pa sala atsükucho shiqhe pukue, kughengu pa no pi, “I kümsüchilelu kepu ni ye anu kühae.” Pa no atsükucho hu pa je lono kuvetsü, eno ti ye Absalom thigho ipi ishi kutolo kucheni.

David no Absalom Kithi Chilu

¹⁹ Tithiu Zadok nu Ahimaaz no pi, “I pelo wuno akükau vilo Ampeu no pa ghümi u lono pa xaphe luvae pikeu sütsa pipelo.”

²⁰ Joab no pa vilo pi, “Ishi ye no ye asütsa pewumo nani. Ghulo kütau no nono pewulo, ikemu ishi ye no ye kiu sütsa mu pewumoe, kughengu akükau nu thivae.”

²¹ Joab no Cushmi lakhi vilo pi, “Nono kiu ithulu keno akükau vilo wuno pilo.” Cushmi huno Joab zülo itsaqi no pove.

²² Tithiu Zadok nu Ahimaaz no itaghi Joab vilo pi, “Kiukiu shimu talo, I pelo Cushmi papewu pelo.” Joab no pi, “I nu, asütsa süghike ghenguno o sala asaxü küha nani keghi kushiye no ye wuni kea?”

²³ Pa no pi, “Kiukiu shimu talo, ni ye wuni.” Ikehu Joab no pi, “Wulo.” Tileno Ahimaaz no aqa küdau no posü Cushmi vecheve.

²⁴ David ye khagho kini dolo iqa aghi, eno aghukheu no khagho kütsüqa lo ikuno pishipuwo jukelo, timi lakhi pocheghi keu ithulu.

²⁵ Pa no akükau vilo pi kelo akükau no pi, “Tsala pa likhi cheghi aye, pa ye asütsa pecheni.” Pa no akupunu lo ighi kitheve.

²⁶ Aghukheu no timi kütami ghi pocheghi keu ithulu. Ikehu khagho kheu kuno pi, “Julo, timi lakhiu ghi pochenie!” Akükau no pi, “Pa ghi asütsa pecheni.”

²⁷ Aghukheu no pi, “I no kümsüju kelo atüghüu ye Zadok nu Ahimaaz kupo toi ani.” Akükau no pi, “Pa ye timi kivimi eno asütsa kivi pecheni.”

²⁸ Tileno Ahimaaz no igha akükau vilo pi “Kümtsü akivishi ani.” Pa no akükau zülo pa gi pishiqho no pi, “Ampeu O Lhou sheqhelo, khunono I mpeu akükau hebide ithughi keno panoqo shou toluvae.”

²⁹ Akükau no pi, “Apumi Absalom ye akivishi anima?” Ahimaaz no khochile, “Kughou Joab no akükau qeu, o qeu puwu keno, I no ighono mbumghu akeu ithulu, ikemu ti ye kiu keno ni ye mthae.”

³⁰ Akükau no pi, “Tilau puthugho aghilo.” Ikehu pa no tsüghüwo puthughope ngove.

David Mloghuju

³¹ Cushmi huno ighi no pi, “I mpeu akükau ghenguno asütsa kivi! Kughengu Ampeu no ishi o hebide ithughi keqo kümtsü launo o xaphe luvae.”

³² Akükau no Cushmi vilo pi, “Apumi Absalom ye akivishi anima?” Cushmi no khochile, “I mpeu akükau ghümi eno küsakügha ghenguno o hebide niye ithughi keqo kümtsü pelo apumi tipau toive pelo.”

³³ Akükau ye ighono amlosave no khagho kunguu achebo lo iku qa ae. Pa no kunguu iku chekelo pi, “O I nu Absalom, I nu, I nu Absalom! O züqhushi I no thiveni keghi lae, O Absalom, I nu, I nu!”