SAMUEL AKINIU 13 - Sumi Naga CL (Re-edited) Bible (BSI)

Amnon eno Tamar

¹ David nu Absalom ye achepu ajukivi lakhi ache, li je ye Tamar. Ado hami thiu David nu Amnon no li kimiyeve.

² Amnon ye ighono pa chepu Tamar ghenguno pitipüza süuve, kughengu li ye athathelimi lakhi, eno Amnon ye li lau kiuala shiluni keu kushokütsü shiae.

³ Amnon no aküsau lakhi ache, pa je Jonadab, pa ye David thiküzüu Shimeah nu ke. Jonadab ye ighono mqümghami lakhi.

⁴ Pa no Amnon vilo pi, “O akükau nu, no ye kushiye inaqhe atsütsü agiküzü shi chenia? I vilo pimo keshea?” Amnon no pa vilo pi, “Ni ye I thiküzüu Absalom chepu kimiye anie.”

⁵ Jonadab no pa vilo pi, “O lüpa lo ihozüve no süanie pi amqü shilo. Eno kughou o pu no o juniye ighini keno, pa vilo pilo, ‘I chepu Tamar pelo ighi no asho I tsü pelo, eno I zülono achuqupu kutotsü pelo, tishianguno I no ti ithulu ghi li u lono chunie.’”

⁶ Ikehu Amnon no amqüshi süke ghilishi ihozüve. Kughou akükau no pa juniye ighi keno, Amnon no akükau vilo pi, “Kimiyeno I chepu Tamar pelo ighi no I zülono asho hami mla pelo, tishianguno I no li u lono chuni.”

⁷ Tile David no timi khami aki lo puwu no Tamar vilo pipe, “O mu Amnon kilo wuno pa ghenguno achuqupu hami kuto tsülo.”

⁸ Tamar no pamu Amnon kilo pa no ihozü akeu lo wu. Li no pa zülono asho kunuve keu ikhipe inada no asho mlape pügha.

⁹ Eno akhosali lono ikhiphe pa tsü, ikemu pa no chuni keu milive. Pa no pi, “I launo ipeve lo.” Ikehu timiqo no ipeve.

¹⁰ Tile Amnon no Tamar vilo pi, “I no o u lono chunike achuqupu pesü achebo lo iloghi lo.” Tamar no li no mlakeu sho ikhipe achebo lo pamu Amnon lau iloghi.

¹¹ Ikemu kughou li no tipau pesü pa phivilo ighi keno, pa no li tsüqü luve no li vilo pi, “Ighilo, I chepu, I sasü zülo.”

¹² Li no khochile, “Moe, I mu, I shipütha kevilo, kughengu hitoi keu ye Israel lo shiche moe; tichetighepu shikevilo.

¹³ I ghengu ye, ni ye akukujo no khila wuveni kea? O ghengu ye, no ye Israel lo tichetighepu mbomzümi toive nani. Tighenguno itehi kimiyeno akükau pütsa lo, kughengu pa ye I pesü o tsünike moe pimo nanie.”

¹⁴ Ikemu pa no li tsa ini tsümo, eno li nguno akumtou shi akehu li shipütha sasü züve.

¹⁵ Tithiu Amnon ye ighono akimthipu kije lono li mithiuve, ti ye pa no li kimiye akeu nguno akijeu shi mithiuve ke. Eno Amnon no li vilo pi, “Ithu no wuvelo!”

¹⁶ Ikemu li no pa vilo pi, “Moe, I mu, kughengu I puwuve keu ye nono I lau kiu shive akeno tinguno akipimi akijeu shive nani.” Ikemu pa no li tsa initsü move.

¹⁷ Pa no apumi pa ghini shi akeqo kuno pi, “Totimi hipau I zülono saipeve no ahukikha khavelo.”

¹⁸ Li ye chijeboike phi gholo au küküzü kushuo xapu ae, kughengu akükau nonga athathelimi ye tishi pepu cheke. Ikehu pa qeu no li sünhepheve no heküpta süve.

