SAMUEL AKINIU 15 - Sumi Naga CL (Re-edited) Bible (BSI)

Absalom no Küsüqe

¹ Hipa thiu Absalom no pa ghenguno khurkulu lakhi, khurshi eno timi lhopungu pa züu wuni kemi kutoluve.

² Absalom no itheno ithuve no khagho phivilo alaghi lo puthugho ngoche. Kughou timi khuana no kütsala keu aghi püzü xakütha ghenguno akükau lau wu cheghini keno, pa no kuno piche, “No ye kiu phughi lono ighi kea?” Eno pa no, “O qeu ye Israel lo tipano shiaye lono,” ipiche.

³ Absalom no pa vilo pi, “Julo, nono pükha akeu ye akivi eno achipi, ikemu akükau ye o tsa initsü peniye timi khumu süküsü shipüamoe.”

⁴ Pa no piche, “O, ayeghi lo I no xaküthau shi aghike aye lae! Kütsala eno kukhokile akemi kümtsü I lau ighini che, eno I no kuchou xakütha tsüni cheke.”

⁵ Kughou milakhi no agigihu pa tsüniye aphivilo ighini keno, pa no pa u xachhope pa khaluve no mümache.

⁶ Titoi akükau launo xakütha luniye ighi kemi kümtsü lau Absalom no tishi che. Ikehu Absalom no Israelmi kümtsü mlo chuluve.

⁷ Ampe bidi thiu Absalom no akükau vilo pi, “Kimiyeno I pelo Hebron lo wuno I shoqhi khikhi I no Ampeu lau shipüani keno shikupulu pelo.

⁸ Kughengu I no Geshur, Aram lo akelono o qeu no ashoqhi lakhi shipüani, ‘Ampeu no Jerusalem lo I sachile ighi aye, I no Ampeu mllanie.’”

⁹ Akükau no pi, “Aloino wulo.” Tighenguno pa no ithu Hebron lo wuve.

¹⁰ Ikemu Absalom no Israel lo ashiaye kümtsü lau tuqhou tsapemi puwu no pi, “Nongu no afuko ghügha chilu kemtsa pilo, ‘Absalom no Hebron lo akükaue!’”

¹¹ Jerusalem lono khunoqo kusü püa keno pano 200 no Absalom gholo wu, ikemu panongu ye akipimi küha eno kiumu ithimoe.

¹² Absalom no aghakishi kümlla tsü akelo pa no Giloh lo Davidw mijekütsüu Gilohmi Ahithophel kupuwu. Tile akumtoshi küsüqe keu ipeghive, eno Absalom gholo timi alau kighisheve.

David no Jerusalem lono Pove

¹³ Atsapemi lakhi no David lau ighi no pi, “Israelmi ye Absalom pape wuvae.”

¹⁴ David no Jerusalem lo pa gholo akemi aqemi kümtsü vilo pi, “Ithulo, ningu povenie, tikumo aye ningu ye Absalom launo pomlave nani. Mtazü povelo, tikumo aye pa no ningu shou kütsakungo keu süghi no azütakikihi kütsügha no aphughi kütsave nosae.”

¹⁵ Akükau qemi no pa vilo pi, “O qemiqo ye kiu kiumu akükau no xathakeu shinike kutope ani.”

¹⁶ Ikehu akükau ngo pa kibolomi kümtsü wukhave. Pa no anipu amishiu chighi pesü aki jukütsü peniye qhive.

¹⁷ Timi kümtsü no akükau papesü wuve, eno panongu no aki ashekhau lo ngove.

¹⁸ Pa qemi kümtsü no pa thiu shi, eno Kherethmi, Pelethmi, Gathmi pano 600 khunoqo Gath lono pa pape chekeno, panongu no akükau gholo shino wuve.

¹⁹ Akükau no Gathmi Ittai vilo pi, “Kushiye nou ghi ningu gholono wuni kea? Idewove lo eno akükau gholo ngovelo, kughengu no ye inami eno no ghakhu lono hapheve kemi ke.

