SAMUEL AKINIU 17 - Sumi Naga CL (Re-edited) Bible (BSI)

Hushai no David Xalu

¹ Tinguno alau, Ahithophel no Absalom vilo pi, “I pelo timi qhethonhe chighikini kishepe itiji David hawu pelo.

² Pa no akulho shive eno aghüthisü akelono I no leni, pa ye thüghüive nani eno pa gholo akemi kümtsü kuha pove nani. Tileno I no akükau likhi ghiqhini,

³ eno külaliu no külapuu lau ighike toi I no timi kümtsü o lau sachile ighini. No ye timi lakhi küxü likhi phucheni, eno kümtsü no aloino nani.”

⁴ Absalom ngo Israel lo layemi kümtsü zülo akükümsü hi ye achipi shi ithulu.

⁵ Tile Absalom no pi, “Arkhimi Hushai kulo, eno pa no kiu pikepu ani keno ningu no inijuni.”

⁶ Kughou Hushai no Absalom lau ighi keno, Absalom no pi, “Ahithophel no pive ake ningu ye pa no pike toi shinio? Tikumo aye nono pijulo.”

⁷ Hushai no pi, “Hipa süchedo lo Ahithophel no akükümsü tsü akeu ye akivi kumoe.”

⁸ Hushai no pi, “Nono ithi anike o pu eno paw timiqo ye aghükivimi, eno panongu ye aluza lo ava lakhi no ati pühave kelo toi axuide ani. Tinguno alau, o pu ye aghütomi ke pa ye putho lo timiqo gholo ngomo nani.

⁹ Julo, itehi mu pa ye acheku momu a-a kütau aghi nani. Pa no atüghüu shi leighi kelo timi khami ikiqive kemtsa ‘Absalom papemi dolono ghiqhikile ayae’ ipi nani.

¹⁰ Tileno amlo kumtomi khuno mlo no abongshuu mlo toi keno, panoqou ghi shishe msave nani, kughengu Israelmi kümtsü no o pu ye aghütomi, eno pa gholo akemi ye aghükivimie pi ithi ani.

¹¹ Ikemu I kükümsü ye Beersheba lono Dan kutolo Israelmi kümtsü azüghi lo asaye toi o lau hekütsü pelo eno no ampi no aghüshi lo wulo.

¹² Tishino ningu no a-a hami khileno pa ithulu kepu keno tileno pa leni, atsüzü no ayeghi lo qipuku khavi ningu no pa leni, eno pa ngo pa gholo kichemi lakhimu qhimoni.

¹³ Pa no aphughi lo poilove aye, Israelmi kümtsü no akighi peighi no tipa phughi sünhesü atu tachumu kühave moke kutolo akhila lo sailoni.”

¹⁴ Ikelo Absalom eno Israelmi kümtsü no pi, “Arkhimi Hushai kükümsü no Ahithophel kükümsü nguno akiviu shi ani.” Kughengu Ampeu no Ahithophel kükümsü kivi theqhive peniye kughuve ke, tishianguno Ampeu no Absalom shou aghimepu süghi niye ke.

¹⁵ Tithiu Hushai no achinemi Zadok ngo Abiathar pama vilo pi, “Ahithophel no akükümsü titoi Absalom ngo Israel lo layemi tsü kemu ni ghi hitoi akükümsü tsüvae.

¹⁶ Tighenguno itehi mtazü David vilo pi puwu lo, ‘Itiji yenguyike-a lo ngo kevilo, ikemu kiukiu shimu mtazü kathasü wuvelo, tikumo aye akükau eno pa gholo akemi kümtsü kütsave nosae.’”

¹⁷ Jonathan ngo Ahimaaz pama ye En-rogel lono khea. Aqeliu lakhi no pama vilo pini keu shia, eno pama no akükau vilo pini keu shiae, kughengu panongu ye mishighüna lo aju ithulu pemoni ye shiae.

¹⁸ Ikemu apumi lakhi no panongu ithuluve no Absalom vilo pive. Tighenguno pama no mtazü wuno Bahurim lo timi lakhi, khuu ki khala lo azükhe akeno pa kilo ilove.

¹⁹ Anipu huno aphi ikhipe azükhe kichi nhave no tipau shou athi küza pukuve, eno tipau vehu kiumu ithi move.

²⁰ Kughou Absalom qemi no topumi kilo ighi keno panongu no pi, “Ahimaaz ngo Jonathan pama khile ani kea?” Topumi huno pama vilo pi, “Pama ye aghokiti heche wuvae.” Panongu no phuwu kemu ithumlave no Jerusalem lo idewove.

²¹ Panongu no wuve kethiu pama no azükhe lono ipeghi no wuve eno Akükau David vilo pi, “Ithulo, mtazü azü kathave lo, kughengu Ahithophel no titoi o mjochile niye akükümsü tsüvae.”

²² David eno pa gholo akemi kümtsü no ithu Jordan kathave. Tsütho ipeghi kelo Jordan kathamo keu khumu kühave.

²³ Kughou Ahithophel no pa kükümsü lumokeu ithive keno, pa no paw khurha lo ikuve no pa ghüna lo wove. Pa no pa ki hekütsüve no pa likhi pa tshüqhi pithive, eno pa ye papu kumoki lo shiqhove.

²⁴ Tithiu David no Mahanaim lo ighi. Absalom no Israel lo timi kümtsü sasü Jordan katha ikuve.

²⁵ Absalom no Joab züqhulo Amasa pesü ghüshimi shou ampeu shivepe. Amasa ye Ishmaelmi Ithra nu ke, pa ye Nahash nonga Abigail sasü akibo shive, li ye Zeruiah tsünipu, Joab paza ke.

²⁶ Israelmi eno Absalom no Gilead yeghi lo aghazü shipe ngove.

²⁷ Kughou David no Mahanaim lo ighi keno, Ammon lo Rabbah lono ighi kemi Nahash nu Shobi, Lo-debar lono ighi kemi Ammiel nu Makhir, eno Rogelim lono ighi kemi Gileadmi Barzillai,

²⁸ no alüpa, ali, ayeghi li, ashothi, barleythi, ashomkhu, küsave keu thi, khetsüthi, axa,

²⁹ akhingozü, akichhizüchi, ambe, athachi, ishi David ngo timiqo pelo chupeni ye süghitsü, kughengu panongu no pi, “Timiqo ye yenguyike-a lo müzüthi, akulhoshi eno tüghüthi anie.”