¹⁹ Tamar no li kütsü lo ayevu epuku no chijeboike phi kushuo pepu akeu süxüve. Eno li no au pesü akütsü nhave no igha qasü wuve.

²⁰ Absalom no li vilo pi, “O mu Amnon no o gholo akeshea? Itehi iqüghaive lo, I chepu. Pa ye o muke hi no o mlo püna akevilo.” Ikehu Tamar ye li pamu Absalom kilo yenguyi keu totimi shi ache.

²¹ Kughou Akükau David no hi kümtsü chilu keno, pa ye ighono axuideve.

²² Ikemu Absalom ye akivi na alhoksa namu Amnon vilo kiumu pimoe, Amnon no pa chepu Tamar shipüthave ke ghenguno pa ye Amnon mithive.

Absalom no Amnon Pithive

²³ Ampe kini thiu Absalom ye Baal-hazor, khikhi Ephraim phivilo akeno, tilau ambe mhi tsa ae, eno Absalom no akükau nuli kümtsü kusü.

²⁴ Pa no akükau lau ighi no pi, “Julo, o qeu ye ambe mhi tsa ani. Kimiyeno akükau eno pa qemi ghi pa qeu gholo wu tsülo.”

²⁵ Ikemu akükau no Absalom vilo pi, “Moe, I nu, ningu kümtsü ye wumoni, tikumo aye ni ghenguno o makho shive nosae.” Pa no tsüikhomo pi akemu David no kükümgha bevetsü no pa ye wumove.

²⁶ Tileno Absalom no pi, “Imaye, kimiyeno I mu Amnon pelo ningu gholo wulu pelo.” Akükau no pi, “Kushiye pa ye o gholo wuni kea?”

²⁷ Ikemu Absalom no Amnon eno akükau nuli kümtsü pelo wu penike pi auve kehu pulove tsü.

²⁸ Tishino Absalom no pa qemi azah tsü, “Amnon no aji shove no amlo lo alokivi shi akeu amichi shivelo, eno kughou I no o vilo, ‘Amnon ghiqhive lo,’ ipini keno pa pithive lo. I no azah o tsü anike kumo? Msa kevilo; Amlo loghilo eno akumto shilo.”

²⁹ Ikehu Absalom no Amnon lau shilopi azah tsüke toi Absalom qemiqo no tishive. Tithiu akükau nuli kümtsü no ithu pütütaw khurshi lo ikuno pokhave.

³⁰ Panongu no ala lo chekelo, “Absalom no akükau nuli kümtsü ghiqhive no lakhimu kühavae” ipi David lau asütsa ighi.

³¹ Tile akükau no puthughove eno pa phimini süxüve no ayeghi lo ikiqive. Pa qemi pa gholo akemi kümtsü no panongu phimini süxüve.

³² Ikemu David thiküzüu Shimeah nu Jonadab no pi, “Anuli kümtsü pithive tsüa küghashi I mpeu ye kümsü kevilo, Amnon likhi no thivae. Kughengu Amnon no pa chepu Tamar shipüthave ke tsala lono Absalom zakütsü vecheo hi kuchughupe qhive ke.

³³ Tighenguno itehi I mpeu akükau no anuli kümtsü thiva küghashi kümsü kevilo, kughengu Amnon likhi no thivae.”

Absalom no Geshur lo Pove

³⁴ Ikelo Absalom ye pove. Eno apumi aghukheu no jupuwo kelo timi kutomo pa thiu naghuto hokümxa lo alalo cheghi keu ithulu.

³⁵ Jonadab no akükau vilo pi, “Julo, o qeu no pike toi akükau nuliqo ye cheae.”

³⁶ Pa no atsa piqhi khavi akükau nuliqo ye ighive eno panongu no ighaqae. Akükau eno pa qemi kümtsü no mloqae.

³⁷ Ikemu Absalom no posü Geshur kükau Ammihud nu Talmai lau wuve. Eno David no pa nu ghenguno tsalakipe mloche.

³⁸ Absalom no pove kethiu tilau ampe küthü ngove.

³⁹ Akükau no Amnon ghenguno mlo tave kethiu pa lolo Absalom lau wunishi khelhouve.