²⁰ No ye ighina no ighi aphi püzü ishi ye I no khila wucheni keno mthamu ningu gholo o sawuveni keshea? O thiküzümi sasü idewove lo, Ampeuw iqemokeu kikimiye eno pükhükulu o piye penie.”

²¹ Ikemu Ittai no akükau khochile, “Ampeu xü ani eno akükau I mpeu xü anike, khile khilemu I mpeu akükau no wukeu lo xümu thimu o qeu ghi wunie.”

²² David no pi, “Tishiaye kholo.” Ikehu Gathmi Ittai no timi kümtsü gholono itimiqo gholono wuve.

²³ Panongu no wuche kelo ayeghi kümtsü no ighaqa, eno akükau no Kidron ghokiti kathasü timi kümtsü no yenguyike-a küdau wuve.

²⁴ Ikelo Abiathar no ighive, eno julo, Zadok ghi Levimi kümtsü sasü Alhouw puloshoqhi bohu xapu ighive. Timi kümtsü no aphughi heche wuve moke kutolo panongu no Alhouw puloshoqhi bohu ghope qhive.

²⁵ Tishino akükau no Zadok vilo pi, “Mishighüna lo Alhouw puloshoqhi bohu xapu ilove lo. Tsala Ampeu nhethe lo I kimiyelu kepu aghi aye, Pa no I sachile ighi no I pelo tipa kungo-a ithulupe nani.

²⁶ Ikemu tsala Pa no, ‘O lau I mlokiqi kühae,’ ipi aye, julo, ni hile ani, Pa no kiu no akivi keno I lau shipeni.”

²⁷ Akükau no achineu Zadok vilo hi ghi pi, “No ye ithukulumi kekumo? O nu Ahimaaz ngo Abiathar nu Jonathan sasü aloino mishighüna lo idewove lo.

²⁸ Nono I lau küsütsa keu chilu moke kutolo ni ye yenguyike-a lo ngokhe aghini.”

²⁹ Ikehu Zadok eno Abiathar pama ye Alhouw puloshoqhi bohu xapu Jerusalem lo idewove, eno panongu ye tilau ngove.

³⁰ Ikemu David ye apukhu kümsa, akütsü küzüluve no mloqasü Olive Toghi lo iqhove. Eno timi khunoqo pa gholo akeno panongu ghi akütsü küzüluve no mloqasü iqhove.

³¹ David vilo ishi pi, “Ahithophel ye Absalom sasü küsüqe akemi gholo anie.” David no pi, “O Ampeu, kimiyeno Ahithophel mijekütsü ye mbomzü shive pelo.”

³² David no akütsüqa khile panongu no Alhou mlla akeno tilau wuche kelo, Arkhimi Hushai no pa kuuphi süxüve no akütsü lo ayeghimkhu epuku püzü pa sholu niye ighi.

³³ David no pa vilo pi, “Nono I gholo wu aye, no ye I ghenguno amakho shinani.

³⁴ Ikemu nono aphughi lo idewo no Absalom vilo, ‘I no wovekeu lo o pu qeu shike toi itehi ni ye o qeu shiniae, O akükau,’ ipi aye, nono I ghenguno Ahithophel mijekütsü theqhilu nanie.

³⁵ Achinemi Zadok ngo Abiathar pama ghi tilau anike kumo? Ikehu akükau kilo nono kiu chilu keno achinemi Zadok ngo Abiathar pama vilo pilo.

³⁶ Julo, anu pama ghi panongu gholo tilau ani, Zadok nu Ahimaaz ngo Abiathar nu Jonathan, nono kiu chilu keno kümtsü panoqo vecheo I lau puwu lo.”

³⁷ Ikehu Absalom no Jerusalem lo iloche kelono David küsau Hushai ghi aphughi lo iloghi.