SAMUEL AKINIU 16 - Sumi Naga CL (Re-edited) Bible (BSI)

David ngo Ziba

¹ Kughou David no ato mqa kitila heche wu keno, Mephibosheth qeu Ziba no asho 200, atsaikipki pho 100, tsülü tusho xathi 100, eno aji ahughi lakhi, ishi khurha kini xapipe no pa sasü kusho.

² Akükau no Ziba vilo pi, “Kushiye no ye hipaqo süghi ani kea?” Ziba no khochile, “Khurha no akükau kibolomi no iku peni, asho eno tsülü tusho xathi no akükauw lhothemi no chupeni, eno aji no yenguyike-a lo khunono tüghüthi ani keno panoqo no ye penie.”

³ Akükau no pi, “O mpeu nu khile ani kea?” Ziba no khochile, “Pa ye Jerusalem lo ani, kughengu pa no pi, ‘Ishi Israel laghami ye I pu kükaqha I tsü chileve nanie.’”

⁴ Tile akükau no Ziba vilo pi, “Julo, Mephibosheth no kiu ani keno kümtsü itehi ye ow shivae.” Ziba no pi, “I no agigihu tsü ani; I pelo o nhethe lo kikimiye ithulu pelo, I mpeu akükau.”

Shimei no David Ghusho

⁵ Kughou akükau no Bahurim lo ighi keno, tile Saul laghami dolo abolomi lakhi, pa je ye Gera nu Shimei, pa no tamono David ghushosü ighi.

⁶ Pa no atu pesü David ngo pa qemi kümtsü vehaqhi, pa u ajeu eno piyiu kümtsü timi kutomo eno aghütomi ghi ae.

⁷ Shimei no David ghushoqhi pi, “Ipevelo, ipevelo, no aji küxü, ameküküha timi!

⁸ Saul, khuu-a lo nono ayepe ani keno, pa kibolomi kümtsü shou nono aji pele kehu Ampeu no o shou amkhü luvae, eno Ampeu no kükaqha pesü o nu Absalom u lo süve tsüae, julo, küsakügha ye o shou ani, kughengu no ye aji küxü timi lakhi ke.”

⁹ Tithiu Zeruiah nu Abishai no akükau vilo pi, “Kushiye atsü kithi hipau ye I mpeu akükau ghushoni kea? I pelo wuno pa kütsü luvetsü pelo.”

¹⁰ Ikemu akükau no pi, “Nongu Zeruiah nuliqo, ni ye nongu sasü kiu shikepu ani kea? Tsala Ampeu no pa vilo, ‘David ghusholo,’ ipike ghenguno pa no ghusho aghi aye, khuu no pa vilo ishi piluni kea, ‘No ye kushiye tishi kea?’”

¹¹ David no Abishai eno pa qemi kümtsü vilo pi, “Julo, I nu thotsü I küxü phucheni aye itehi Benjaminmi hipau ye tinguno alau shinani thono! Pa lokutove lo, pa pelo ghusho apelo, kughengu Ampeu no pa vilo tishilo pike.

¹² I lau akumou shive keu Ampeu no ithulu tsüno ishi paw ghukusho theli lo akivi pesü I tsüchile penie.”

¹³ Tishino David eno paw timiqo ye cheve, eno Shimei no tipa toghi ghüngü lono pa ghusho ghi atu pesü veha eno ayeghimkhu epe veha puwu.

¹⁴ Akükau eno pa gholo chekemi kümtsü akulhoshi Jordan tolu. Eno tileno pa ye aghüthi shipüxü kithelu.

Absalom no Jerusalem lo Ighi

¹⁵ Tishi akelo Absalom eno Israelmi kümtsü no Jerusalem lo ighi, eno Ahithophel no pa gholo che.

¹⁶ Kughou David küsau Arkhimi Hushai no Absalom lau ighi keno, pa no Absalom vilo pi, “Akükau axüpushu lo! Akükau axüpushu lo!”

¹⁷ Absalom no Hushai vilo pi, “Hi no o küsau lau ow pükhükulu piye akeu keshea? Kushiye no ye o küsau gholo wumove kea?”

¹⁸ Hushai no pi, “Moe, kughengu Ampeu no eno timi hipaqo ngo Israelmi no khuu kisheve akeno, ni ye paw shi nani, eno pa gholo anani.

¹⁹ Eno itaghi, ni ye khuu qeni kea? Ni ye pa nu qemoni keshea? I no o pu qe ighive ketoi, ni ye o qe nanie.”

²⁰ Tileno Absalom no Ahithophel vilo pi, “O kükümsü tsülo. Ningu ye kiu shikepu kea?”

²¹ Ahithophel no pi, “O pu nipu amishimi khunoqo aki jukütsü penike qhive keno panoqo lau wulo, eno Israelmi kümtsü no no ye o pu lau aphikümqhüpu shivae pi chiluve nani, tileno o gholo akemi kümtsü amlo shikumtolu nani.”

²² Tighenguno panongu no aki kütsüqa lo aphiki shiqhe. Eno Absalom no Israelmi kümtsü zülono papu nipu amishiuqo lau wue.

²³ Tipa ghuloki lo Ahithophel no akükümsü tsükeu ye Alhou tsa kighini kileju aketoi kihi che; ikehu David eno Absalom ghi Ahithophel kükümsü kümtsü gihu cheke.