SAMUEL AKINIU 12 - Sumi Naga CL (Re-edited) Bible (BSI)

Nathan no David Lomipi

¹ Ampeu no David lau Nathan puwu. Pa no ighi no David vilo pi, “Aphughi lakhi lo timi kini ache, lakhi no kinimi eno lakhiu ye kumlhomi.

² Kinimi huye amishi eno ambe kutomo ache,

³ ikemu kumlhomiu ye ambequ khikhi pa no qhülu keno ti likhi eno kütau ye kiumu kühae. Pa no tipau pa eno pa nuli gholono lojiputhu. Tino pa khu lono achuqupu chuche, pa jukhu lono azü yeche, eno pa umlo lo züche, tipau ye panga lakhi toi ache.

⁴ Ghulo lakhi kinimi kilo kicheghüzümi ighi, kinimi huno pa mishi momu ambe loji lono heqhipe inami tsünike pulo move. Tipa züqhulo akumlhou mbe luve tsüno pa kilo inami ighi akeu ghenguno alibe kutove tsü.”

⁵ Tile David ye timi tipau jupe ighono amloideve, eno pa no Nathan vilo pi, “Ampeu xü anike timi khuu no hipau shi keno thive küzüe,

⁶ eno pa no hipau shikeu eno kimiyemo keu ghenguno ghuthu bidino küghüsü ambe pesü tsüchileni.”

⁷ Nathan no David vilo pi, “Timi huye noke! Ampeu, Israel Lhou no ishi piani, ‘Israel kükau shipeniye I no o nukishe, eno Saul u lono I no o xaphelu.

⁸ I no o mpeu ki eno pa nipuqo, eno Israel ngo Judah lagha pesü o tsüe. Tsala hi no mikhelo aghi aye, I no itaghi alau o tsü küphani cheke.

⁹ Kushiye no ye Ampeu zülo kiu küsakügha shiniye Pa tsa jukümghaleve kea? Nono azütakikihi pesü Hittimi Uriah ghiqhive no pa nipu pesü o nipu shiniye luve tsüae eno nono Ammonmi zütakikihi pesü pa pithivae.

¹⁰ Tighenguno itehi azütakikihi ye khilemu o kibo lono wumoae, kughengu nono I jukünathave eno Hittimi Uriah nipu pesü o nipu shive ake.’

¹¹ Ikehu Ampeu no piani, ‘Julo, o kibo lono o hebide penike I no alhoksa ipeghi peni. Eno I no o nhethe lono o nipuqo ikhipe o kisüghümi tsüve nani, eno pa no atsala küa lono o nipuqo sazü nani.

¹² Kughengu nono tuqhou no shi kemu Israelmi kümtsü zülono eno khetsünhe zülono I no hipau shi nani.’”

¹³ David no Nathan vilo pi, “Ampeu zülo I no axine shivae.” Nathan no pa vilo pi, “Ampeu no o xine peve tsüae; no ye thimo nani.

¹⁴ Tishimu, akümla hipau vecheo nono akumou lono Ampeu thoghake ghenguno, o lau anu punu keu ye thive nani.”

¹⁵ Tishino Nathan ye pa kilo wove. Uriah nipu vecheo David lau punu keu nu huye Ampeu no ghimeve no süuve.

David Nu ye Thive

¹⁶ Tighenguno David no anu züqhushi Alhou phuwu. David no pa chebo lo ilove no kümvü eno puthotsü ayeghi lo ihozü.

¹⁷ Pa kilo layemiqo no ayeghi lono pa sünheqhe niye pa phivilo puthugho, ikemu pa no tishike kumono panoqo gholo no achuqupu mu chumoe.

¹⁸ Atsala akütsüniu lo anu ye thive. David qemi no pa vilo anu thivae pini keu msave, kughengu panongu no pi, “Julo, anu no xü akelo ghi ningu no pa pütsa kelo pa ye ningu tsa initsü moe. Imaye kishino ningu ye pa vilo anu ye thivae piluni kea? Pa ye pa ampi ghimepu shive nosae.”

¹⁹ Ikemu kughou David no pa qemi no kümtsa küptsa akeu chilu keno, pa no anu ye thivae pi vethaluve. Eno pa no aqemi vilo pi, “Anu ye thive akeshea?” Panongu no pi, “Pa ye thivae.”

²⁰ David no ayeghi lono ithughive, azü luve, aphiau nuve eno pa phimini kilive. Pa no Ampeu kilo ilo no Pa mlla. Tithiu pa no pa kilo wuve. Pa no achuqupu khu, eno pa zülo qhitsü kelo ti chuve.

²¹ Tithiu pa qemi no pa vilo pi, “No ye kiu ghili shi ani kea? Anu no xü akelo no ye pa ghenguno kümvü eno qa ae; ikemu kughou anu no thive keno, nono ithughi no chue.”

²² Pa no pi, “Kughou anu no xü akeno, I no kümvü eno qa ae, kughengu I no pi, ‘Ampeu no küpükini I piye no anu püxü tsünike khuu no ithi ani kea?’

²³ Ikemu itehi pa ye thive ake kushiye ni ye kümvüni kea? Ni ye itaghi pa saighive kulupu keshea? I no pa lau wu nani thono pa ye I lau ideighi moae.”

Solomon Kupunu

²⁴ Tithiu David no pa nipu Bathsheba mlo vepiqi tsü, pa no li lau ilo no li sasü zü, eno li no anu lakhi punuke pa je Solomon kutsüe. Ampeu no pa kimiyeve

²⁵ eno tungkupu Nathan vecheo atsape tsüpuwu. Ikehu Ampeu ghenguno, pa je Jedidiah kuvetsü.

Rabbah Leluve

²⁶ Joab no Ammonmi Rabbah lo akeqo sasü küpüghüa eno kükamiw mishighüna ye leluve.

²⁷ Joab no David lau aghinimi puwu no pi, “Ni ye Rabbah sasü küpüghü no azü akeu phughi ghi leluvae.

²⁸ Tighenguno itehi timi achili akeqo hekütsü no aphughi khasüpe leluve lo, tikumo aye I no leluve no I je kuveni.”

²⁹ Tighenguno David no timi kümtsü hekütsü no Rabbah sasü küpüghü eno leluve.

³⁰ Pa no akükau kütsü lono kükakütsüqho luvetsü. Tipau ye ameshoyi ahu shighi pungu, eno tile akughupu tu ae, eno David kütsü lo süvetsü. Pa no mishighüna lono hakholu keu nhemgha kutomo süghi.

³¹ Pa no tile timi akeqo saipeghive no panoqo pelo asüküküxümi, ayikhumu eno amüghü kipe kümla shipe, eno pititu kümla-a lo ime mlape. Hitoi pa no Ammonmi phughi kümtsü lo tishive. Tithiu David eno paw timi kümtsü Jerusalem lo idewove.